Süchiki wanee karaloukta kojutüsü maʼin

Naata maʼin tü Wiwüliakat suulia tü wanee karalouktairua aashajaaka süchiki anoujaa. Kakaliairü maʼin sünainpünaain sukuwaʼipa sunoula wayuu. Akaʼaya shia, ekirajaana maʼin achiirua otta wattairü saalii pütchi mojusü süchiki.

Naashin noʼutku na atüjakana süpüleerua Wiwülia, nnojotsü wanaawain tü sümakat tü Wiwülia eekat maaʼulu sümaa tü sümaiwajatkat. «Eeyaai neʼe watüjaain saaʼu wanaawale watuma sünüiki tü Wiwülia eekat maaʼulu sümaa tü sümaiwajatkat, watta saalii pütchi mojuka. Ashajünüsü tia Wiwüliakalüirua kakalia mapa süchikijee tü ashajünatüjütkalia aluʼu tü pütchikat. Watta maʼin saalii tü nnojotkat pansaain sümaa tü pütchi sümaiwajatkat», müshi wanee wayuu ekirajaakai sünain sukuwaʼipa tü anoujaakat.

Eetaashii na nnojoliikana anoujain sünain shiimain tü Wiwüliakat sutuma tü ekirajünakalü anain naya tepichijaiwaʼaya naya. Jamüshijaʼa Faizal, müleʼushi saʼaka wayuu manoujainkat nünain Jesuu. Ekirajünüshi nia sünain nümaʼanajeejatüin Maleiwa tü Wiwüliakat otta ekirajünüshi nia sünain suʼwanajaanüin waneeirua pütchi suluʼu. Sutuma nikirajünüin Faizal sünain tia, nnojotsü nunoujain nanüiki na aashajaweekana nümaa süchiki tü Wiwüliakat. «Nnojotsü shiain tü Wiwülia shiimainsükat türa namaʼanakat, aʼwanajaanüsü sünüiki», mapuʼushi nia.

¿Mojuinjatche wamüin nnojoluin shiain wamaʼanain tü Wiwülia sümaiwajatkat? Jülüja paaʼin tüü: watta saalii kasa anashaatasü naainjüinjatka Maleiwa soʼu palit kaʼi saashin tü Wiwüliakat. «¿Shiimainchejeʼe süshajünüin tia suluʼu tü pütchi sümaiwajatkat?», pümajakuʼu pümüle, nnojoleerü punoujain tia (Roma 15:4). Nnojorüle pansaain tü Wiwülia eekat maaʼulu, nnojotsüjeʼe waashajeʼerüin shia süpüla watüjaain saaʼu tü waaʼinrajatkat waneeküinjanapa tü waʼyataainjatkalü anain, tü sünainpünaakat wapüshi otta tü sünainpünaakalü aʼwaajaa Maleiwa, ¿aashimüin?

Mayaapejeʼe nnojoluitpain tü pütchi sümaʼaleeiwajatkat, eeyülia waneeirua sukoopiain eeka süpüla wanaʼlaain otta wainma karaloukta sümaiwajatka aashajaakat süchiki tia. ¿Jamüsü eeyütka tü Wiwüliakat maaʼulu yaa sümaa jooin süpüla ajaʼtta tü ashajünakat aluʼu sümaʼaleiwaʼaya? ¿Jamüsü eeyütka shia sümaa wainmain na ajaʼlajeʼereekana shia sümaa eein na aʼwanajeekana sünüiki? ¿Jamüsü piʼitaajeetka maʼin paaʼin sünain tü Wiwüliakat pütüjaapa saaʼu tia? Pikirajaa sünain tia pütchikalüirua sünain tü wanee ekirajaayakat.