¿Anouktaajeetche pukuwaʼipa sutuma?

Tü Wiwüliakat nnojotsü müin aka saaʼin tü wanee karalouktakalüirua, nünüiki shia chi Kakumalakai kasakat süpüshuaʼa (2 Timoteo 3:16). Eesü süpüla shiiʼiranajaain pukuwaʼipa sutuma sünüiki tü Wiwüliakat. Müsü shia: «Waaʼinrüin tü kasa anasükat sutuma tü nünüikikat Maleiwa» (Hebreokana 4:12, TNM). Piamasü kasa sükaaliinjaka anain wanee wayuu tü Wiwüliakat: Süküjüin nümüin tü anakat süpüla naaʼinrüin otta sükaaliinjain nia süpüla niʼraajüin Maleiwa sümaa nütüjaain saaʼu tü naaʼinrajatkat mapeena (1 Timoteo 4:8; Santiago 4:8).

Anouktaasü nukuwaʼipa wayuu maaʼulu sutuma. Süküjüin tü Wiwüliakat tü anakat süpüla naaʼinrüin wanee wayuu jee süküjüin süchiki waneeirua kasaya.

• Tü pukuwaʼipainjatkat namaa na waneeinnua (Éfeso 4:31, 32; 5:22, 25, 28, 33).

• Tü paaʼinrajatkat süpüla nnojoluin ayuulin maʼin pia jee nnojoluin mojuin maʼin paaʼin (Salmo 37:8; Proverbios 17:22).

• Tü paaʼinrajatkat süpüla wulein pukuwaʼipa noʼuluʼu Jeʼwaa (1 Corinto 6:9, 10).

• Tü paaʼinrajatkat süpüla keʼepülinjachin pia (Proverbios 10:4; 28:19; Éfeso 4:28).a

Niʼrüin wanee wayuu otta müsia tü nuʼwayuusekat anashaatain maʼin tü pütchi sümakat tü Wiwüliakat. Chejeʼewalii naya Asia. Kasaatpa naya, kapüleesü namüin nekiralaain sünain tü nakuwaʼipakat otta nnojoishii naya aashajaain süka anaka akuwaʼipa. Shiasaʼa naaʼinraka tü sümakat tü Wiwüliakat. ¿Jamakaʼa nakuwaʼipa mapa? Anuu nünüiki Vicent, chi wayuu waküjakai achiki: «Sutuma tü taashajeʼerakat suluʼu tü Wiwüliakat, anajiraaichipa taya sümaa taʼwayuuse jee teeʼiyatüin tü saalinkat tapüla. Talatüshii maʼin waya sutuma waaʼinrüin tü sümakat tü Wiwüliakat». Anuu sünüiki Annalou, tü nuʼwayuusekat Vicent: «Anashaatasü wakuwaʼipa sutuma waashajeʼerüin nachiki na wayuu aküjünakana achiki suluʼu tü Wiwüliakat. Talatüsü taya nümaa chi taʼwayuusekai otta talatüsü taya sutuma wanaawain waaʼin».

Weʼraajüin chi Maleiwakai sutuma. Anuu sooʼomüin nünüiki Vicent: «Arütkaashi maʼin taya nünainmüin Jeʼwaa sutuma taashajeʼerüin tü Wiwüliakat». Eeshi süpüla piʼraajüin Maleiwa sükajee tü Wiwüliakat maʼaka naaʼin Vicent. Paashajeʼerüle shia, aneerü pukuwaʼipa otta aleeweechi pia nümaa Maleiwa. Jee müsia, pütüjaajeerü aaʼu saashajaain tü Wiwüliakat süchiki wanee anaa akuwaʼipa otta süchiki katüinjatüin soʼu wayuu waneepia yaa mmapaʼa soʼu palit kaʼi (1 Timoteo 6:19, TNM). Shia neʼe tü Wiwüliakat aashajaaka süchiki tia.

Puʼttüle sünain aashajeʼeraa tü Wiwüliakat jooluʼu otta pikiralaale sünain, anouktaajeerü pukuwaʼipa otta piʼraajeechi Maleiwa. Eesü püsakirüle sünain wainma kasa süchikijee paashajeʼerüin shia. Sülatüle pümüin tia, soto paaʼin sülatüin tia nümüin chi wayuu chejeʼewaikai Etiopía achuntünakai anülia suluʼu tü Wiwüliakat. Wainma kasa nütüjaweeka aaʼu wayuukai chia süchiki tü Nünüikikat Maleiwa. Wanaa sümaa nüsakirüin Felipe chia wayuukai niyaawatüle saaʼu tü naashajeʼerakat, müshi nia: «¿Jamakuaippalüinjatü süpüla tayaawatüin saaʼu, nnojolire eein wane wayuu aküjainjachikai tamüin sünain jamaluʼulüin?».b Nuuʼulaainjaʼa chi wayuukai nükaaliinjain nia Felipe. Atüjashi maʼin ekirajaa Felipe otta nikirajüin nia Jesuu (Aluwataaushikana 8:30, 31, 34). Akaataajaʼa piakai, piyaawateere aaʼu tü sümakat tü Wiwüliakat, pipiraja tü formulario suluʼukat jw.org jee shiale puluwataain wanee karaloukta eemüin tü dirección suluʼukat rewiisütakat tüü. Eeshi süpüla puchuntüin ekirajünaa nümüin wanee aküjüi pütchi nüchiki Jeʼwaa jee puʼunüle suluʼumüin tü Piichi eere noutkajaain. Anashi püchajaale wanee Wiwülia jooluʼuleʼeya otta puuʼulaa sunoukteʼerai pukuwaʼipa.