Weeʼiyata nümaain waya Maleiwa waneepia nujuʼitinnapa wanee wapüshi
1. ¿Kaseerü kapüleeka atuma ayatüin nümaain Maleiwa waneepia wanee anoujüshi?
1 Eeshii aire maʼin wapüla na wapüshikana. Makalaka kapüleein maʼin nümüin wanee anoujüshi nujuʼitinnüle naʼakajee na anoujüshiikana jee nujuʼitüle süka naaʼin namüiwaʼa wanee nüchon, nüshi, nuʼwayuuse jee wanee nüpüshi (Mat. 10:37). Wanee anoujüshi nümaaka Maleiwa waneepia, ¿jamüinjatü nukuwaʼipa nümüin chi nüpüshi ojuʼitinnakai? ¿Naatainjatü nukuwaʼipa nümüin chi nüpüshikai kepiale nia nümaa? Wekirajaa sünain tü sümakat tü Wiwüliakat süchiki tia otta jülüja waaʼin nanainpünaain shia na ojuʼitinnakana naʼakajee na anoujüshiikana otta na ojuʼitakana süka naaʼin namüiwaʼa.
2. Saashin tü Wiwüliakat, ¿jamüinjatü nakuwaʼipa na anoujüshiikana namüin na ojuʼitinnakana?
2 Wakuwaʼipa namüin na ojuʼitinnakana. Saashin tü Wiwüliakat na anoujüshiikana nnojoluinjana nanainpünaain na ojuʼitinnakana: ‹Jükatalaa noulia na juwalayuukana eekai naʼluwajiraain nakuaippa sümaa wayuu jierü otta wane jierü nümaa wane toolo, eekai washireein maʼi, eekai kamaleiwaseyaain, eekai mojuin nanüiki sujuuna wayuu, eekai neperüliin, je eekai kemeeraliin sükorolo wayuu. Jükatalaa noulia jaʼitaina jia neenakirüin sünain wane ekawaa namaa. Jujuittira chi kaainjaraikai jaʼakajee› (1 Cor. 5:11-13). Müsia nünüiki Jesuu suluʼu Mateo 18:17, NM: «[Chi wayuu ojuʼitinnakai] müinjachi aka naaʼin wanee wayuu eeka naatain nuumain otta maʼaka naaʼin wanee achekajüi nneerü nümüin chi sülaülashikai mma». Na aapajakana nünüiki Jesuu natüjaa aaʼu nnojoluin aleewain na judíokana namaa na nnojoliikana judíoin otta nnojoishii nanainpünaain na achekajüliikana nneerü nümüin chi sülaülashikai mma. Sükajee pütchikat tia, nuluwataain Jesuu na nikirajüinkana sünain nnojoluin nanainpünaain naya na ojuʼitinnakana (paashajeʼera La Atalaya ojuʼitaka nowienpüroʼu 15, 1981, süpana 12-14).
3, 4. ¿Kasa nnojotka naainjüinjatüin na anoujüshiikana namaa na ojuʼitinnakana otta na ojuʼitakana süka naaʼin namüiwaʼa?
3 Sutuma tia, na anoujüshii nümaakana Maleiwa waneepia nnojoishii aashajaain süchiki anoujaa namaa na ojuʼitinnakana. Akatsaʼa eesü waneeirua kasa sünainpünaaka, saashin tü Wiwüliakat ‹nnojorüleeinjana waya ekaain namaa› (1 Cor. 5:11). Müsüjeseʼe nnojoluin waainjüin wanee kasa namaa, maʼaka saaʼin woʼunüin namaa sünain wanee yonna, ashaittaa woola, sünain ayaʼlajaa, anajaa peliikula otta wekaain namaa wepialuʼu jee suluʼu wanee oikkaalee eküülü.
4 ¿Eeshiiche süpüla waashajaain nümaa wanee ojuʼitinnüshi? Mayaapejeʼe nnojoluin süküjüin tü Wiwüliakat süpüshuaʼa tü waainjüinjatkat, eesü wanee pütchi suluʼu 2 Juan 10, NM wayaawateetka atuma jamüin tia noʼuluʼu Jeowa: «Nüntüle wanee wayuu jünainmüin sümaa nnojoluin nikirajüin tü nikirajakat anain Kürisüto, nnojo jücheküin nia jipialuʼu otta nnojo jüsaküin nia». Müsü La Atalaya ojuʼitaka nowienpüroʼu 15, 1981, süpana 19: «‹¡Jamayaa pia!› wamüle nümüin wanee wayuu, shia tü palajatkat kasa waainjaka süpüla waashajaain otta aleewain waaʼin nümaa. Nnojotsü waainjüin tia nümaa wanee wayuu eeka nujuʼitinnüin naʼakajee na anoujüshiikana».
5. ¿Kasa nnojoluitpaka süpüla naainjüin chi ojuʼitinnüshikai?
5 Müsü sünüiki rewiisütakat tia suluʼu süpana 25: «Wanaa sümaa anain nümüin kaainjalaa wanee anoujüi, ojuʼitinnüshi naʼakajee na anoujüshiikana, sutuma tia nnojoluichipa anain nümüin Maleiwa; [...] nnojoluichipa aleewain namaa na wawalayuukana otta namaa na nüpüshi anoujakana».
6. ¿Choʼujaasüche nnojorüleein na anoujüshiikana nünainpünaain chi napüshi ojuʼitinnakai, kepiakai namaa? Püküja jamüsü maka pünüiki.
6 Kepiajiraale nia namaa. ¿Jama kepiale na anoujüshiikana nümaa wanee napüshi eekai nujuʼitinnüin? ¿Eeshiiche süpüla nekaain nümaa, naashajaain jee naainjiraain wanee kasa naainjapuʼuka weinshi? Müsü sünüiki tü pütchi ashajünakat wünaapünaa sünain süpanaka 22, suluʼu La Atalaya ojuʼitaka awüriiroʼu 15, 1991: «Eere wanee ojuʼitinnüshi kepiajiraain namaa waneeinnua anoujüshii, ayatayüiya nia nanainpünaain otta sünainpünaain tü kasa aainjünawaikat weinshi nepialuʼu». Nayainjana na nüpüshikana aneekaka kasain naainjüinjatüin nümaa maʼaka saaʼin ekawaa jee waneeirua kasa naainjaka nipialuʼu. Akatsaʼa jülüjüinjatü naaʼin nnojoluinjatüin süntüin nekiiruʼumüin na nawalayuukana ayatüin anajiraain naya nümaa chi napüshikai süchikijee nujuʼitinnüin.
7. ¿Kasa aʼwanajaaka sünain nakuwaʼipa na anoujüshiikana nümüin wanee napüshi ojuʼitinnüshi?
7 Müsü La Atalaya ojuʼitaka nowienpüroʼu 15, 1981, süpana 22 nachiki na ojuʼitinnakana naʼakajee na anoujüshiikana otta na ojuʼitakana süka naaʼin namüiwaʼa: «Nnojoluichipa nanainpünaain nia sünain anoujaa. Müinjatia nakuwaʼipa na nüpüshi pejekana nünain chi ojuʼitinnakai. [...] Nnojoluitpa naainjüin wanee kasa sünainpünaaka tü anoujaakat naainjapuʼuka nepialuʼu. Wanee shiyaawase: niale ojuʼitinnüin suʼwayuuse wanee wawala, nnojoleerü anain saaʼin namaa süchonnii niale oʼunirüin tü aʼwaajaakat Maleiwa sümaa nüpüshi, aashajeʼeraa tü Wiwüliakat otta sünain oʼuraajaa. Nuʼuraajeere süpülapünaa ekaa, eesü süpüla naainjüin shia süka nipialuʼujuchin nia. Akanasaʼa na waneeinnua eesü süpüla noʼuraajüin waneʼewai nakua suluʼu naaʼin nümüin Maleiwa. (Pro. 28:9; Sal. 119:145, 146) ¿Jama yaleere chi ojuʼitinnüshikai saʼaka nüpüshi wanaa sümaa naashajeʼerüinjatüin tü Wiwüliakat jee nekirajaainjanale? Eeshi süpüla nooʼulaain yalain nia namaa süpüla naapajüin neʼe, nnojoishi nia ekirajüinjachin otta nüküjüin tü nunoujakat anain».
8. ¿Kasa naainjüinjatka na kachonshiikana nüka wanee nachon ojuʼitinnüshi kepiayüika namaa?
8 Nujuʼitinnüle wanee jintüi kepiayüika namaa na kachonniikana nia, ayatüinjachi nepijüin. Müsü La Atalaya ojuʼitaka nowienpüroʼu 15, 1988, süpana 20: «Maʼaka ayatajatüin naapüin niküin otta nüsheʼin, nekirajüinjachi otta nachiaainjachi nia wanaapünaa sümaa tü nümakat Maleiwa. (Proverbios 6:20-22; 29:17) Makalaka eein süpüla nikirajünüin natuma na kachonniikana nia mayaapejeʼe nujuʼitinnüin. Eesü nünoukteʼerüle nukuwaʼipa sutuma nikirajünüin nümüiwaʼa. Eeshii namüle na kachonniikana nia eein süpüla sünainpünaain nia tü aʼwaajaakat Maleiwa sümaa napüshi» (paashajeʼera La Atalaya ojuʼitaka ouktupüroʼu 1, 2001, süpana 16, 17).
9. ¿Jamüinjatü nakuwaʼipa na anoujüshiikana nümüin wanee napüshi ojuʼitinnaka, nnojoika kepiain namaa?
9 Nnojoire kepiajiraain nia namaa. Müsü La Atalaya ojuʼitaka awüriiroʼu 15, 1988, süpana 28: «Naata tü aainjünajatkat nnojoire kepiain sümaa nüpüshi chi ojuʼitinnüshikai jee chi ojuʼitakai süka naaʼin nümüiwaʼa. Na nüpüshikana nnojoluinjana nünainpünaain. Nnojoishii aashajaainjanain maʼin naya namaa, jaʼitairü naashajaainjatüin süchiki wanee kasa alataka sümüin napüshi». Naainjüinjatü tia, wanaapünaa sümaa tü nümakat Maleiwa ‹nakatalaainjanain nuulia eekai› kaainjaralin waneepia (1 Cor. 5:11). Na nümaakana Maleiwa waneepia nnojoluinjana nanainpünaain napüshi eeka müin nakuwaʼipa, nnojoluinjana aʼyataajiraain namaa (paashajeʼera La Atalaya ojuʼitaka nowienpüroʼu 15, 1981, süpana 23, 24).
10, 11. ¿Kasa jülüjüinjatka naaʼin wanee anoujüshi süpülapünaa kepiain nümaa wanee nüpüshi ojuʼitinnüshi?
10 Müsü sünüiki tia rewiisütakat süchiki wanee kasa eeka süpüla alatüin: «¿Jama nujuʼitinnüle napüshi wanee wawalayuu, maka naaʼin wanee nachon jee nashi nnojoikai kepiain namaa, akaisaʼa ouyanteeshi nia nüchikuaʼa eemüin na nüpüshikana? Naneeküinjatü na nüpüshikana tü naaʼinrajatkat wanaapünaa sümaa tü alatakat nümüin. Maʼaka saaʼin ayuuire wanee ojuʼitinnüshi eeka laülaaichin jee shiale wanee ojuʼitinnüsü, manneetsere nia otta isale nüchiki naaʼinmajiraain nukuwaʼipa nümüiwaʼa. Na nachonniikana nakaaliinjüinjana naya sünain tü choʼujaakat namüin süka nuluwataain shia Maleiwa. (1 Tim. 5:8) [...] Süpüla naainjüin tia, jülüjüinjatü maʼin naaʼin kasain choʼujaain nümüin chi nüshikai, jamüin nukuwaʼipa otta shikiipüʼüle nia nüpüshi, jülüjüinjatü naaʼin jameerüin nanoula na kepiakana nümaa» (paashajeʼera La Atalaya ojuʼitaka nowienpüroʼu 15, 1981, süpana 22, 23).
11 Otta müsü sünüiki tia rewiisütakat namüin na ojuʼitinnakana achonnii: «Eeshii anoujüshii ooʼulaaka nüleʼejüin nepialuʼumüin soʼu palitchon kaʼi wanee nachon ojuʼitinnaka, naainjüin tia ayuuire nia. Sülatüle tia, jülüjüinjatü naaʼin na kachonniikana nia jamüin nukuwaʼipa. ¿Kepiapuʼushi nümüiwaʼa chi nachon ojuʼitinnakai? ¿Nnojoluitpa süpüla naainjüin shia? ¿Aleʼejeeshi neʼe nia nepialuʼumüin shiiʼiree aneein nukuwaʼipa sünainjee nüpüshi? ¿Jamüsü nukuwaʼipa? ¿Ekirajeechi «alawaa» nepialuʼu?—Gal. 5:9».
12. ¿Kasa eeka sutuma nujuʼitinnüin wanee wayuu kiʼrakai sünain kaainjalaa?
12 Tü eekat sutuma nümaain waya Maleiwa waneepia. Aneerü wakuwaʼipa woonoole sümüin tü sümakat tü Wiwüliakat nnojoluinjanain nanainpünaain waya na ojuʼitinnakana otta na kiʼrakana sünain kaainjalaa. Wulesü nakuwaʼipa na anoujüshiikana otta eʼnnaajünüshii naya süka naainjüin tü sümakat tü Wiwüliakat (1 Ped. 1:14-16). Saaʼinmajüin waya suulia tü akuwaʼipaa yarüttüsükat (Gal. 5:7-9). Otta müsia, eesü süpüla anain nukuwaʼipa chi kaainjaraikai sünainjee nüchiaanüin jee «eesü anaa sutuma maʼaka saaʼin lotoo akuwaʼipaa» (Heb. 12:11, NM).
13. ¿Kasa naainjaka waneeinnua wawalayuu süka nei? ¿Kasa eeka sutuma tia?
13 Süchikijee naapajüin piamashii wawalayuu wanee pütchi sünain wanee outkajawaa miyoʼu piamaka kaʼi nayaawata aaʼu nanoukteʼerüinjatüin nakuwaʼipa sünainmüin tü neikat, nnojotsü kepiain shia namaa otta aipiruairü juya süchikijee sujuʼitinnüin. Sajaʼttapa tü outkajawaakat, neenajüin shia otta naküjaka sümüin alin shia napüla akatsaʼa nnojoluinjanain aashajaain naya sümaa, aluʼusaʼa kasale alatüin sümüin napüshi. Süchikijee tia, oʼunawaisü tü neikat sünain tü outkajawaakat, mapa achekünüsü süchikuaʼa. Jee chi suʼwayuusekai oʼttüshi sünain ekirajawaa sünain tü Wiwüliakat otta woutiisaka nia.
14. ¿Jamüshii woonooinjanaka sümüin tü sümakat tü Wiwüliakat nnojoluinjanain nanainpünaain waya na ojuʼitinnakana?
14 Woonoole sümüin tü sümakat tü Wiwüliakat nnojoluinjanain nanainpünaain waya na ojuʼitinnakana, weeʼiyatüin alin wapüla Jeowa otta asouktüshii waya nümüin chi ojuyaajakai nia (Pro. 27:11). Sutuma waainjüin tia, aneerü wakuwaʼipa nutuma Maleiwa. Müshi chi aluwataaikai David: «Nnojoleechi akatalaain taya suulia tü nuluwataakat anain. Waneepieechi pia nümaa chi waneepiakai pümaa» (2 Sam. 22:23, 26, NM).