Tü paaʼinrajatkat süpüla anain pukuwaʼipa

NNOJOISHII nukumajüin Maleiwa na wayuukana süpüla neʼrüinjanain müliaa. Tü keeʼireetüjütkalia naaʼin Maleiwa shia kojutuinjatüin sümüin wayuu süpüshuaʼa tü nuluwataakalü anain süpüla anainjatüin nakuwaʼipa, niainjachi nashataka akuwaʼipa Maleiwa. Anajiraainjana na wayuukana otta talatüinjatü naaʼin sümaa napüshi. Atüjainjana süpüleerua wainma kasa otta aʼyataainjana maʼin süpüla paʼaraiisüinjatüin tü Mmakat natuma.

NIKERAAJEERÜ JEʼWAA TÜ NÜMAKAT

• «Najaʼlajeʼerüin tü atkawaakat sainküin tü mmakat» (Salmo 46:9).

• Antüitpa sükalia «süpüla pajaʼlajeʼerüinjanain na amojujakana tü mmakat» (Alateetkat Mapeena [Apocalipsis] 11:18, TNM).

• «Nnojoleechi eein wanee wayuu eekai ‹ayuuishi taya› nümeechin» (Isaías 33:24).

• «Talateerü naaʼin sünain aʼyatawaa na wayuu taneekajalakana» (Isaías 65:22).

¿Jameerü sukuwaʼipa süpüla shikeraajüinjatüin tia aküjünakat achiki paala? Nüneeküin Maleiwa chi Nüchonkai süpüla nuluwataainjachin saaʼu tü Mmakat chejee iipünaajee, laülaainjachi Jesuu saaʼu tü Nuluwataayakat Maleiwa saashin tü Wiwüliakat (Daniel 2:44). Aluwataainjachi Jesuu saashin tü Wiwüliakat otta «müichia nnojolin ooʼulaain suulia aluwatawaa» (Lucas 1:32, 33).

Wanaa sümaa yaajachin Jesuu saaʼu tü Mmakat wainma kasa pülasü naaʼinraka, müsüjeseʼe watüjaain saaʼu aneerüin maʼin sukuwaʼipa wayuu nuluwataapa Jesuu.

WATÜJAA AAʼU TÜ NAAʼINRAJATKAT JESUU SÜPÜLEERUA WAYUU SÜKAJEE TÜ KASA NAAʼINRAPUʼUKAT

• Sutuma «niiyajüin wainma wayuu eekai ayuulin», watüjaa aaʼu aneenain nutuma eekai ayuulin (Mateo 9:35).

• Sutuma niimaleʼerüin Jesuu wanee wawai, watüjaa aaʼu pülashin nia süpüla niimaleʼerüin wanee wawai jee sukutkujaale tü mmakat (Marcos 4:36-39).

• Sutuma nikirüin watta saalii wayuu, watüjaa aaʼu naapeerüin tü choʼujaakat sümüin wayuu süpüla katüinjatüin soʼu (Marcos 6:41-44).

• Sutuma wiinojaain nutuma tü wüinkat sünain wanee miʼiraa shikiira kaʼwayuusee, watüjaa aaʼu naapeerüin sümüin tü wayuukalüirua kasa talatüinjatka atuma saaʼin (Juan 2:7-11).

¿Kasa paaʼinrajatka süpüla naapüinjatüin Maleiwa pümüin tü kasa anasü naapüinjatkat namüin na aikana apüla nia? Eesü wanee wopu puʼunajatka aluʼumüin. Saashin tü Wiwüliakat shia tü wopu sünainmüinjatkat tü katakalü oʼuu jee paliʼirü na wayuu oʼunakana suluʼu (Mateo 7:14, TNM).

WANEE WOPU ANAINJATKA ATUMA WAKUWAʼIPA

¿Kasa kayaawaseka tü wopu sünainmüinjatkat tü katakalü oʼuu waneepia? Wopukot tia shiyaawasesü süpüshuaʼa tü nuluwataakalü anain waya Maleiwa. Müshi nia: «Tayakai Jeʼwaa, taya chi Pümaleiwasekai, Chi ekirajakai pia süpüla anainjatüin pukuwaʼipa, Chi oʼunirakai pia suluʼupünaa tü wopu anasükat» (Isaías 48:17). Paaʼinrüle tü nümakat Maleiwa aneerü pukuwaʼipa.

Anuu nünüiki Jesuu: «Taya neʼe chi süntajachikai akajee wayuu nünainmüin Maleiwa, aküjakai sümüin wayuu tü shiimainkat otta chi katakai atuma soʼu wayuu» (Juan 14:6, TNM). Wanoujale sünain tü nikirajakalü anain Jesuu jee washatüle nukuwaʼipa arütkaajeena waya nünainmüin Maleiwa otta aneerü wakuwaʼipa.

¿Kasa paaʼinrajatka süpüla pütüjaain saaʼu jaralüin tia wopukot? Mayaainjeʼe wainmain tü iküleesiakalüirua maaʼulu yaa, anuu tü nümakat Jesuu süchiki tia: «Mayaasüje, ‹Senyotkalee, kojutüshi pia watüma› jümüin tamüin, müleka nnojorule jaaʼinrüin tü nüchekakat jüpüleerua chi Tashikai chakai iipünaa, nnojoleena ekerotüin jia chaʼaya eemüinre nuluwataain» (Mateo 7:21). Otta müshi nia: «Jütüjaajeena aaʼu sünain naküjain alawaa sükajee tü kasa naaʼinrakat jiʼrüin» (Mateo 7:16). Sükajee tü sümakat tü Wiwüliakat piyaawateerü aaʼu jaralüin tü iküleesia shiimainkat (Juan 17:17).

¿Kasa paaʼinrüinjatka süpüla suluʼuin pia tia wopukot? Weʼraajüinjachi chi katakai atuma woʼu, watüjaainjatü aaʼu nünülia otta tü nukuwaʼipakat. Watüjaainjatü aaʼu kasain naaʼinrüin maaʼulu otta kasain nuchuntuin wamüin.a

Mayaainjeʼe anain nümüin Maleiwa, niküle, nüshaitüle, kaʼwayuusere jee kachonle wanee wayuu, nnojotsü shiainjatüin neʼe waaʼinrakat tia. Shia alanaʼaleeka nümüin Maleiwa weʼraajüle nia otta waʼaleewale nia. Jaa wamüle nümüin Jeʼwaa weeʼiyatüin sükajee tia shiimain alin nia wapüla. Anuu tü nümakat Jesuu: «Kateerü noʼu waneepia chi wayuu ekirajaakai waneepia püchiki piakai chi Maleiwa shiimainshikai» (Juan 17:3, TNM).

ANUU TÜ PAAʼINRAJATKAT PALAJANA

Talateechi putuma chi Maleiwa shiimainshikai müleka punoʼuteʼerüle waneirua kasa sünain pukuwaʼipa. Eesüjaʼa süpüla müin kapüleekai saaʼin pümüin, eʼreechipajaʼa pia kasa anasü nümaale pia Maleiwa. Anuu tü paaʼinrajatkat palajana: eere wanee kasa pütüjaweekalü aaʼu süchiki tü Wiwüliakat, puchunta ekirajawaa sünain tü Wiwüliakat suluʼu www.jw.org, nekirajeechi pia na Aküjaliikana Pütchi eere anain saaʼin pümüin soʼu tü oora püchekakat.