Pikiraja naya süpüla alinjachin Jeowa napüla
1. ¿Jamüshii narütkaaka na wayuukana nünainmüin Jeowa?
1 ¿Sotusü paaʼin wanaa sümaa süküjünüin nüchiki Jeowa pümüin? ¿Kasa pürütkaaka atuma Nünainmüin? Naashin noʼutku na wayuukana shia sutuma neʼraajüin tü nukuwaʼipa anashaatakat maʼaka saaʼin amüliajülin otta aipüralin nia (1 Juan 4:8).
2, 3. ¿Jamüinjatü nakaaliinjia na wekirajüinkana süka tü karalouktakat Kasa shikirajaka süpüla alin maʼin Jeowa napüla?
2 «Chii nia chi Wamaleiwasekai.» Tü karalouktakat Kasa shikirajaka shiiʼiyatüin maʼin aipüralin Jeowa otta choʼujaain maʼin aleewaa nümaa. ¿Kasa waainjüinjatka süpüla wakaaliinjüin na wayuukana süka karalouktakat tüü süpüla alin Maleiwa napüla? Wanaa sümaa wekirajüin naya sünain wanee kasa jeketü, wasakirüinjana jamüin nanüiki süchiki sükajee asakiraakat tüirua: «¿Kasa shikirajaka pütchikat tüü nüchiki Jeowa?» jee «¿Jamüsü shiiʼiyatia sutuma pütchikat tüü niain Jeowa anaka süpüla Washin?». Tü keeʼireekat waaʼin, shia wakaaliinjeein na wekirajüinkana süpüla aleewain naya waneepia nümaa Jeowa.
3 Wanaa sümaa nayaawatüin na wekirajüinkana anain maʼin ekirajawaa nünain chi Maleiwa shiimainshikai, meerü nanüiki maʼaka naaʼin Isaías chi nünüikimaajachikai Maleiwa: «Chii nia chi Wamaleiwasekai» (Isa. 25:9). Wanaa sümaa wekirajüin süchiki tü nünüikikat Maleiwa, weeʼiyatajatü namüin tü kasa anasü neʼrüinjatkat na wayuukana shikeraajapa tü keeʼireekat naaʼin Jeowa sükajee nuluwataaya Jesucristo (Isa. 9:6, 7).
4, 5. ¿Kasa weeʼiyatüinjatka aka alin wapüla Jeowa?
4 Shiiʼiyatia naalii Jeowa wapüla. Naalii Jeowa nnojotsü weeʼiyatüin müle shia süka süpüshuaʼa waaʼin, wakuwaʼipa otta wekii. Choʼujaasü wanaawainjatüin waaʼin nümaa otta wooʼulaain nuʼunirüin wakuwaʼipa (Sal. 97:10). Weeʼiyatüin alin wapüla Maleiwa wanaa sümaa ‹waaʼinrüin waneepia tü nüchekakat wapüleerua otta waaʼinrüin kasa anasü›, jaʼitaina müliain jee apüleeruaanüin waaʼin (2 Ped. 3:11; 2 Juan 6).
5 Talatüshii maʼin waya wanaa sümaa waaʼinrüin tü nuluwataakat anain waya Maleiwa süka alin nia wapüla (Juan 4:34). Süpülapünaa tia, nayaawatüinjatü aaʼu na ekirajaakana süpüshuaʼa tü nuluwataakat anain Maleiwa süpülajatü anain nakuwaʼipa waneepia na aʼyataashiikana nümüin. Weeʼiyatüin kojutuin wamüin tü kasa anasü naapakat Maleiwa wanaa sümaa wooʼulaain nuʼunirüin wakuwaʼipa (Deu. 10:12, 13). Piiʼiyata namüin na pikirajüinkana nnojoleerüin neʼrüin müliaa otta mojuu aaʼin müleka naainjüle tü nuluwataakat anain Jeowa.
6. ¿Kasa naapaka Jeowa namüin na aikana apüla nia?
6 Kasa anasü eeka namüin na aikana apüla Maleiwa. Jülüjüshii naaʼin Jeowa na aikana apüla nia otta niiʼiyatüin namüin tü kasa ‹nnojotkat eʼnnüin sümaa sütüjaanüin aaʼu sütüma wayuu› (1 Cor. 2:9, 10). Sükajee natüjaain saaʼu tü naaʼinrajatkat Maleiwa mapeena eesü wanee kasa naʼatapajaka sümaa natüjaain saaʼu shikeraajeerüin (Jer. 29:11). Sutuma tia, natüjaa aaʼu naapeerüin Jeowa wainma kasa anasü namüin na aikana apüla nia (Éxo. 20:6). Talatüshii maʼin naya sümaa naʼatapajüin tü kataa oʼu waneepia naapüinjatkat Jeowa süka alin naya nüpüla (Juan 3:16).
7. ¿Jamüsü saaʼin pümüin ekirajaa wayuu süpüla alinjachin Jeowa napüla?
7 Weʼraajüle maʼin chi Washi Iipünaajachikai, waküjeerü nüchiki namüin na wayuukana (Mat. 13:52). ¡Anakatche maʼin ekirajaa na wayuukana! Maʼaka naaʼin na wachonniikana süpüla alin Jeowa napüla (Éfeso 6:4). Wayakana otta na wekirajüinkana talatajana waneepia sünain aʼwaajaa Jeowa süka wainmain kasa anasü naapaka wamüin (Sal. 145:7).