PÜTCHI SÜNAINKA SÜTA TÜ REWIISÜTAKAT | ¿PÜTÜJAWEE AAʼU KASAIN SHIKIRAJÜIN ANAIN TÜ WIWÜLIAKAT?

Süpülajatü shikirajünüin wayuu süpüshuaʼa

Eʼnnaajünüshii waya aküjüliikana pütchi nüchiki Jeʼwaa sünainjee waküjüin tü pütchi nüchikikat Maleiwa. Jee müsia sünainjee wekirajüin wayuu sünain tü Wiwüliakat sainküin mmaka süpüshuaʼa.

Soʼu juyaka 2014, alatüshii suulia 9.500.000 wayuu ekirajünaka sünain tü Wiwüliakat, nekirajüin naya na 8.000.000 aküjüliikana pütchi. Naainjain tia suluʼu 240 mma.a Watta maʼin naalii wayuu ekirajaaka wamaa sünain tü Wiwüliakat sainküin mmakat süpüshuaʼa.

Süpüla wountüin wekirajüin naya wayuukana sünain tü Wiwüliakat, weʼinprimiijüin maʼaka 1.500 miyoone karalouktairua, maʼaka saaʼin Wiwülia, rewiisüta otta poyeeto. Eesü tia karalouktakalüirua suluʼu 700 anüikii. Süka waainjain tia, eeshi süpüla nikirajaain wanee wayuu wamaa suluʼu tü anüikii naashajaakalü aluʼu.

«Mamalainpuʼusat tamüin ekirajawaa sünain tü Wiwüliakat, aluʼusaʼa jooluʼu kamalainsü tamüin. Anashi taya sutuma tü tekirajaakalü anain.» (Katlego, Sudáfrica)

«Aküjünüsü tamüin süpüshuaʼa tü tasakitkalü anain, wainma maʼin tü kasa ekirajünakalü anain taya.» (Berta, México)

«Ekirajünüshi taya tepialuʼu soʼu tü oora anashiikat oʼu tamüin. ¡Anashaatasü maʼin tü naainjakat tapüleerua!» (Eziquiel, Brasil)

«Nekirajüin taya soʼu 15 minuuto jee shiale 30 minuuto; eesü sülataleere suulia tia. Tayapejeʼe aneeküin jeʼrainjatüin minuuto tekirajünaka oʼu.» (Viniana, Australia)

«¡Nnojoishii achekajüin saaʼu nekirajüin taya, ponoshootosü taaʼin tia!» (Aimé, Benín)

«Kamaneesü maʼin tü wayuu ekirajakat taya otta nnojotsü süshapajeʼerüin taya sünain ekirajawaa. Aleewasü maʼin taya sümaa.» (Karen, Irlanda del Norte)

«Wainma wayuu nekirajaka na aküjüliikana pütchi nüchiki Jeʼwaa, nnojoliipejeʼe anoujain naya napüshuaʼa mapa.» (Denton, Inglaterra)

SÜSAKIRAWAIKA ANAIN WAYUU SÜCHIKI TÜ EKIRAJAWAAKAT SÜNAIN TÜ WIWÜLIAKAT.

¿Kasa shikirajaka anain wayuu?

Wekirajüin naya sünain tü sümakat tü Wiwüliakat süchiki wanee kasa. Jamüshiijaʼa nekirajaweere sünain tü sümakat tü Wiwüliakat nüchiki Maleiwa, wekirajüin naya sünain tü nukuwaʼipakat, kasaichin nünülia, jalain kepiain nia otta tü naainjüinjatkat süpüla naʼaleewainjanain naya Maleiwa. Jee müsia wekirajüin naya süpüla nachajaain suluʼujee tü Wiwüliakat tü sümakat süchiki tü nasakitkalü anain.

Wekirajüin na wayuukana sükajee tü karalouktakat ¿Kasa shikirajaka maʼin tü Wiwüliakat?b Sükaaliinjeena tia karalouktakat süpüla nayaawatüin saaʼu tü kasa mapüleechonkat suluʼujee tü Wiwüliakat. Suluʼu tü karalouktakat, eesü waneeirua ekirajaaya aashajaaka nüchiki Maleiwa, nüchiki Jesukürisüto, jamüin müliaka wayuu, süchiki katüinjatüin noʼu nachikuaʼa na ouktüshiikana, süchiki tü oʼuraajaakat jee müsia waneeirua kasa.

¿Jalawaishi otta joujawaishi jikirajüin wanee wayuu?

Nüneeküinjatü chi wayuukai jalainjachin otta joujawalinjachin nikirajünüin.

¿Jeʼra jümaʼa sünain ekirajaa wanee wayuu?

Nüneeküinjatü chi wayuukai nikirajaweere wanee oora jee sülatüle suulia tia. Ekirajünüshi nia uatua semaanawai. Wekirajeechi pia soʼu tü minuuto anashiikat oʼu pümüin. Eeshi eekai nikirajaain soʼu 10 minuuto jee shiale soʼu 15 minuuto.

¿Jeʼraka jüchekajüin nümüin wanee wayuu saaʼu jikirajüin nia?

Nnojoleena waya achekajüin pümüin saaʼujee wekirajüin pia jee wasülajeerü pümüin tü karaloukta wekirajeechikalü aka pia. «Anakaja müleka nnojorule jüchuntüin awalaajünaa saaʼu tü kasa anasü jaaʼinrakat sümüin wayuu», müshi Jesuu namüin na nikirajüinkana (Mateo 10:8).

¿Jeʼra kaʼi jia sünain ekirajaa wanee wayuu?

Eepünaale pücheküin piakai. 19 ekirajaaya eeka suluʼu tü karalouktakat ¿Kasa shikirajaka maʼin tü Wiwüliakat? Nnojoleechi washapajeʼerüin pia sünain ekirajawaa.

¿Choʼujaashiche nunoujain chi jikirajüinkai wanaa jümaa?

Nnojo, niainjachin chi wayuukai aneekaka nümüiwaʼa nikerotüinjachire wamaa sünain anoujaa. Nütüjaale saaʼu tü sümakat tü Wiwüliakat, sükaaliinjeechi nia süpüla naaʼinrüin tü kasa anasükat.

¿Kasa taainjüinjatka süpüla tatüjaainjatüin saaʼu tü jaainjakat?

Pikerotüle suluʼu jw.org puusüteerü anain karalouktairua aashajaaka süchiki tü wanoujakalü anain otta süchiki tü waʼyataainkat nümüin Maleiwa.

¿Kasa taainjüinjatka süpüla jikirajüinjachin taya?

Pipiraja eere «püchunta ekirajawaa sünain tü Wiwüliakat» sümüin suluʼu www.jw.org.
Puusüteerü waneeirua dirección suluʼu süpana 2 sünain rewiisütakat tüü.

a Eeshi süpüla nekirajüin pia pümüiwaʼa jee shiale namaa kojuya wayuu.

b Nakumajala na aküjüliikana pütchi nüchiki Jeʼwaa. Alatüsü suulia 230 miyoone karalouktairua eʼinprimiijuushika jee ashajünüsü suluʼu 260 anüikii.

ANOUKTAASÜ SUKUWAʼIPA WAYUU SÜMAA SÜPÜSHI SUTUMA TÜ WIWÜLIAKAT

«Wanaa sümaa shikirajaain taʼwayuuse sünain tü Wiwüliakat, anouktaasü maʼin tü sukuwaʼipakat. Ponusü maʼin taaʼin tü saainjakat wapüleerua, müshijeseʼe tekirajaain sünain tü Wiwüliakat. Anouktaasü maʼin tü takuwaʼipakat sutuma tekirajaain sünain tü Wiwüliakat otta paaʼinwashi taya sümaa taʼwayuuse jee namaa tachonnii sutuma.» (Eziquiel)

«Wanaa sümaa tayaawatüin saaʼu tü nümakat Maleiwa suluʼu tü Wiwüliakat, ooʼulaasü taya suulia akaijaa yüi, suulia asawaa jee suulia taashichijaʼawalin maʼin. Keisalaaipa taya sümüin tü tepiakat. Alinnapa maʼin tapüla na tapüshikana jee talatüsü maʼin taaʼin sünain aainjaa waneeirua kasa napüleerua.» (Karen)

«Wainma na wayuu mojushiikana amüin tekirajaain sünain tü Wiwüliakat. Nükaaliinjapajaʼa taya chi taʼwayuusekai süpüla ayatüinjatüin taya sünain ekirajawaa. ‹Nnojo poonooin sümaa sünüiki wayuu, anuʼusa anaitpain maʼin pukuwaʼipa sutuma pikirajaain sünain tü Wiwüliakat. Ayataʼaya pia sünain ekirajawaa›, maʼwaishi nia tamüin. Anaitpa maʼin takuwaʼipa sümaa tapüshi maaʼulu.» (Viniana)