¿Pütüjaa aaʼu?

¿Kasa niʼyataapuʼuka anain wanee wayuu eʼitaanakai sülaülain wanee aʼyatawaa?

SÜMAIWA paala, chi sülaülakai wanee aʼyatawaa, naaʼinmajüin nipia chi nülaamainkai jee tü kasa eekat nümaʼana.

Wanaa sümaa achepchieein José chaa Egipto, eʼitaanüshi nia süpüla laülaainjachin nia saaʼu tü kasa eejatkat nümaʼana chi nülaamainkai. Eʼitaanüshi José nutuma chi nülaamainkai süpüla laülaashinjachin «nia nütüma sünain aluwatawaa suluʼu tü nipiakat sümaa najapuluʼuin süpüshua tü kasa eekat nümaʼana» (Gén. 39:2-6). Nuluwataapa José saaʼu Egipto, niʼitaain wanee wayuu laülaainjachikai saaʼu tü kasa eejatkat nümaʼana (Gén. 44:4).

Soʼu nükalia Jesuu, kepiapuʼushii pueulopaʼa na washinnuukana, watta suulia tü mma kaluʼukat nawashirüin. Neʼitaain wanee wayuu laülaainjachikai naaʼu na nachepchiakana jee jülüjainjachikai aaʼin tü naʼyataainkat.

¿Kasa achuntunaka nümüin wanee wayuu süpüla sülaülainjachin nia wanee aʼyatawaa? Naashin Columela, wanee wayuu ashajakai süchiki kasa alatüirü, atüjainjachi wanee wayuu süpüleerua tia aʼyatawaakat süpüla sülaülainjachin nia. Niainjachi wanee wayuu aluwataaka na achepchieekana süka anaka akuwaʼipa sümaa nnojoliinjanain müliain naya nutuma. Anuu sooʼomüin nünüiki Columela: «Nnojoishi niainjachin wanee wayuu atüjakai maʼin naaʼinruʼu, niainjachi wanee wayuu anashiika amüin nikirajünüin sünain wanee kasa».

Wanaa sümaa saashajaain tü Wiwüliakat süchiki tü naʼyataakalü anain waneinnua wawalayuu suluʼu tü outkajaaleekat, süküjain meematüin aka saaʼin tü niʼyataapuʼukalü anain wanee wayuu sülaülakai aʼyatawaa. Anuu nünüiki chi aluwataaushikai Pedro namüin na anoujashiikana: «Anakaja müleka jükaaliijiraale süka tü atüjaa aapünakat jümüin waneʼewaʼire jukua, maa aka wane aʼyataai eekai naaʼinrüin waneepia tü nüchekakat Maleiwa nüpüleerua» (1 Ped. 4:10).

Wanaa sümaa nüküjain Jesuu süchiki tü suluʼukat Lucas 16:1-8, aashajaashi nia nüchiki wanee wayuu sülaülakai aʼyatawaa. Nüküjain Jesuu namüin na nikirajüinkana, nüneeküinjachin wanee «achepchiee oonookai maʼin otta kekiikai maʼin», sülaülainjachi nia wanee aʼyatawaa nutuma. Müinjatü sukuwaʼipa tia naashin Jesuu soʼunnaa nuluwataain. Tü niʼyataainjatkalü anain chia sülaülajanakai aʼyatawaa, shia naapüinjatüin namüin na anoujashiikana tü kasa anainjatkalü atuma nanoula soʼunnaa sülüʼülaain tü kaʼi sajaʼttüinjatkalü oʼu kasakat süpüshuaʼa (Mat. 24:45-47, TNM; Luc. 12:42). Waapüin analuʼutkat nümüin chi sülaülakai aʼyatawaa nutuma Jesuu saaʼu nukumajüin wamüin tü karaloʼuta katsüinjatkalü atuma wanoula jee niitajüin shia namüin na wawalayuukana sainküin mmakat.