¿Yootojiraashiche pia nümaa Maleiwa?

Na wayuu aleewakana maʼin, yootojiraʼawaishii. Eesü naainjüle tia suluʼupünaa serulaat, suluʼupünaa Internet, video jee shiale sükajee karaloukta. Müleka keeʼireere waaʼin naʼaleewain waya Maleiwa, yootojiraainjana waya nümaa waneepia. ¿Jamüinjatü sukuwaʼipa tia watuma?

Yootushii waya nümaa Maleiwa wanaa sümaa woʼuraajüin nümüin. Nnojotpejeʼe müin tia maʼaka saaʼin yootoo nümaa wanee wayuu. Woʼuraajapa nümüin chi Maleiwakai, kojutüshaatainjachi nia wamüin. Süka jamüin, niain waashajaain amaa chi Kakumalakai kasaka süpüshuaʼa. Süpüla naapüin Maleiwa wanüiki, eeinjatü waneeirua kasa waainjaka palajana. Anuu apünüinsü sukuwaʼipa.

Palajana, niainjachi woʼuraajaka amüin Jeʼwaa nümüiwaʼa. Nnojoishi niainjachin woʼuraajüin amüin Jesuu, sümüin wanee ayaakuaa jee nümüin wanee «santo» (Éxodo 20:​4, 5). Müsü tü Wiwüliakat süchiki tia: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. [...] Nnojo motüin jaaʼin aapaa analuʼut nümüin [Maleiwa] saaʼu tü anasü naaʼinrakat jümüin» (Filipos 4:6). Woʼuraajüinjanapa nümüin Maleiwa, wachuntüinjatü tü kasakalüirua nümüin sükajee nünülia Jesuu. Müshinka Jesuu: «Tayakai, taya chi süntajachikai akajee wayuu nünainmüin Maleiwa» (Juan 14:6). Jee müsia tü wanee kasa waainjüinjatkat süpüla naapüin Maleiwa wanüiki, shia wachuntajatüin wanee kasa wanaapünaa sümaa tü keeʼireekat naaʼin wapüleerua. Müsü tü Wiwüliakat: «Müleka wachuntüle nümüin [Maleiwa] tü nüchekakat wapüleerua, jaʼitairü wachuntüin kasa eekai eein, watüjaa aaʼulu sünain naapüin wanüiki» (1 Juan 5:14).a

Na wayuu aleewakana maʼin, yootojiraashii naya. Nnojoishi waneeshin chi aashajaakai. Jee müsia jülüjüinjatü naaʼin tü nümakat chi wanee nümüin. Akaʼaya wayakana, müinjatia wakuwaʼipa nümaa Maleiwa, jülüjüinjatü waaʼin tü nümakat wamüin. ¿Joujawaishi yootuin Maleiwa wamaa?

Yootowaishi wamaa chi Maleiwakai wanaa sümaa waashajeʼerüin tü Wiwüliakat (2 Timoteo 3:​16, 17). Tia, müsü aka saaʼin nüshajüle pümüin wanee karaloukta wanee paʼaleewain. Paashajeʼerapa shia, müshi yalakai naaʼin pümaa sünain yootoo. Müsia neʼe waashajeʼerapa tü Wiwüliakat, müshi yalakai naaʼin Maleiwa wamaa sünain yootoo. Anuujeseʼe sünüiki Gina, tü waashajaakalü achiki paalapayüna: «Naʼaleewainjeerü taya Maleiwa müleka taashajeʼerüle tü Wiwüliakat. Ayatsüjaʼaya taashajeʼerawalin waneepia tü Wiwüliakat, müsüjeseʼe tarütkaain maʼin nünainmüin chi Maleiwakai». ¿Paashajeʼerüinche waneepia tü sümakat tü Wiwüliakat? Paainjüle tia, müshi yootokai naaʼin Jeʼwaa pümaa otta arütkaweechi maʼin pia nünainmüin.