«Ayata alin jüpüla Maleiwa»
1. ¿Kasapülajatü tü karalouktakat «Ayataa alin jüpüla Maleiwa»?
1 Soʼujee tü semaana oʼttakat akoosütoʼu 15, ekirajaweena waya sünain tü karalouktakat «Ayata alin jüpüla Maleiwa» sünain tü outkajawaakat, Ekirajawaa sünain tü Wiwüliakat namaa na Wawalayuukana. ¡Keeʼireesü waaʼin wekirajaain sünain! ¿Aashimüin? Tü karaloukta naluwataakat na Laülaayuu nekiipüʼükana na aküjüliikana pütchi nüchiki Jeowa namüin na aikana apüla Maleiwa müsü sajaʼttiamüin: «Keeʼireesü maʼin waaʼin sükaaliinjüin waya karalouktakat tüü süpüla ayatüin waainjüin tü sümakat tü Wiwüliakat otta sükajee tia ayateechi ‹alin wapüla Maleiwa, sümaa waʼatapajüin katüinjatüin woʼu waneepia› (Judas 21, NM)».
2. ¿Kasa sükaaliinjeenaka anain waya tü karaloukta jeketkat?
2 Ekirajaanajatka anain. Wekirajaajeerü anain tü sümakat tü Wiwüliakat süpüla waneeküin waʼaleewainyuu, tü kasa washaittüinjatkat aka, tü kasa waainjakat, tü kasaalüükat, kojutüin wamüin na laülaakana waaʼu, anain wanüiki otta tü wakuwaʼipakat. Sükajee karalouktakat tüü, saainjeerü tü waaʼinkat tü nümakat Maleiwa suluʼu tü Wiwüliakat (Sal. 19:7,8). Weʼraajüle maʼin Jeowa oonoweena waya nümüin sünain süpüshuaʼa tü kasakalüirua süpüla talatüin nia watuma (Prov. 27:11; 1 Juan 5:3)
3. ¿Jamüshii wasouktüinjanaka sünain tü ekirajaanajatkat anain semaanawai?
3 Püsoukta sünain. Yapa pia süpüla puʼwaajüin Jeowa süka tü pünüikikat sünain tü outkajawaakat (Heb. 13:15, NM). Ekirajaainjana napüshuaʼa na wawalayuukana sünain tü karaloukta jeketkat. Süka palitchoin tü pütchi wekirajaainjatkat anain, wekirajaajeerü maʼin anain süpüla waküjüin tü watüjaakat aaʼu. Anale maʼin shikeraajia tü wanüikinjatkat otta motsomüinre shia watuma, wakaaliinjeena na waneeinnua sünain ‹kamaneejirawaa je sünain naaʼinrüin tü anasükat› otta aneerü maʼin sukuwaʼipa tü ekirajawaakat (Heb. 10:24). Talateena waya süka weeʼiyatüin süka wanüiki tü wanoulakat.
4. ¿Jamüsü choʼujaaka maʼin woonooin nümüin Jeowa?
4 Süpülapünaa nuʼutünüin aaʼin Jesuu nüküjüin choʼujaain woonooin nümüin Jeowa süpüla ayatüin alin nia wapüla (Juan 15:10, NM). Sükaaliinjeena waya tü karalouktakat Ayata alin jüpüla Maleiwa süpüla waaʼinrüin waneepia tü sümakat tü Wiwüliakat otta süpüla ‹ayatüin alin wapüla Maleiwa› (Judas 21, NM).