¿Kasa anaka süpüla süsülajünüin sümüin wayuu?

«Anasü süpüshua tü nüsülajakat chi Maleiwa kakumalakai tü kasa warattuuitkat chakat iipünaa» (Santiago 1:17). Süküjain wetsiikulokot tüü nüsülajüishaatain maʼin Jeʼwaa, chi Washi iipünaajachikai. Sünainjee süpüshuaʼa tü kasa nüsülajakat sümüin wayuu, eesü wanee alanaʼaleeka sünain anain maʼin. Nüküjain Jesuu jaralüin shia, müshi nia: «Süka alin maʼin nüpüla Maleiwa na wayuukana, naapüin chi waneeshikai Nüchon süpüla nnojoliinjanain outuin na eʼitaakana naaʼin nünain otta süpüla katüinjatüin noʼu waneepia» (Juan 3:16, TNM).

Anashaatasü tü naaʼinrakat Maleiwa süka naapüin chi waneeshikai Nüchon saaʼu wayuu. Nnojotsü eein wanee kasa anaʼleeka suulia tia. Sutuma tia, eeshii süpüla taashin waya suulia tü kaainjalaakat, tü laülawaakat jee tü outaakat (Salmo 51:5; Juan 8:34). Isasü wachiki taashin waya suulia tia wamüiwaʼa, jaʼitairü wachajaain maʼin sukuwaʼipa. Nükaaliinjapejeʼe waya Maleiwa süka alin waya nüpüla, naakajirüin waya. Naapüin Maleiwa nikii chi waneeshikai Nüchon, chi kanüliakai Jesuu, shiasaʼa poonoole nümaa Maleiwa, eesü süpüla katüin poʼu süpüla kaʼika süpüshuaʼa. ¿Kasa wayu tü aakajiraakat? ¿Jamüsü choʼujaaka naaʼinrüin Maleiwa tia? ¿Kasa paaʼinrajatka süpüla piʼrüin kasa anasü sünainjee tia?

Tü aakajiraakat shia awalaajaa sülia wanee kasa amülouika jee shiale süpüla nüjütünüin achiki wanee wayuu eekai püreesain atumawaa. Saashin tü Wiwüliakat, akumajünüshi Adán sümaa Eva nutuma Maleiwa sünain maainjalain naya otta katüinjatiaa noʼu süpüla kaʼika süpüshuaʼa namaa nachonnii suluʼu wanee Mma anashaatasü maʼin (Génesis 1:26-28). Amojujaapejeʼe tia sünainjee moonooin naya nümaa Maleiwa otta kaainjalashii naya suluʼujee tia. ¿Jamaka sukuwaʼipa wayuu sünainjee tia? Anuu sünüiki tü Wiwüliakat: «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). Mojusü nakuwaʼipa na nuuʼuliwoʼukana Adán nutuma, shia neʼe niʼipünaaka napüla tü kaainjalaakat jee tü outaakat.

Süpüla saakajinnüin wanee kasa, wanaawainjatü tü aapünakat sümaa sülia tü kasa amülouikat. Jamüsüjaʼa tü amülouikat nutuma Adán shia tü nukuwaʼipakat, anapuʼushi maʼin nia jee lotopuʼusü nukuwaʼipa. Amülouisü tia nutuma saaliijee kaainjalain nia nümüin Maleiwa, nnojoishi oonooin nia nümaa. Saashin tü Wiwüliakat, nia Adán kasitka kaainjalain na nuuʼuliwoʼukana otta outuin naya. Shiasaʼa süpüla sülaʼajaanüin naainjala na nuuʼuliwoʼukana Adán, choʼujaasü naapajiraainjachin nikii wanee wayuu eekai lotuin maʼin nukuwaʼipa maʼaka naaʼin Adán süpülapünaa kaainjalaa. Chia wayuukai nia Jesuu (Roma 5:19; Éfeso 1:7). Nnojorüle nuwalaajüin Maleiwa tia, nnojoliishije waya aʼatapajüin katüinjatüin woʼu waneepia suluʼu wanee mma anasü maʼin. Akaijasaʼa aipüralin wayuu Maleiwa otta naapüinjatü wamüin tü amülouikat nutuma Adán sümaa Eva (Alateetkat Mapeena [Apocalipsis] 21:3-5).

Wainma kasa anasü eejeetka sutuma naakajirüin wayuu Maleiwa, maʼaka saaʼin katüinjatüin soʼu wayuu süpüla kaʼika süpüshuaʼa. Sutuma tia, shia alanaʼleeka sünain anain maʼin tia asülajuushi naapakat Maleiwa wamüin. Wekirajaa sünain jamüin anaʼleeka shia otta jamüin jülüjaka naaʼin Maleiwa tü pienchisükat kasa wekirajaaka anain suluʼu süpana 4.

Tü keeʼireekat waaʼin. Nnojoishi eein wanee wayuu eekai outeein, shia keeʼireeka waaʼin katüin woʼu waneepia yaa mmapaʼa (Eclesiastés 3:11). Isasü wachiki wountuin tia wamüiwaʼa. Eepejeʼe süpüla wasaʼwatüin tia sutuma naakajirüin waya Maleiwa nükajee chi Nüchonkai. Anuu sünüiki tü Wiwüliakat: «Walaasü tü waainjalakat outapa waya. Aluʼusaʼa nünainjee chi Wasenyotsekai Jesuu naapüin Maleiwa wamüin kataa oʼuu» (Roma 6:23, TNM).

Tü choʼujaakat wamüin. Nnojoishi eein wayuu eekai nuuntuin naakajirüin wayuu. «Kojutsü maʼin tü awalaajünajatkat süpüla naakajinnüinjachin wanee wayuu. Nnojotsü jaralüin ountüin tia», müsü tü Wiwüliakat (Salmo 49:8, TNM). Müsüjeseʼe choʼujaain maʼin nükaaliinjain waya Maleiwa süpüla wojuʼitüin suulia kaainjalaa jee outaa. Naakajirüin waya Maleiwa suulia tia sükajee naapüin nikii Jesuu waaʼu (Roma 3:23, 24, TNM).

Tü kaʼi anakalü oʼu wamüin. Anuu sünüiki tü Wiwüliakat: «Cristo, nnojotsü niyoukta achiki ouktaa waaʼu. Je mayaainje kaainjaraliin waya, ouktüshia neʼe nia waneepia waaʼujee» (Roma 5:8). Watüjaa aaʼu alin maʼin waya nüpüla Maleiwa, naakajirüinjeseʼe waya mayaapejeʼe kaainjaraliin waya. Shiimainya weʼrüin wamüliala maaʼulu sutuma waleʼeruʼuin tü kaainjalaakat, ayatapejeʼe waʼatapajüin tü kasa anasü eejeetkat sutuma naapüin Maleiwa nikii chi Nüchonkai waaʼu.

Nüsülajüin saaʼu anamiain nia wamüin. Süküjain tü Wiwüliakat jamüin naapaka Maleiwa nikii chi Nüchonkai waaʼu, anuu sünüiki: «Niiʼiyatüin chi Maleiwakai sünain alin waya nüpüla, nuluwataainjeseʼe chi waneeshikai Nüchon süpüla katüinjatüin woʼu nünainjee. Nnojoishi niain alin wapüla chi Maleiwakai palajana, waya aika nüpüla palajana» (1 Juan 4:9, 10, TNM).

¿Kasa paaʼinrajatka süpüla piiʼiyatüin kojutuin pümüin tü asülajalaa anaʼleekat maʼin? Naashin Jesuu suluʼu Juan 3:16, naya neʼe kateenakana oʼu waneepia na anoujakana nünain. Saashin tü Wiwüliakat, «tü kanoulaakat shia shiimainre wamüin shikeraajeerüin tü kasa waʼatapajakat maʼin» (Hebreokana 11:1, TNM). Süpüla punoujainjachin sünain tia, ekirajaainjachi pia sünain tü shiimainkat. Choʼujaasüjeseʼe pükatalüin kaʼi süpüla pikirajaain nüchiki Jeʼwaa, chi asülajakai wamüin tü kasa anaʼleekat maʼin, otta süpüla pütüjaain saaʼu tü paaʼinrajatkat süpüla katüinjatüin poʼu waneepia saaʼu naapajiraain nikii Jesuu waaʼu.

Pütüjaajeerü aaʼu tü shiimainkat pikirajaale sünain tü pütchi eʼitaanawaikat suluʼu www.jw.org. Wayakana aküjaliikana pütchi nüchiki Jeʼwaa wekirajeein pia. Shiʼipaʼaya pikirajaain sünain tü asülajalaa anashaatasü naapakat Maleiwa sümüin wayuu otta pütüjaapa saaʼu aneerüin maʼin pukuwaʼipa sutuma, keeʼireejeerü paaʼin aapaa analuʼut nümüin Maleiwa nükajee Jesuu (Roma 7:25, TNM).