Pansaainjatü tü jülüjakat waaʼin süchiki tü waainjalakat

Talatüshi maʼin Dan otta Margareta saaʼu nawaraijaanüin aaʼu sutuma nachon nümaa suʼwayuuse otta süchonnii. Aʼlakajaatpuʼu Margaret shiʼyataaiwaʼaya jee atüjasü maʼin shia. Süʼlakajaaka pireewa sümaa saatsa aainjuushi süka keesü nayaaluʼu na süikeyuukana süka shiain nekaajüin maʼin.

Jayunkapa sutse shiʼitaain saaʼu tü meesakat eejanale joyotuin napüshuaʼa. Ponusüjeseʼe maʼin saaʼin saakatapa shirouse tü wayeetakat shia neʼe eejatka tü saatsa aainjuushikat süka keesü. Motoshoonosü saaʼin Margaret shijitüin pireewa saʼaka sutse.

Jaʼitairü jeʼrain wouyase jee jaʼitainna watüjain maʼin, eejeerü tü kasa woʼtchejaakalü amaa. Eesü nnojorüle wayaawatüin saaʼu wanüiki, eesü mojule tü kasa waainjakat, eesü nnojorüle jülüjain shia waaʼin jee motule waaʼin. ¿Jamüshii woʼtchejaʼawaika sümaa wakuwaʼipa? ¿Kasa waaʼinrajatka sülatüle tia wamüin? ¿Kasa waaʼinrajatka suulia sülatüin tia wamüin? Pansaale tü jülüjakat waaʼin süchiki tü kasa woʼtchejaakalü amaa, watüjaajeerü aaʼu tü waaʼinrajatkat.

TÜ JÜLÜJAKAT WAAʼIN OTTA TÜ JÜLÜJAKAT NAAʼIN MALEIWA

Talatüshii waya waʼwaajünüle sünainjee wanee kasa anaka watuma otta müinjana waya atumawaa waashin. Eekajasaʼa joo kaainjarale waya, jaʼitairü nnojoluin shia waaʼinjeein jee nnojorüle jaralüin atüjaain saaʼu, «tasit» ¿müshiiche waya? Meerü wanüiki nnojorüle yaletüin waaʼin.

Yaletüle waaʼin eesü süpüla nnojoluin mojuin waashin tü kasa waainjakat, eesü süpüla «nnojoishi tayain kasirüin» wamüin jee eesü süpüla naatain tü wayuu weʼitaakalü aaʼu tü waainjalakat. Mojupejeʼe naaʼinrüle wayuu tia süka nnojoleerüin sütüjaanüin aaʼu tü shiimainkat sümaa naateerüin tü wayuu eʼitaanakat shiain kaainjalain. Mayaainjeʼe eein süpüla matüjaajuuin saaʼu wanee waainjala, jülüjeesü waaʼin wasouteenain «nümüin [Maleiwa] waneʼewaʼire wakua saaʼu tü waaʼinrapüʼükat» (Roma 14:12).

Nütüja aaʼu Maleiwa nnojoluin eein wayuu eekai aaʼinrüin tü anasükat waneepia. «Amüliajüi wayuu Jeʼwaa [otta] anamia nia», müsü tü karaloʼutakat Salmos nüchiki. Akaʼaya nia, «nnojoleerü niweetirakuʼu nümüin tü kasa mojusü waaʼinrakat, nnojoleechi jashichikuʼu müin nia wamüin weinshi». Nütüja aaʼulu Maleiwa nnojoluin lotuin sukuwaʼipa wayuu, nütüja aaʼulu tü kasa jalouikalü apüla waya, «ooʼulaka sotusü naaʼin sümamülain mma waya» (Salmo 103:8, 9, 14, TNM).

Chi Maleiwakai müshi aka naaʼin wanee wayuu amülialaakai aaʼin naalin nüchonnii, jülüjainjatkalaka waaʼin tü jülüjakat naaʼin süchiki tü waainjalakat (Salmo 130:3). Nüküjain wamüin sükajee tü Nünüikikat tü waaʼinrajatkat kaainjarale waya jee kaainjarale wayuu wamüin.

TÜ PAAʼINRAJATKAT KAAINJARALE PIA

Kaainjarale wanee wayuu, naata neʼe na niʼitaakana aaʼu naainjala jee eeshi nusoutule pejeewa naaʼuwaa. Jamüshijaʼa piale mojuin anüiki sümüin wayuu, anashi pukumajüle sukuwaʼipa tia nümaa süpüla anajiraain jia. Mojule sukuwaʼipa wanee kasa putuma jee mojule saaʼin wayuu putuma, nnojo jashichin neʼe pia jee nnojo piʼitaain saaʼu wayuu paainjala, shia anaka aluʼu pukumajüle sukuwaʼipa. Nnojotsü kasain anain nutuma wanee wayuu jashichire nia naaʼuwaa otta kakalieerü tü mojujirawaakat. Shia anaka aluʼu nütüjale sünainjee tü alatakat nümüin, nukumajüle sukuwaʼipa jee nnojorüle jülüjakuʼu müin shia naaʼin.

Naatale chi kaainjalakai jashichimaatüshii waya. Shiapejeʼe anain waaʼinrüle tü nümakat Jesuu soʼu nümüin: «Anasü müleka jaaʼinrüle tü anasükat sümüin wayuu, maa aka jücheküin saaʼinreein tü anasükat jümüin» (Mateo 7:12). Piale kaainjalain, jaʼitairü nnojoluin mojuin maʼin shia, pücheküin sümülialaain wayuu paalii jee anaʼleesia maʼin pümüin motule shia naaʼin. Müinjatia neʼe pukuwaʼipa namüin na waneinnua kaainjarale naya pümüin, kamaneeinjachi pia (Éfeso 4:32).

WANEIRUA PÜTCHI SUULIA PUʼTCHEJAAIN SÜMAA TÜ PAAʼINRAJATKAT

Saashin wanee diccionario, woʼtcheja amaalü wanee kasa mojule wanüiki süchiki otta nnojorüle watüjaain saaʼu tü alatakat jee nnojorüle kapülain shia waaʼin. Tia alatüirü wamüin wapüshuaʼa. Nnojoleenapajaʼa waya oʼtchejaain maʼin sümaa wanee kasa waaʼinrüle tü sümakat waneirua pütchi suluʼuka tü Wiwüliakat.

Müsü Proverbios 18:13, TNM: «Nüsounnajaale wanee wayuu süpülapünaa naapajüin wanee kasa, maala neʼe tia naainjakat jee japüijeechi sünainjee». Waapajüle palajana süpüshuaʼa tü aküjünakat wamüin süchiki wanee kasa jee wayaawatüle saaʼu tü wanüikinjatkat, nnojoleerü mojuin wanüiki otta nnojoleena waya aaʼinrüin kasa mojusü. Watüjaale saaʼu tü shiimainkat süchiki wanee kasa, nnojoleerü woʼtchejaain amaa wanüiki.

Anuu wanee pütchiya: «Anakaja müleka kamaneere jia sümüin wayuu süpüshua suulia paʼürülaawajirawaa» (Roma 12:18). Shia anaka aluʼu püchajaale sukuwaʼipa süpüla anajiraain pia sümaa wayuu. Piʼyataale namaa waneinnua wayuu kojutuinjana naya pümüin otta kapülainjana naya paaʼin. Anashii pütütüleʼerüle naaʼin süka pütchi anasü. Müle pukuwaʼipa namaa mapüleejeerü namüin motuin naaʼin tü paainjalakat namüin. Jaʼitakajeʼe miyoʼule wanee aainjalaa eesü süpüla sukumajünüin süka anakalü akuwaʼipa.

Eeshi süpüla pütüjain sünainjee tü kasa puʼtchejaakalü amaa. Nnojo kanüikin pia saaʼu paainjala, shia anaka aluʼu jülüjale paaʼin tü kasa punoutajatkat sünain pukuwaʼipa. Eesüjaʼa süpüla choʼujaain pümüin nnojoluin püshapalaain maʼin aaʼin saaʼu wanee kasa, kamaneein pia jee püchecherüin paaʼin suulia aaʼinraa kasa mojusü namüin na waneinnua otta aipüralin pia wayuu (Galacia 5:22, 23). Mapa, atüjeechi pia sünainjee tü kasa alatakat pümüin tü nnojoluinjatkat paaʼinrüin wanee sukueena. Nnojo mojuin maʼin paaʼin saaʼu wanee kasa mojuka putuma, punoutuinjatpejeʼe shia. Talatüle paaʼin waneepia, nnojoleechi pia mojujiraain sümaa wayuu.

TÜ KASA ANASÜ PIʼREETKAT SÜNAINJEE TIA

Anale tü jülüjakat paaʼin süchiki tü kasa puʼtchejaakalü amaa, atüjeechi pia süpüleerua pukuwaʼipa puʼtchejaapa sümaa wanee kasa. Jimateerü paaʼin otta anajiraajeechi pia namaa na waneinnua. Watüjale sünainjee tü kasa mojukat watuma, kekiijeena waya otta kamaneejeena waya. Akaʼaya shia, nnojoleerü mojuin waaʼin otta nnojoleerü jülüjain waaʼin wayain mojuka akuwaʼipa waneepia. Jülüjale waaʼin eein waneinnua wayuu eejiraaka süpüla anain nakuwaʼipa, aleeweena waya namaa sutuma tia. Wanee kasa anaʼleeka shia washateerüin nukuwaʼipa Maleiwa, chi motokai aaʼin saainjala wayuu (Colosas 3:13).

¿Kasaka alatüin sümüin Margaret, tü waashajaakalü achiki suʼttianainjee pütchikat tüü? ¿Mojujiraashiiche na süpüshikana sünainjee tia? Nnojo. Asirajüshii neʼe naya napüshuaʼa, shialeekajaʼa Margaret talatüsü maʼin. Neküin tü sutsekat sümaa maʼakain shia pireewa. Kojuya juya süchikijee tia, ayatsü nakuentajüin na süikeyuukana süchiki tia namüin nachonnii, asirajüshii naya sotopa naaʼin tia. Jee müsia nnojotsü mojuin maʼin tü alatakat soʼu tia.