¿Jaralii saaʼin pümüin na pienchishiikana amaajuna?

Eweenuaashii na amaajunakana sümaa nooʼoyolijeʼerüin maʼin tü neʼejenakat. Maaʼatshii nojuʼinuwaakai aaʼin suluʼujee tü Wiwüliakat. Kasuutai chi palajachikai ama, jee chi naajuchikai nia wanee wayuu eiwaʼaikai aneekünaa süpüla aluwatawaa. Ishotoi chi ama sekai nüchiiruajee, niasaʼa chi naajuchikai, atkeʼetshii wayuu sainküin Mma süpüshuaʼa. Nüchiiruajee chii, seshi awataain wanee ama mütsiatai maʼin jee chi naajuchikai kajapüipashi wanee pesa. Otta aküjünüsü alinjatüin maʼin jamü. Jee müshia chi chiiruaajachikai ama, atsaanatai, alüʼüjüshi ayuulii jee ouktaa. Chi naajuchikai, shia tü Ouktaakat. «Oushikaasü nüchiiruajee» tü kanüliakat Hades, eere neʼitaanüin na ouktüshiikana. Wainma maʼin wayuu süsaapünaaka amaa (Alateetkat Mapeena [Apocalipsis] 6:1-8).

«Taashajeʼeraiwaʼaya nachiki na pienchishiikana amaajuna aküjünaka achikii suluʼu tü karalouktakat Apocalipsis, mmotshaatasü taya. Süsalamaatüinjatiaa taaʼinruʼu wayuu nutuma Maleiwa. ‹Ouktülejeʼe taya› tamaka» (Crystal).

«Kamalainpuʼusü tamüin aashajeʼeraa nachiki na pienchishiikana amaajuna, naatawaisü sünoʼu neʼejena. Tatüjaapa saaʼu kasain kayaawasein tia, tayaawata aaʼu shiimain shia» (Ed).

¿Jara wanaawaka amaa paaʼin? ¿Sümaa Crystal jee niataapa Ed? Wainma wayuu aashajeʼerüinnaka nachiki na pienchishiikana amaajuna jee tü neʼejenakalüirua, tü aküjünakalü achiki suluʼu Apocalipsis, tü kanüliakat Alateetkat Mapeena. Jalouijeerü pümüin piyaawatüle saaʼu tia aküjünakat nachiki na pienchishiikana amaajuna. Naashin Maleiwa, talateerü maʼin paaʼin paashajeʼerüle tü karalouktakat Alateetkat Mapeena, piyaawatüle jamaluʼuluin tü pütchi suluʼukat jee paaʼinrüle tü sümakat (Alateetkat Mapeena 1:1-3).

Eeshii wayuu eekai mmoluin naashajeʼerapa süchiki tia, nnojotpejeʼe shiimmolojiain wayuu tia makalü. Wainma wayuu katsüinka anoula sutuma natüjaain saaʼu kasain kayaawasein tia otta kaʼatapalashii naya kasa anasü. Meerü pukuwaʼipa pütüjaale saaʼu tia. Aküjünüsü sooʼomüin süchiki tia sünain tü wanee ekirajaayakat.