Kojutuinjatü namüin tü nukuwaʼipakat Jeowa
1 Aküjaa pütchi nnojotsü shiain neʼe ekirajaa süchiki tü kasa mapüleesat shikirajakat tü Wiwüliakat: Wakaaliinjüin na wayuukana sünain eʼraajaa Jeowa otta süpüla kojutuinjatüin namüin tü nukuwaʼipakat. Wanaa sümaa natüjaain saaʼu na wayuukana tü shiimainkat nüchiki Maleiwa keeʼireesü naaʼin naʼwanajaain nakuwaʼipa süpüla «aaʼinraa süpüshuaʼa tü nüchekakat [Jeowa, NM]» (Col. 1:9, 10; 3:9, 10).
2 Wanee karaloukta jeketü süpüla ekirajaa. Suʼttiajee tü karalouktakat kasa shikirajaka aashajaasü maʼin süchiki nukuwaʼipa Jeowa. Tü palajatkat ekirajaaya süsouktüin asakiraakalüirua tüü: ¿Shiimain naaʼinmajüin waya Maleiwa?, ¿Jamüsü nukuwaʼipa Maleiwa? Otta ¿eesü süpüla warütkaain nünainmüin? Shiiʼiyatüin maainjalain Jeowa (püt. 10); lotusü nukuwaʼipa otta amüliajüi wayuu (püt. 11); aipürai (püt.13); pülashi (püt. 16); amüliajüi, anashi maʼin, motusü naaʼin waainjala, kamaʼashi süpüla jashichijawaa otta maainjalasai (püt.19). Müsü sajaʼttiamüin tü pütchikat 20: «Pikirajaale maʼin nünain shiimainjeechi eein nia pümüin, aijeechi püpüla otta pümaajeechi nia».
3 Süpüla narütkaain na wekirajüinkana nünainmüin Jeowa ¿jamüinjatü nekirajia watuma sükajee tü karalouktakat Kasa shikirajaka? Süchikijee waashajeʼerüin wanee pütchi aashajaaka süchiki nukuwaʼipa Jeowa eesü süpüla wasakirüin: «¿Kasa shiiʼiyataka pümüin nüchiki Jeowa? ¿Jamüsü shiiʼiyataka pümüin naaʼinmajüin pia Maleiwa?» Wanaa sümaa waainjüin asakiraa maʼaka saaʼin tüü, wekirajüin naya sünain asakireʼeraa naaʼin sünain tü nekirajaakat anain otta wakaaliinjüin naya süpüla kojutuin namüin tü nukuwaʼipakat Jeowa.
4 Pikiraja süka «tü shikirajakat tü Wiwüliakat». Sajaʼttiamüin wanee ekirajaaya puchunta namüin na pikirajüinkana naashajaaiwa süchiki «tü shikirajakat tü Wiwüliakat». Paashajeʼera namüin tü pütchi suluʼujeejatkat tü Wiwüliakat. Süpüla watüjaainjatüin saaʼu tü suluʼukat naaʼin na wekirajüinkana eesü süpüla wasakirüin: «¿Jamüsü saaʼin pümüin tü sümakat tü Wiwüliakat süchiki akuwaʼipaakat tüü?» Wanaa sümaa waainjüin tia nnojoleena waya aashajaain müleʼe süchiki tü shikirajakat maʼin wanee ekirajaaya, eesü wanee kasa anasü waainjaka: shia atüjawaa saaʼu tü nanoujakat anain na wekirajüinkana otta sükaaliinjeena naya süpüla aleewaa nümaa Jeowa.