SUSOUKTAKA EʼIPAJEE TÜ WIWÜLIAKAT
¿Kasa natüjaainjatka aaʼu püchonnii süpüla alin Maleiwa napüla?
Pikiraja püchonnii sükajee tü kasa nukumajakat Maleiwa süpüla natüjaain saaʼu nukuwaʼipa Maleiwa otta alin nia napüla
Aijeechi Maleiwa napüla püchonnii müleka nekirajaale sünain shiimain eein nia otta natüjaale saaʼu alin naya nüpüla. Neʼraajüinjatü nukuwaʼipa Maleiwa (1 Juan 4:8). Choʼujaasü natüjaainjatüin saaʼu kasapülajanain nukumajaka Maleiwa na wayuukana, jamüin nuuʼulaaka müliain wayuu otta kasainjatüin naainjüin wapüleerua mapeena. ( Paashajeʼera Filipos 1:9.)
Aijeechi Maleiwa napüla püchonnii müleka aire püpüla Maleiwa. Süka jamüin, shiain nashateerüin pukuwaʼipa. ( Paashajeʼera Deuteronomio 6:5-7 otta Proverbios 22:6.)
¿Kasa paainjüinjatka süpüla alinjachin Maleiwa napüla na püchonniikana?
Pülasü maʼin nünüiki chi Maleiwakai (Hebreokana 4:12, TNM). Anashii pikirajüle püchonnii süpüla nayaawatüin saaʼu tü kasa mapüleekat suluʼujee tü Wiwüliakat. Süpüla sujutuuin suluʼu naaʼin tü pütchikat, paainja tü naainjapuʼukat Jesuu wanaa sümaa nikirajapuʼuin na nikirajüinkana. Anuu sukuwaʼipainjatka putuma: püsakira naya, jülüja paaʼin nanüiki nasouktapa shiʼipajee tü püsakirakalü anain naya otta pikiraja naya sünain tü kasa nnojotkat nayaawatüin aaʼu. ( Paashajeʼera Lucas 24:15-19, 27, 32.)
Eesü süpüla paashajeʼerüin namüin suluʼujee tü Wiwüliakat tü naainjakat Maleiwa napüleerua na wayuu aikana nüpüla. Paainjüle tia, neʼraajeerü nukuwaʼipa chi Maleiwakai otta aijeechi nia napüla. Suluʼu www.jw.org /es puusüteerü anain waneeirua kasa akaaliinjeechika pia süpüla pikirajüin püchonnii. ( Paashajeʼera 2 Timoteo 3:16.)