Wayaawatira naya tü pütchi wekirajakat
1. ¿Jarat tü aküjalaa wekirajaainjatkat anain suluʼujee tü Wiwüliakat? ¿Jamüsü wekirajaainjatka sünain?
1 Tü pütchi nikirajakat chi aluwataaushikai Pablo suluʼu tü ekirajüleekat na judíokana chaaʼaya Antioquía suluʼusü Aluwataaushikana 13:16-41, anasü süpüla washatüin sünain ayaawatiraa na wayuukana tü pütchi wekirajakat. Nuʼwanajeʼerüin sukuwaʼipa nikirajia Pablo wanaapünaa sümaa tü jülüjakat naaʼin na wayuu nikirajakana otta jalejeʼewaliin naya. Wekirajaa sünain süpüla waaʼinrüinjatüin shia sünain tü aküjaakat pütchi.
2. ¿Kasa shikirajaka anain waya nuʼttia Pablo sünain ekirajaa?
2 Waashajaa süchiki tü kasa eʼraajünakat. Mayaapejee niain naashajaain maʼin achiki Jesús süka sünainpünaain nia shikeraajia tü keeʼireekat naaʼin Maleiwa, nnojoishi oʼttuin Pablo sünain aashajawaa süchiki tia. Shia naashajaaka achiki nakuwaʼipa na israeliitakana, niʼraajaka wanaajiraa namaa na judíokana (Aluw. 13:16-22). Meena wayakana anteena suluʼumüin naaʼin na wayuukana waashajaale süchiki tü kasa weʼraajakat wanaajiraa namaa. Süpüla watüjaain saaʼu tü jülüjakat naaʼin anainjatü sukuwaʼipa tü wasakirakat anain naya otta waapajüinjatü nanüiki.
3. ¿Jamüsü kapüleeka namüin na nikirajakana Pablo anoujaa sünain niain Jesús chi Mesías aküjünakai achiki paala?
3 Wanaa sümaa naashajaain Pablo süchiki nakuwaʼipa na israeliitakana, nüsoʼirüin naaʼin na wayuukana sünain nuluwataainjachin Maleiwa wanee oʼtteʼerüi nuuʼuliwoʼu David. Akatsaʼa wainma judío aʼatapajaka wanee sülaüla surulaat taashinjanaka atuma naya noulia na romanokana otta yaletüinjatü noumain suulia waneeirua mma. Nekiipuʼu na judíokana sünain anoujaa nayouktüin otta naapüin nikii Jesús namüin na aluwataakana Roma süpüla noʼutuin naaʼin, tia natüjaa aaʼu na nikirajüinkana Pablo. ¿Kasa naaʼinrajatka Pablo süpüla nunoujirüin naya sünain niain Jesús chi Mesías aküjünakai achiki paala?
4. ¿Jamüsü süpüla niyaawatirüin Pablo na judíokana tü pütchi nüküjakat?
4 Waʼwanajeʼera sukuwaʼipa wekirajia. Süka nütüjaain saaʼu Pablo tü suluʼukat nekii na wayuukana, niyaawatirüin naya tü pütchi nüküjakat sükajee tü Wiwüliakat otta tü kasa nanoujakat anain. Niiʼiyatüin nuuʼuliwoʼuin David Jesús chi naashajaakai achiki Juan chi Awoutisaajüikai otta nünüikimaajachi Maleiwa saashin wayuu (Aluw. 13:23-25). Naashin Pablo «shia ekeraajaka [...] tü namakat na nünüikimaajanakana Maleiwa» natuma nekiipuʼu na judíokana sünain anoujaa süka nayouktüin otta noʼutirüin naaʼin Jesús (Aluw. 13:26-28). Süchikijee nüküjaka eejatüin wayuu eʼraka Jesús wanaa sümaa nüsoʼireʼennüin aaʼin otta naashajeʼerüin suluʼujee tü Wiwüliakat tü pütchi ekeraajakat soʼu tia (Aluw. 13:29-37).
5. 1) ¿Jamüsü sukuwaʼipa suʼwanajeʼeria nünüiki Pablo namüin na griegokana? 2) ¿Jamüsü süpüla washatüin nukuwaʼipa Pablo wanaa sümaa waküjüin pütchi?
5 Wanaa sümaa naashajaain Pablo namaa na griegokana suluʼu tü Areópago chakat Atenas nuʼwanajeʼerüin sukuwaʼipa nikirajia (Aluw. 17:22-31). Mayaapejee naainjüin tia, wanaawasü tü pütchi nikirajakat anain otta anoujusü wayuu sutuma (Aluw. 13:42, 43; 17:34). Müsia maaʼulu, aneerü sukuwaʼipa wekirajia waashajaale süchiki kasa eeka weʼraajüin wanaajiraa namaa na wayuukana otta jülüjüle waaʼin jalejeʼewaliin naya otta tü jülüjakat naaʼin.