Tü shiimainkat süchiki Aluwatawaa nutuma Maleiwa
Naashin Jesuu, müinjatü mayaa nanüiki na nikirajüinkana noʼuraajapa: «Taata Maleiwa chakai sirumatuʼu, kasataalejeseʼe shiʼraajüin wayuu tü pünüliakat otta kojutuin pia sutuma. Wachuntuin pümüin puluwataainjachin chaa iipünaajee. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa» (Mateo 6:9, 10, TNM). ¿Paapüitche süchiki sukuwaʼipa Aluwatawaa nutuma Maleiwa? ¿Kasa eeka maaʼulu sutuma tia? ¿Jamüshii wachuntajanaka nuluwataain?
Nia Jesuu Aluwataainjachikai nutuma Maleiwa
Lucas 1:31-33: «Ipooleerü joo pia. Jemeyuleerü pia nümaa wane joʼuu toolo je piʼitaajeerü nünülia chi joʼuukai Jesúsüin. Kojutshaateechi chi joʼuukai nütüma chi Maleiwa Miyoʼushikai maʼi sümaa: ‹pia Tachonka›, nümeechin nümüin. Aneekuushi chi joʼuukai nütüma Maleiwa süpüla nuluwataainjatüin tü wayuu judíokalüirua, tü nuuʼuliwoʼukalüirua Jacob, maa aka nuluwataapüʼüin paala sümaiwa chi putuushikai David. Müichia nnojolin ooʼulaain suulia aluwatawaa».
Shia naashajaapuʼuka maʼin achiki Jesuu tü sukuwaʼipakat Aluwatawaa nutuma Maleiwa
Mateo 9:35: «Shiasa süchikijee tia, oʼunüshi Jesús suluʼupünaa tü pueulokat süpüshua sünain niiyajüin wainma wayuu eekai ayuulin sütüma ayuulii eekai eein neʼe je sünain ekirajaa suluʼu tü ekirajüleekalüirua tü judíokot. Aküjüshi nia tü pütchi anasükat sümüin wayuu, süchiki nukuaippa Maleiwa sünain aluwatawaa».
Nüküjain Jesuu tü shiyaawaseinjatkat sülüʼülaain nükalia süpüla nuluwataain
Mateo 24:7: «Atkaajiraajeerü wayuu sainküin mmakat süpüshua. Mülieerü maʼi saaʼin wayuu sütüma jamü je sütüma ayuulii sainküin mma. Je akutkujaweerü tü mmakat sainküin mma».
Naküjain na nikirajüinkana Jesuu suluʼu Mmakat süpüshuaʼa süchiki tia Aluwatawaakat
Mateo 24:14: «Aküjüneerü sümüin wayuu tü pütchi anasükat, tü süchikikat nukuaippa Maleiwa sünain aluwatawaa. Aküjüneerü sainküin mmakat süpüshua süpüla saapünüinjatüin sütüma wayuu süpüshua. Je kettaapa shia, anteerü sükalia sajaʼlajaainjatkat oʼu tü kasakat süpüshua».