Karaloukta suluwataaka Weteet

Na aküjülii pütchi aikana wapüla:

Anasü maʼin tü aʼyatawaa jaaʼinrakat maʼin soʼu tü juyakat 2008, jiakana 403.008 aküjülii pütchi suluʼu tü mmakat Ecuador, Perú, Venezuela otta Colombia. Naʼakajee napüshuaʼa na aküjüliikana pütchi eeshii 57.604 aʼyataashii 70 oora sünain aküjaa pütchi kashiwai, anashaatasü maʼin tü naaʼinrakat otta natütüleʼerüin naaʼin na wawalayuukana suluʼu tü outkajaaleekat (Tito 2:14).

Otta taasia soʼu tü kashikat eere sotuin waaʼin ouktuin Jesús, wainma na wawalayuu aʼyataakana 50 oora sünain aküjaa pütchi. Soʼu tü kashikat maatsoʼu eeshii 43.084 wawalayuu aküjakana maʼin pütchi soʼu tia, soʼu kashika apüriit eeshii 24.151 otta maayoʼu eeshii 20.758. Sutuma ‹naʼyataain süka süpüshua naaʼin› na wawalayuukana talatüshii na waneeinnua (Rom. 12:11).

Sutuma jiʼyataain maʼin sünain tü sünainpünaakat Nuluwataaya Maleiwa eesü kasa anasü nutuma Jeowa maʼaka naaʼin na 641.420 wayuu ekirajaakana sünain tü Wiwüliakat. Soʼu juyakat tüü akumajünüsü 125 piichi outkajaalee otta anoʼuteʼennüsü 35; sutuma tia outkajaashii na wayuukana süpüla nekirajünüin nutuma Jeowa (Isa. 2:3).

Suluʼu tia pienchisükat mma outkajaashii 1.351.292 wayuu süpüla sotuin naaʼin tü kaʼi ouktakat oʼu Jesús, aainjünüsü tia saawanoʼu 22 maatsoʼu soʼu tü juyakat 2008. Wainma maʼin na wayuukana noulia na aküjüliikana pütchi, tia shiiʼiyatüin wamüin kooʼomüinjeena waya.

Wachuntuin nümüin Jeowa süpüla anain wakuwaʼipa sünain aküjaa pütchi süchiki tü Nuluwataayakat otta nnojoluinjanain wooʼulaain suulia. Wawalayuu, aishii jia wapüla.

Na juwalayuukana,

Piichi Weteet