Tü outkajawaakat eere Sotuin Waaʼin ouktüin Jesuu waaʼu

1, 2. ¿Kasa naainjaka Jesuu 14 nisán soʼu juyaka 33? (Piirakaa sümüin tü ayaakuaakat.)

SIRAASHI chi Kashikai chaa Jerusalén 14 nisán soʼu juyaka 33. Eejachi Jesuu namaa na aluwataaushiikana sünain tü Pascuakat. Naainjüin tia miʼiraakat na judíokana shikiira joo shikeraajüin 1.500 juya süchikijee taashin naya nutuma Jeʼwaa chaa Egiptojee. Shiasaʼa soʼuleʼeya aikat tia, nüikkaleʼerüin Jesuu sukuwaʼipa wanee miʼiraa jeket namaa na polookana waneemüin aluwataaushii waneepiakana nümaa. Na nikirajüinkana Jesuu ayatüinjatü naainjüin tia miʼiraakat juyawai süpüla sotuin naaʼin ouktüin Jesuu naaʼu (Mat. 26:1, 2).

² Süpülapünaa naainjüin Jesuu tia miʼiraakat namaa na nikirajüinkana, oʼuraajüshi nia. Süchikijee, nülatitka tü pan maʼakasatkat soolojia namüin na aluwataaushiikana sünain nümüin namüin: «Jaapaa jikaiwa tü pankat». Shiasaʼa mapa, naapaakalaka joo wanee iita kaluʼukat wiino sünain naapüin analuʼut nümüin Jeʼwaa saaʼu tia. «Anakaja müleka jüsüle jüpüshua waneʼewai jukua süpüshi tü asüüshikat», nümaka namüin na aluwataaushiikana (Mat. 26:26, 27). Tü pankat jee tü wiinokot, shiyaawasesü neʼe nutuma Jesuu süpüla nüküjüin namüin na aluwataaushiikana naapajiraainjachin nikii. Wainma kasa nikirajakalü anain naya Jesuu soʼu aikat tia.

3. ¿Jarat tü pütchi wekirajaainjatkalü anain?

³ Tü keeʼireekat naaʼin Jesuu shia nashatüinjatüin na nikirajüinkana tia outkajawaakat süpüla sotuinjatüin naaʼin ouktüin nia saaʼu saainjala wayuu süpüshuaʼa. Naainjawalinjatü tia juyawai. Tia miʼiraa nüikkaleʼerakat akuwaʼipa Jesuu soʼu aikat tia, Ekawaa aipaʼajatka nutuma chi Senyotkai münüsü (1 Cor. 11:20). Maaʼulu yaa, shiaitpa tü outkajawaakat eere Sotuin Waaʼin ouktüin Jesuu waaʼu. Anuu tü wekirajaainjatkalü anain jooluʼu: ¿Jamüsü sotuinjatka waaʼin ouktüin Jesuu waaʼu? ¿Kasa kayaawaseka tü pankat jee tü wiinokot? ¿Kasa waaʼinrajatka süpüla yapainjanain waya süpüla tü outkajawaakat eere Sotuin Waaʼin ouktüin Jesuu waaʼu? ¿Jaralii eküinjanaka tü pankat jee asüinjanaka tü wiino alatinnakat sünain tia outkajawaakat? ¿Kasa waaʼinrajatka süpüla weeʼiyatüin nümüin Maleiwa sünain kojutüin wamüin katüinjatüin woʼu waneepia nutuma?

SOTUINJATÜ WAAʼIN OUKTÜIN JESUU WAAʼU

4. ¿Kasa anasü eeka sutuma naapajiraain nikii Jesuu waaʼu?

⁴ Sutuma kaainjalain Adán nuulia Maleiwa, kaainjalasü wayuu süpüshuaʼa jee ouktüsü wayuu süpüshuaʼa (Roma 5:12). Shiasaʼa süpüla taashinjanain waya suulia kaainjalaa jee suulia ouktaa, choʼujaasü suwalaajünüin nümüin Maleiwa tü waainjalakat. Nnojoitpejeʼe jaralin ountüin nuwalaajüin tia nümüin Maleiwa saaʼu kaainjalain wayuu süpüshuaʼa (Sal. 49:6-9). Akaisaʼa Jesuu, nuuntüin tia süka maainjalain nia, müshijeseʼe naapajiraain nikii süpüla ouktaa saaʼu waainjala. Sutuma naainjüin tia Jesuu, eesü süpüla sülatinnüin woulia tü waainjalakat, eeshii süpüla nnojoliin ouktüin waya jee eesü süpüla katüin woʼuyaa (Roma 6:23, TNM; 1 Cor. 15:21, 22).

5. (1) ¿Jamüsü watüjaaka saaʼu alin wayuu süpüshuaʼa nüpüla Jeʼwaa otta nüpüla Jesuu? (2) ¿Jamüshii woʼunajanaka sünain tü outkajawaakat eere Sotuin Waaʼin ouktüin Jesuu waaʼu?

⁵ Niiʼiyatüin Jeʼwaa sünain alin maʼin wayuu nüpüla. Naapüinjeseʼe chi waneeshikai Nüchon süpüla taashinjanain waya suulia kaainjalaa jee suulia ouktaa (Juan 3:16, TNM). Jee müshia Jesuu, chi waneeshikai Nüchon Jeʼwaa, nnojoishi ayouktajaain suulia aapaa nikii saaʼu wayuu. Aitüjülia neʼe wayuu nüpüla Jesuu süpülapünaa nüntüin yaa Mmapaʼamüin (Prov. 8:30, 31). ¡Waapashaatain analuʼut nümüin Jeʼwaa jee nümüin Jesuu saaʼu tü naainjakat wapüleerua! Müshiijeseʼe woʼunüin juyawai sünain tü outkajawaakat eere Sotuin Waaʼin ouktüin Jesuu waaʼu. Woonoo amaalü tü nümakat Jesuu, tü makat mayaa: «Tü waaʼinrakat jooluʼu, süpülajatü jaaʼinrüin waneepia süpüla sotüinjachin jaaʼin taya» (1 Cor. 11:23-25).

TÜ PANKAT JEE TÜ WIINOKOT

6. ¿Kasa kayaawaseka naashin Jesuu tü pankat jee tü wiinokot?

⁶ Soʼu tü ai nikaakalü oʼu Jesuu namaa na aluwataaushiikana, nüküjüin namüin kasain kayaawasein tü pankat jee tü wiinokot. Anuu nünüiki: «Maa aka taapüin jooluʼu jümüin tü pankat, meechia taya sünain aapajiraain tekii jaaʼu jiakana». Shiasaʼa süchikijee nümaka süchiki tü wiinokot: «Asüüshikat tüü, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma» (Mar. 14:22-24). Tü pankat jee tü wiinokot, shiyaawase neʼe tü naainjüinjatkat Jesuu.

7. ¿Kasa kayaawaseka tü pan alatinnakat sünain tü outkajawaa waainjakat juyawai?

⁷ Tü pan nülatitkat Jesuu namüin na nikirajüinkana soʼu tü ai nikaakalü oʼu namaa, shia tü apütaakat süchikijee tü Pascuakat. Maʼakasat shia tü soolojiakat pan (Éx. 12:8). Suluʼu tü Wiwüliakat, tü soolojiakat pan shiyaawasesü kaainjalaa (Mat. 16:6, 11, 12; Luc. 12:1). Tü pan maʼakasatkat soolojia, shiyaawasesü maainjalain Jesuu (Heb. 7:26). Müsüjeseʼe maʼakain soolojia tü pan alatinnakat sünain tü outkajawaa waainjakat juyawai.

8. ¿Kasa kayaawaseka tü wiino alatinnakat sünain tü outkajawaakat eere Sotuin Waaʼin ouktüin Jesuu waaʼu?

⁸ Tü wiino naapakat Jesuu namüin na aluwataaushiikana soʼu tü ai nekaakalü oʼu, shiyaawasesü tü nüsha amülainjatkat. Müsia neʼe maaʼulu tü wiino alatinnakat sünain tü outkajawaakat eere Sotuin Waaʼin ouktüin Jesuu waaʼu, shiyaawasesü tü nüsha amülakat. Ouktüshi Jesuu saaʼu wanee «wutai kanüliasü Gólgota», kaʼyatüsü suulia Jerusalén. Naapüin nikii «süpüla sülatinnajatüin saainjala wayuu süpüshua» (Mat. 26:28; 27:33). ¿Kasaka waaʼinrüinjatüin süpüla weeʼiyatüin sünain kojutüin wamüin tü naainjakat Jesuu? Yapainjana waya süpüla oʼunaa sünain tü outkajawaakat eere Sotuin Waaʼin ouktüin Jesuu waaʼu. Wekirajaa sünain tü waaʼinrajatkat süpüla yapainjanain waya süpüla tia outkajawaakat.

YAPA WAYA SÜPÜLA TIA OUTKAJAWAAKAT

9. (1) ¿Jamüshii waashajeʼerüinjanaka süchiki tü naainjakat Jesuu süpülapünaa naapajiraain nikii? (2) ¿Jamüsü paaʼin sutuma naapajiraain nikii Jesuu paaʼu?

⁹ Süpüla yapainjanain waya süpüla tia outkajawaakat, waashajeʼerüinjatü suluʼu tü Wiwüliakat süchiki tü naainjakat Jesuu süpülapünaa naapajiraain nikii. Tia wetsiikulokalüirua sünainsü shia tü karalouktakat Pikirajaa waneepia sünain tü Nüchikimaajatkat Maleiwa.a Choʼujaasü maʼin waashajeʼerüin tia pütchikat. Süka jamüin, sükaaliinjain waya süpüla jülüjüinjatüin waaʼin jameerüin wakuwaʼipa waneʼewai wakua sutuma naapajiraain nikii Jesuu waaʼu. Waaʼinrüle tia, yapeena waya süpüla tia outkajawaakat. Anuu sünüiki wanee wawala: «Waʼatapajashaatain sükalia tü outkajawaakat eere Sotuin Waaʼin ouktüin Jesuu waaʼu. Ana ana müsü shiʼipaʼaya juyawai tia outkajawaakat». Saashin tia wawalakat, sutuma suʼunüin sünain tia outkajawaakat, sütüjaaitpa aaʼu süpüshuaʼa tü pütchi sümakat tü Wiwüliakat sünain naakajirüin waya Maleiwa nükajee Jesuu. Otta müsia, sütüjaaitpa aaʼu tü wawalakat jamüinjatüin sünüiki sümüin wayuu shikirajapa naya sünain tia pütchikalüirua. Shiasaʼa süchikijee ouktüin chi süshikai tü wawalakat, kojutüleeitpa maʼin sümüin naapajiraain nikii Jesuu waaʼu. Süka jamüin, sütüjaain saaʼu susoʼiraajeerüin saaʼin wayuu sutuma naapajiraain nikii Jesuu. Anasü saaʼin tü wawalakat sutuma sütüjaaitpain saaʼu tia.

10. ¿Jarat wanee sukuwaʼipa süpüla yapainjanain waya süpüla tü outkajawaakat eere Sotuin Waaʼin ouktüin Jesuu waaʼu?

¹⁰ Wanee sukuwaʼipa süpüla yapainjanain waya süpüla tia outkajawaakat, shia waküjüle maʼin pütchi suʼunnaa tia. Eeshii süpüla pürekutsoolüin aaʼusiliaat waya. Waainjüle tia, wainmeena na wayuu wounejaakana sünain tia outkajawaakat. Jee müshiʼiya, talateena maʼin waya saaʼu waküjüin pütchi nüchiki Maleiwa, nüchiki Jesuu otta süchiki katüinjatüin soʼu wayuu waneepia yaa saaʼu mmakat jee shiale chaa iipünaa (Sal. 148:12, 13).

11. ¿Jamüsü nüküjaka Pablo mojutayaain namüin waneeinnua anoujashii ekaa tü pankat jee asaa tü wiinokot?

¹¹ Jülüjüinjatü waaʼin tü nümakat Pablo namüin na anoujashii chejeʼewaliikana Corinto (paashajeʼera 1 Corinto 11:27-34). Naashin Pablo, chi anoujashi eekai niküin tü pankat otta nüsüin tü wiinokot sümaa mojutüyaain shia nümüin, shia mojutüka nümüin «nukuaippa Cristo sünain ouktaa». Jee müsia mojutsat nümüin «tü nüshakat» Jesuu amülaka. Jamüshijaʼa naainjüle kasa mojusü wanee anoujashi chainjachikai chaa iipünaa sümaa ayatataain nia sünain niküin tü pankat jee nüsüin tü wiinokot, süsaleechi tia naashin Pablo. Wainma anoujashii chejeʼewalii Corinto aainjaka kasa mojusü. Eeshii eekai natunkeein aaʼin sünain tü Ekawaa aipaʼajatkat nutuma chi Senyotkai. Süka jamüin, emirain naya nepialuʼujee jee shiale sutuma wainmaleein neküin otta nasüin sünain tia outkajawaakat. Sutuma müin naainjala, neeʼiyatüin sünain mojutüin namüin tü outkajawaakat eere Sotuin Waaʼin ouktüin Jesuu waaʼu. Müsüjeseʼe nnojoluin anain nümüin Maleiwa neküinjanain tü pankat jee nasüinjanain tü wiinokot naya anoujashiikana.

12. (1) ¿Kasa wanaawaka amaa tü outkajawaakat eere Sotuin Waaʼin ouktüin Jesuu waaʼu naashin Pablo? (2) ¿Jamüsü nünüiki Pablo namüin na wayuu ounejaanakana sünain tia outkajawaakat? (3) Kaainjarale wanee anoujashi eekai niküin tü pankat jee nüsüin tü wiinokot, ¿kasa naaʼinrajatka?

¹² Naashin Pablo, tü outkajawaakat eere Sotuin Waaʼin ouktüin Jesuu waaʼu müsü aka saaʼin wanee ekawaa ounejaanakalü anain wayuu. Anuu nünüiki Pablo namüin na wayuu ounejaanakana sünain tia outkajawaakat: «Müleka jiküle tü aapuushikat sümüin tü yolujaakalüirua, je jüsüle tü asünakat wanaa sümaa naʼwaajüin tü namaleiwaseyaasükalüirua, ¿jamataaleerü süpüla wanaawajiraain jaaʼin nümaa Cristo wanaa sümaa jutkatüin jia sünain ekaa tü pankat je asaa tü asüüshikat osoʼijitkat waaʼin sünain tü naaʼinrakat waaʼujee?» (1 Cor. 10:16-21). Müleka kaainjarale wanee anoujashi eekai niküin tü pankat jee nüsüin tü wiinokot sünain tia outkajawaakat, acheküsü nüküjüinjatüin shia namüin na laülaashiikana suluʼu tü outkajaaleekat (paashajeʼera Santiago 5:14-16). Shiasaʼa niyaawajaale suulia naainjala, eeshi süpüla niküin tü pankat jee nüsüin tü wiinokot sünain tü outkajawaakat eere sotuin waaʼin ouktüin Jesuu waaʼu. Müle shia nutuma, nnojoleerü mojutüyaain nümüin tü naainjakat Jesuu wapüleerua (Luc. 3:8).

13. ¿Jamüsü anaka woʼuraajüle otta jülüjüle waaʼin müleka keeʼireere naaʼin Maleiwa chainjanain waya chaa iipünaa jee yaainjanale waya yaa Mmapaʼa?

¹³ Süpülapünaa süntüin sükalia tü outkajawaakat eere Sotuin Waaʼin ouktüin Jesuu waaʼu, oʼuraajüinjana waya otta jülüjüinjatü waaʼin müleka keeʼireere naaʼin Maleiwa chainjanain waya chaa iipünaa jee yaainjanale waya yaa Mmapaʼa. Kojutüinjatü wamüin tü naainjakat Jesuu wapüleerua. Müshiijeseʼe nnojoliinjanain weküin tü pankat jee wasüin tü wiinokot müleka nnojorüle watüjaain maʼin saaʼu chainjanale waya chaa iipünaa. ¿Jaralii eküinjanaka tü pankat jee asüinjanaka tü wiinokot?

¿JARALII EKÜINJANAKA TÜ PANKAT JEE ASÜINJANAKA TÜ WIINOKOT?

14. ¿Kasa naainjaka na anoujashii chainjanakana chaa iipünaa suʼunnaa tü outkajawaakat eere Sotuin Waaʼin ouktüin Jesuu waaʼu?

¹⁴ Sümaiwa paala, nüpansaajüin Jeʼwaa wanee pütchi namaa na israeliitakana. Tia, shia tü Pütchi naapakat Jeʼwaa nümüin Moisés. Nüküjapejeʼe Jeʼwaa nüpansaajüinjatüin wanee pütchi Jeket (paashajeʼera Jeremías 31:31-34). Soʼu tü ai nikaakalü oʼu Jesuu namaa na aluwataaushiikana, anuu nünüiki namüin süchiki tü wiinokot: «Asüüshikat tüü, anuu jüsüitpain jooluʼu, müsü aka sukuaippa tü tasha amülainjatkat süpüla nikeraajüinjatüin chi Maleiwakai tü pütchi jeket pansaatüjütkalia nütüma» (1 Cor. 11:25). Pütchikat tia, nüpansaajüin Jeʼwaa namaa na anoujashii chainjanakana chaa iipünaa (Gal. 6:15, 16). Ekeraajüsü tia pütchikat sükajee amülain nüsha Jesuu (Luc. 22:20). Nia nuluwataaka Jeʼwaa Jesuu süpüla nüküjüinjatüin tia pütchikat namüin na anoujashii chainjanakana chaa iipünaa (Heb. 8:6; 9:15). Jee müsia, natüjaa aaʼu nayain nüpansaajüin amaa Jeʼwaa tü pütchi jeket pansaatüjütkalia. Müshiijeseʼe neküin tü pankat jee nasüin tü wiino alatinnakat sünain tü outkajawaakat eere Sotuin Waaʼin ouktüin Jesuu waaʼu.

15. (1) ¿Jaralii na kamüinjanakana tü pütchi nüpansaajakat Jesuu? (2) ¿Kasa naainjüinjatka naya anoujashiikana chaa iipünaa müleka waneepiale naya nümaa Jesuu?

¹⁵ Natüjaa aaʼu na anoujashii chainjanakana chaa iipünaa, namüinjatüin tü pütchi nüpansaajakat Jesuu namaa na Aluwataainjanakana nümaa (paashajeʼera Lucas 12:32, TNM). Nüpansaajüin Jesuu tia pütchikat namaa na anoujashii waneepiakana nümaa jee na eʼrakana müliaa wanaa nümaa (Filip. 3:10). Akaʼaya na anoujashii chainjanakana chaa iipünaa eeyüliikana maaʼulu, sünainpünaashii tia pütchi nüpansaajakat Jesuu. Aluwataainjana naya süpüla kaʼikat süpüshuaʼa wanaa nümaa Jesuu (Alat. Map. 22:5, TNM). Müshiijeseʼe eein süpüla neküin tü pankat jee nasüin tü wiino alatinnakat sünain tü outkajawaakat eere Sotuin Waaʼin ouktüin Jesuu waaʼu.

16. Püküja kasain wayuu saashajaain achiki Roma 8:15-17.

¹⁶ Wanee kasa natüjaaka aaʼu na anoujashii chainjanakana chaa iipünaa, shia nüchoin naya Maleiwa. Shiasaʼa sutuma tia, neküin tü pankat jee nasüin tü wiino alatinnakat sünain tü outkajawaakat eere Sotuin Waaʼin ouktüin Jesuu waaʼu (paashajeʼera Roma 8:15-17, TNM). Naashin Pablo, «¡Abba, Taata!» müshii naya anoujashiikana nümüin Maleiwa. Abba, shia wanee pütchi arameo. «Papaa» otta «taata», maluʼulu shia. Sükajee müin nanüiki nümüin Maleiwa na anoujashii chainjanakana chaa iipünaa, weʼrüin aijiraain maʼin naya nümaa Maleiwa süchikijee nüneeküin naya süpüla nüchoinjanain. Natüjaa aaʼu naya anoujashiikana sünain shiimain nüchoin naya süka nükaaliinjain naya chi naaʼinkai Maleiwa sünain ayaawataa saaʼu tia. Mayaapejeʼe anashiin namüin kepiaa yaa saaʼu tü Mmakat, natüjaa aaʼu chainjanain naya aluwataain nümaa Jesuu chaa iipünaa müleka waneepiale naya nümaa Jeʼwaa. Natüjaa aaʼu naya anoujashiikana niain aneeküin naya Jeʼwaa süpüla oʼunaa chaa iipünaa otta natüjaa aaʼu wulein nukuwaʼipa Jeʼwaa. Maaʼutpünaa yaa, palitchon na anoujashii chainjanakana chaa iipünaa yaayüliikana yaa Mmapaʼa (1 Juan 2:20, TNM; Alat. Map. 14:1). Paaʼinwajiraashii maʼin naya nümaa Jeʼwaa, müshiijeseʼe «¡Abba, Taata!», namüin nümüin Jeʼwaa.

KOJUTÜ WAMÜIN KATÜINJATÜIN WOʼU WANEEPIA

17. (1) ¿Kasa nüneekaka apüla Jeʼwaa waneeinnua anoujashii? (2) ¿Jamüsü natüjaaka saaʼu chainjanain naya chaa iipünaa?

¹⁷ Eeshii anoujashii nüneekaka Maleiwa süpüla chainjanain naya chaa iipünaa. Nüneeküle pia Maleiwa süpüla chainjachin pia chaa iipünaa, aashajaʼawaishi pia süchiki tia puʼuraajapa. Shiasaʼa paashajeʼerapa tü Wiwüliakat, eejeerü waneeirua pütchi eekai müin pümüinjatkai saaʼin. Jamüsüjaʼa paashajeʼerapa suluʼu tü Wiwüliakat saʼaniraainjatüin nukuwaʼipa Jesuu sümaa wanee jierü aʼanaaushikat nüpüla, pütüjaa aaʼu nayain saashajaain achiki na anoujashii chainjanakana chaa iipünaa otta pünainpünaasü tia pütchikat. Makalaka keeʼireein paaʼin shikeraajüinjatüin tia (Juan 3:27-29; 2 Cor. 11:2; Alat. Map. 21:2, 9-14, TNM). Saashajaale tü Wiwüliakat süchiki alin nüpüla Maleiwa na anoujashii chainjanakana chaa iipünaa, pütüjaa aaʼu pümüinjatüin piakai tia pütchikat. Müleka shiale saashajaain achiki tü nuluwataakalü anain Jeʼwaa na anoujashii chainjanakana chaa iipünaa, nükaaliinjain pia chi naaʼinkai Maleiwa süpüla poonoomaatüin sümaa tia pütchikat süka «tamüinjatü tayakai tü pütchikat», pümüin suluʼu paaʼin. Nükaaliinjain pia chi naaʼinkai Maleiwa süpüla piyaawatüin saaʼu keeʼireein naaʼin Maleiwa chainjachin pia chaa iipünaa.

18. (1) ¿Jameerü nakuwaʼipa nutuma Maleiwa na wanee anoujashiikana? (2) ¿Jamüsü naaʼin naya anoujashiikana sutuma tü naʼatapajakat nutuma Jeʼwaa?

¹⁸ Na wanee anoujashiikana, katüinjatü noʼu waneepia nutuma Maleiwa yaa saaʼu tü Mmakat paʼaraiisüpa shia (Alat. Map. 7:9; Juan 10:16). Piale wanee anoujashi aʼatapajakai katüin poʼu waneepia yaa saaʼu tü Mmakat, talatüsü maʼin paaʼin wanaa sümaa paashajeʼerüin suluʼu tü Wiwüliakat süchiki tü Paʼaraiisükat. Keeʼireeshaatasü paaʼin yaain pia sümaa püpüshi jee paʼaleewainyuu saaʼu tü Mmakat sümaa jimatüin paaʼin. Keeʼireeshaatasü paaʼin najaʼttirüin Maleiwa tü jamükat, tü müliaakat, tü ayuuliikat jee tü ouktaakat (Sal. 37:10, 11, 29; 67:6; 72:7, 16; Is. 33:24). Piʼreein maʼin na püpüshi ouktakana sünain süsoʼiraain naaʼin nachikuaʼa (Juan 5:28, 29). Talatüshi maʼin pia nümaa Jeʼwaa saaʼu anain maʼin tü paʼatapajakat nutuma otta saaʼu naapüin nikii Jesuu waaʼu. Müshijeseʼe puʼunüin sünain tü outkajawaakat eere Sotuin Waaʼin ouktüin Jesuu waaʼu, jaʼitaichi nnojoluin piküin tü pankat jee püsüin tü wiinokot.

¿CHEEICHE PIA SÜNAIN TIA OUTKAJAWAAKAT?

19, 20. (1) ¿Kasa waaʼinrajatka süpüla katüinjatüin woʼu süpüla kaʼikat süpüshuaʼa? (2) ¿Jamüshi puʼuneeka sünain tü outkajawaakat eere Sotuin Waaʼin ouktüin Jesuu waaʼu?

¹⁹ Eesü süpüla katüin soʼu wayuu süpüla kaʼikat süpüshuaʼa. Eeshii na chainjanakana chaa iipünaa jee na yaainjanakana yaa mmapaʼa. ¿Kasa waaʼinrajatka süpüla katüinjatüin woʼu süpüla kaʼikat süpüshuaʼa? Kanoulainjana waya nünain Jeʼwaa, nünain Jesuu otta wanoujüinjatü sünain nikeraajeerüin Jeʼwaa tü naainjüinjatkat sutuma naapajiraain nikii Jesuu waaʼu. Suʼunnaa tü outkajawaakat eere Sotuin Waaʼin ouktüin Jesuu waaʼu, jülüja waaʼin tü naainjüinjatkat Maleiwa wapüleerua waneʼewai wakua otta jülüja waaʼin aneerüin maʼin wakuwaʼipa sutuma naapajiraain nikii Jesuu waaʼu. Sünain tia outkajawaakat, watteerü maʼin saalii wayuu. Aainjüneerü tia aaʼuriiroʼu 3 soʼu juyaka 2015. Oʼtteerü tia outkajawaakat süchikijee nikerotüin chi Kaʼikai. Aainjüneerü tia suluʼu tü Piichi outkajaaleekat jee suluʼu waneeirua piichi.

²⁰ Puʼunüle sünain tü outkajawaakat eere Sotuin Waaʼin ouktüin Jesuu waaʼu, kooʼomüinjeerü pümüin sujutü tü naainjakat Jesuu. Müleka jülüjüle waaʼin tü pütchi aküjünajatkat sünain tia outkajawaakat, keeʼireejeerü waaʼin weeʼiyatüin sünain alin wayuu wapüla. Waküjeerü sümüin wayuu süchiki tü naainjakat Jeʼwaa süpüla niiʼiyatüin saaliin wayuu nüpüla otta waküjeerü namüin süchiki tü naainjüinjatkat Jeʼwaa süpüleerua wayuu (Mat. 22:34-40). Sutuma tia, anashii woʼunüle sünain tü outkajawaakat eere Sotuin Waaʼin ouktüin Jesuu waaʼu.