«¿Jalajaiche Maleiwa?»
«SHIA TÜ SÜSAKITKAT MAʼIN ANAIN WAYUU SHIʼRAPA MÜLIAA: ¿JALAJAICHE MALEIWA?» (Wanaa sümaa chajachin Benedicto XVI sünain anaʼlawaa eere tü kanüliakat campo de concentración de Auschwitz [Polonia]).
¿EEICHI PIA ASAKIRÜIN SÜNAIN TIA PIʼRAPA MÜLIAA? ¿ALATÜITCHE PÜMÜIN WANEE KASA MÜLIAKA MAʼIN ATUMA PAAʼIN OTTA JÜLÜJAKA ATUMA PAAʼIN NNOJOLIN KACHIPÜNAAIN PIA NAAʼIN MALEIWA?
Alatüsü tia sümüin Sheila, wanee wayuu kepiaka chaa Estados Unidos otta anoujashii na süpüshikana. Müsü shia: «Jintuluiwaʼaya taya tanouja anainchi Maleiwa otta tatüjaa aaʼu niain Kakumalain waya. Nnojotpejeʼe aleewain taya nümaa. Tatüjaa aaʼu eein süpüla niʼrüin taya Maleiwa, nnojotpejeʼe jülüjain taya naaʼin taashin. Mayaapejeʼe nnojoluin nüʼürülain taya, nnojotsü taya kachipünaain naaʼin». ¿Jamüsüche jülüjaka saaʼin Sheila tia? Müsü shia: «Wainma kasa mojusü alataka sümüin tapüshi, pachiiruaalasü neʼe shia, müshii nnojoliikai nükaalinjain waya Maleiwa».
Eeshijaʼa punoujale nünain Maleiwa maʼaka sunoujain Sheila, eepejeʼe püsakirüle paaʼin müleka kachipünaale pia naaʼin. Nüsakira anainrü tia Job, wanee wayuu lotokai akuwaʼipa, eʼitaakai naaʼin sünain pülain jee kekiin maʼin Maleiwa (Job 2:3; 9:4). Süchikijee pachiiruaain neʼe tü kasa mojusü alatakat nümüin otta nnojoitpa nia kaʼatapalain kasa anasü, asakinnüshi Maleiwa nutuma sünain maa: «¿Jamüshi puunjulaka puʼupünaa toulia jee maka taya maʼaka naaʼin wanee püʼünüü pümüin?» (Job 13:24).
¿Kasa süküjaka tü Wiwüliakat süchiki tia? ¿Niache Maleiwa kasitka tü kasa mojusü alatakat wamüin? ¿Kapülasüche naaʼin Maleiwa wakuwaʼipa waneʼewai wakua? ¿Kasa waaʼinrüinjatka süpüla watüjaain saaʼu müleka niʼraajüle jee nükaalinjale waya Maleiwa?
Sükajee tü sümakat tü Wiwüliakat otta tü kasa nukumalakat Maleiwa, wayaawata aaʼu alin waya nüpüla (Roma 1:20). Wekirajaajeerü anain süchiki tia suluʼu tü wane ekirajaayakalüirua. Sükajee tia pütchikat piʼraajeerü nukuwaʼipa Maleiwa jee piyaawateerü aaʼu kapülain pia naaʼin (1 Juan 2:3; 1 Pedro 5:7).