¿Kasa shikirajaka tü Wiwüliakat?

¿Sükaaliinjeeiche pia tü Wiwüliakat suulia shapawaa aaʼin?

Eeshii eekai namüin:

• «Aa»

• «Nnojo»

• «Eesüjaʼa süpüla müin»

¿Jamajaʼa saaʼin pümüin?

Tü sümakat tü Wiwüliakat

«Saaʼu jütüjaaichipain naaʼu Maleiwa sünain nuuntüin naaʼinmajüin jia, jüküja jümaala nümüin süpüshualeʼeya tü ashapataakat atüma jaaʼin» (1 Pedro 5:7). Saashin tü Wiwüliakat, eeshii süpüla nükaaliinjain waya Maleiwa suulia shapawaa aaʼin.

¿Kasa maa süküjaka tü Wiwüliakat?

• Woʼuraajüle nümüin Maleiwa, «aapüneerü wane anaa» wamüin nutuma otta jutateena waya suulia shapawaa aaʼin (Filipos 4:6, 7).

• Jee müsia, waashajeʼerüle tü Nünüikikat Maleiwa nnojoleerü shapaain maʼin waaʼin (Mateo 11:28-30).

¿Eejeetche wanee kaʼi nnojoleetkalü oʼu shapaain waaʼin?

Tü namakat waneinnua wayuu. Naashin waneinnua wayuu, aleinjatia neʼe wakuwaʼipa suluʼu müin waya shapaain aaʼin. Eetaashii na anoujakana sünain sajaʼtteerüin tü shapawaakalü aaʼin outapa waya. ¿Jamüsüjaʼa pünüiki süchiki tia?

Tü sümakat tü Wiwüliakat

Najaʼttireerü Maleiwa süpüshuaʼa tü ashapataakalü atuma waaʼin. «Müiria nnojoluin ouktaa, aʼyalajaa, mojuu aaʼin otta saalii ayuulii» (Alateetkat Mapeena [Apocalipsis] 21:4).

¿Kasa maa süküjaka tü Wiwüliakat?

• Shiapa aluwataain Nuluwataaya Maleiwa saaʼu tü Mmakat, jimateerü waaʼin (Isaías 32:18).

• Nnojoleerü jaralüin shapaain aaʼin (Isaías 65:17).