Pükatala kaʼi süpüla pürekutsoolüinjachin pia
1 «Nnojotsü jimatüin taya. Nnojotsü müin anakai saaʼin tamüin pürekutsoorüle taya», müsü sünüiki wanee wawala aapajaka wanee pütchi aashajaaka nachiki na pürekutsootkana sünain wanee outkajawaa miyoʼu piamaka kaʼi. Niashi ekirajaka wanee laülaashi pürekutsootkai. «Pülashikaiche maʼin eeka süpüla naainjüin tia. Wainma kasa taainjaka eereje nnojolin laülaashin taya», müshi joo wanee jimaʼai yalajachikai sünain tü outkajawaakat.
2 Wanaa sümaa nüküjüin chi wawalakai tü kasa anasü eekat sünainjee pürekutsoolüin wanee wayuu, nüsakiijüin apünüinshii wawalayuu pürekutsootkana süchiki tü kasa naainjakat süpüla pürekutsoolüinjanain naya otta naküjüin tü kasa anasü naapakat Jeʼwaa namüin sünainjee tü naainjakat. Nüsakirüin wanee wawala masaʼakai, wanee manoujüinkai aʼwayuusee otta wanee ooʼulaakai suulia ekirajawaa suluʼu eʼikülee miyoʼu. Na piamashii wawalayuu aküjünakana achiki suʼttiajee tü ekirajaayakat, jülüjüsü naaʼin nakuwaʼipa kamaʼa eere süpüla pürekutsoolüin naya. Kamalainsü namüin tü kasa anasü neʼrakat na wawalayuukana. Wawalayuu, jüsakira jaaʼin kamaʼa eere süpüla pürekutsoolüin jia. Mapüleesat jooluʼu süka süshakajüin tü oora nalatirüinjatkat na pürekutsootkana.
3 Watüjaa aaʼu niain aapüin wamüin Jeʼwaa tü kataakalü oʼuu. Nia kakumalaka tü kasakalüirua otta nia laülaaka saaʼu kasaka süpüshuaʼa (Dan. 4:17; Aluw. 17:28), otta watüjaa aaʼu nüneeküin waneeinnua wayuu süpüla naʼwaajüin nia. Wayakana maaʼutpünaa, eeshi süpüla wakaaliinjüin chi achepchiee oonookai otta kekiikai maʼin sünain aʼwalakajaa pütchi nüchiki Maleiwa süpülapünaa sajaʼttüin tü kasakalüirua (Mat. 24:45; 25:40; 1 Ped. 2:9). Alüʼütsü maʼin sükalia süpüla sajaʼttüinjatüin tü kasakalüirua makalaka waküjüinjanain maʼin pütchi sümüin tü wayuukalüirua (2 Tim. 3:1). Otta aʼyataainjana waya shiyaaluʼu wapüshi (1 Tim. 5:8). Eesü mmorüle paaʼin seema pürekutsoolüin pia süka paliʼireerüin pükanain piʼyataapa otta süka ayuulin pia maaʼutpünaa. Nnojoishi piain neʼe müin akuwaʼipa, wainma na wayuu choʼujaakana amüin nakatalüin kaʼi süpüla neemeraain otta na choʼujaakana amüin nneerü (Ecl. 3:12, 13).
4 Jiainjana aneekaka jümüiwaʼa pürekutsoolüinjanale jia otta jütüjaainjatü aaʼu jüinkeerüle shia (Roma 14:12; Gal. 6:5). Wainmainna na wawalayuu aneekakana pürekutsoolüin naya. Aküjünüsü suluʼu tü karalouktakat Anuario de los testigos de Jehová 2014, eein maʼaka 1.025.677 na wawalayuu pürekutsootkana rekulaat. Mayaainjeʼe eein na ayuuikana, na maletsekana, na meʼejenakana otta na alatakana amüin kasa eekai mojuin, ayatüshiʼiya naya sünain aainjaa tü kasa anasükat (Gal. 6:9). Neʼitaain naaʼin nünain Jeʼwaa süpüla anainjatüin nakuwaʼipa (Mal. 3:10). Natüjaa aaʼu nnojoluin eein wanee kasa analeekalia suulia pürekutsoolüin naya. Natüjaa aaʼu nakaaliinjünüin nutuma Jeʼwaa süpüla pürekutsoolüin naya otta natüjaa aaʼu ayatüinya nakaaliinjünüin nutuma.
5 Anasü nakuwaʼipa na pürekutsootkana. Müsü sünüiki wanee wawala chaka Camerún, joʼuuchonyulia süchon: «Tamaasü waneepia tü tachonkat sünain aküjaa pütchi, tamaatüjülia joʼuuiwaʼaya shia nnojoluiwaʼaya kooʼulin shia. Kaalajapuʼusü shia tatuma yaa tasapüluʼu. Soʼu wanee kaʼi, yalajatü taya sünain aküjaa pütchi eekai wanee oikkaalee. Saapaaka tü joʼuukot waneeirua rewiisüta tamaʼanajee süpüla süküjüinjatüin pütchi eemüin wanee oikkaalee yalajatka taʼütpaʼa. Süka joʼuuyulüin shia, nnojotsü wainmain sünüiki. Kamalainpejeʼe sümüin wanee wayuu tü saainjakat otta saapaka tü joʼuukot wanee rewiisüta sümüin. Saapaain tü wayuukot tü rewiisütakat otta sücheka achikirü shikirajaain sünain tü Wiwüliakat».
6 Achuntünüsü namüin na wawalayuukana pürekutsoolüin aaʼusiliaat naya makalaka eein wanee laülaashi chejeʼewai Zambia achekakai pürekutsoolin nia. Aʼyataashi nia waneepia shiyaaluʼu nüpüshi. Pürekutsootshi nia napüleerua na nuwalayuukana otta na nüpüshikana. Nüshaʼwaleʼerapuʼuin tü neʼejenakat sotpaʼa tü karateetkat sümaa niʼitaain tü kasee sünüikimaajatkat tü karalouktakat Talatüinjatka atuma waaʼin sümaa wapüshi. Maʼwaishi nia namüin na wayuukana: «Jalainna jaapajaiwa tü pütchikat». Süka naainjüin tia, nüsülajüin 16 karalouktairua Talatüinjatka atuma waaʼin sümaa wapüshi otta 13 karaloukta Conocimiento. Oʼttüshi nia sünain ekirajaa piamasü wayuu.
7 Chaa Zimbabue, wainma na anoujüshii jaʼyakana aaʼu pürekutsooleein naya. Suluʼu wanee outkajaalee, aaʼuriiroʼu soʼu juyaka 1998, eejana 117 aküjülii pütchi. Naʼakajee naya wawalayuukana, 70 na pürekutsootkana aaʼusiliaat otta 9 na pürekutsootkana rekulaat. Suluʼu waneʼeya, eejana 94 aküjülii pütchi, naʼakajee naya wawalayuukana, 58 na pürekutsootkana aaʼusiliaat. Eesia joo waneʼeya, eejana 126 aküjülii pütchi, naʼakajee naya wawalayuukana, 58 na pürekutsootkana aaʼusiliaat otta 4 na pürekutsootkana rekulaat. Wainma maʼin naʼyataain na wawalayuukana soʼu juyakat tia. Mayaainjeʼe kupaain naya sümaa napüshi, sünain tü outkajaaleekat otta sünain akumajaa wanee Weteet jeketü, akatatshii naya kaʼi süpüla aküjaa pütchi.
8 Nayaawata aaʼu na wawalayuukana ayatüinya naya sünain pürekutsoolüin süka nakaaliinjünüin nutuma Jeʼwaa. Naashin nayakana, nountüin naainjüin tü kasakalüirua nükajee chi naaʼinkai Maleiwa (1 Ped. 4:11). Süka kanoulain naya, ayatüshiʼiya aʼyataain weinshi nümüin Maleiwa. Nnojotsü naaʼinmaain tü nakuwaʼipakat namüiwaʼa, natüjaa aaʼu nachecherüinjatüin naaʼin süpüla nakaaliinjünüin nutuma Maleiwa. Otta natüjaa aaʼu naapüin Jeʼwaa wainma kasa anasü namüin (1 Tes. 2:2).
9 Anasü maʼin washatüle nukuwaʼipa Pablo. Aashajaasü tü Wiwüliakat süchiki niʼyataain chi aluwataaushikai Pablo otta süküjüin wainmain na wayuu nükaaliinjakana. Wainmashaata tü kasa naainjakat Pablo. Müliashi nia atumawaa otta eipiijünüshi saalin nüküjüin pütchi otta nütütüleʼerüin naaʼin na anoujüshiikana. Eesü nüchiʼra müliaka atuma naaʼin (2 Cor. 11:21-29; 12:7-10). Aʼyataashi maʼin nia otta nütüjaa aaʼu nüinküin tia süka nükaaliinjünüin nutuma Jeʼwaa (Filip. 4:13). Nnojoishii süpüla namüinjanain na wayuu nükaaliinjakana Pablo: «Amüla neʼe tü paainjakat, anashijeʼe paainjüle wanee kasa naata». Anashantasü wakuwaʼipa sutuma tü naainjakat Pablo. Talatüsü waaʼin sutuma tü pütchi nüküjakat wamüin suluʼu tü Wiwüliakat. Sükaaliinjüin waya süpüla watüjaain saaʼu tü kasa palajanainjatkat watuma otta süpüla wachecheraainjanain süchiirua tü shiimainkat.
10 Nnojotsü wainmain tü kaʼi apütaakat wapüla süpüla aküjaa pütchi (1 Cor. 7:29; Mat. 24:14). Makalaka anain wasakirüle waaʼin: «Jamaleere takuwaʼipa wattaʼa, ¿talateeiche Jeʼwaa sümaa tü kaʼi takatalakat süpüla aʼyatawaa nümüin?» (Sant. 4:14). Puʼuraaja nümüin Jeʼwaa otta püküja nümüin pükataleein kaʼi süpüla aʼyatawaa nümüin maʼaka naainjüin shia na waneeinnua anoujüshiikana (Sal. 90:12). Puchunta kaaliinwaa nümüin Maleiwa süpüla talatüin paaʼin sümaa palitchon kasa. ¿Eeshiche joo süpüla pürekutsoolüin pia?
11 Nnojo mojuin paaʼin isale püchiki pürekutsoolüin pia. Watüjaa aaʼu eein na isakana achiki pürekutsoolüin naya süka isain nachiki nalatirüin akaratshi shikii oora kashiwai. Eepajaʼa na eekana süpüla pürekutsoolüin aaʼusiliaat soʼu wanee kashi jee shiale soʼu kojuya kashi. Nnojo mojuin paaʼin isale püchiki maaʼutpünaa pürekutsoolüin pia. Puchunta kaaliinwaa nümüin Jeʼwaa süpüla sunouktaain tü kasa aʼalijirakat pia. Nnojorülejeʼe süpüla sunouktaain, soto paaʼin talatüin Jeʼwaa pümaa süka piʼyataain nümüin süka süpüshuaʼa paaʼin (Mat. 13:23). Nütüjaa aaʼu poonooin waneepia nümaa otta nütüjaa aaʼu nnojoluin pülatirüin wanee kashi sünain nnojolin püküjüin pütchi. Anashi pütüjüle maʼin ekirajaa wayuu otta aküjaa pütchi (1 Tim. 4:16).
12 Alüʼütsü maʼin tü nükalia Jeʼwaa keemakat maʼin makalaka wakatalüinjanain kaʼi süpüla wojuteʼerüin tü aʼyatawaa aluwataanakalü anain waya (Joel 2:31). Nütüjaa aaʼu Satanaa sülüʼülüin nükalia süpüla najaʼttinnüin müsüjeseʼe niʼitaain wapüleerua wainma kasa süpüla nnojoliinjanain waaʼinrüin waneepia tü kasa anasükat (Filip. 1:10; Alat. Map. 12:12). Nnojo motuin waaʼin alin waya nüpüla Maleiwa. Eeshii süpüla nükaaliinjüin waya Jeʼwaa süpüla talatüinjatüin waaʼin sümaa palitchon kasa otta süpüla waʼyataain maʼin sünain aküjaa pütchi (Sal. 145:16). Eeshii na aneekakana mapa pürekutsoolüin naya aaʼusiliaat jee shiale pürekutsoolüin naya rekulaat. Anasü maʼin naaʼin na pürekutsootkana süka nakatalüin kaʼi süpüla aʼyatawaa nümüin Maleiwa. ¿Pürekutsooleechi pia?