¿Eesü süpüla kooʼomüin waʼyataain sünain aküjaa pütchi?
1. ¿Kasa choʼujaaka maʼin sünain tü aküjaakat pütchi? ¿Jamüsü choʼujaaka shia?
1 Wanaa sümaa niʼrüin Jesús na wayuukana sünain naapajeein tü pütchi jeketkat süchiki Nuluwataaya Maleiwa, müshi nia namüin na nikirajüinkana: «Juchunta jumaala nümüin chi Tashikai Maleiwa süpüla nuluwataainjanain na wayuu aküjüinjanakana tachiki namüin» (Mat. 9:37, 38). Süka sülüʼülüin tü kaʼi sajaʼlajaainjatkat oʼu sünain sükotchojünüin tü wayuukalüirua, choʼujaasü maʼin waküjüin pütchi. Makalaka anain wachuntüle kaaliinwaa nümüin Maleiwa süpüla watüjaain saaʼu maka eere süpüla kooʼomüin waʼyataain sünain aküjaa pütchi (Juan 14:13, 14).
2. ¿Kasa naainjaka noʼutku na wawalayuukana wanaa sümaa süküjünüin choʼujaain nooʼomüin aküjülii pütchi?
2 Kooʼomüin waʼyataain. Wainma na wawalayuu pürekutsootkana sutuma nuʼunirüin otta nükaaliinjüin naya Jeowa (Sal. 26:2, 3; Fili. 4:6). Eeshii na achajaakana maʼin sukuwaʼipa süpüla pürekutsoolüinjanain aaʼusiliaat soʼu wanee jee kojuya kashi soʼu tü juyakat. Sutuma tia, kooʼomüinsü naʼyataain sünain aküjaa pütchi. Wainma na talatakana sutuma tia otta neʼitaain napüleerua pürekutsoolüinjanain rekulaat naya (Aluw. 20:35).
3. Pürekutsootpuʼule pia, ¿kasa eeka süpüla jülüjüin paaʼin maaʼulu?
3 Pürekutsoot pia püchikuaʼa. Pürekutsootpuʼule pia, sotusü paaʼin wainma kasa anasü sünainjee. ¿Paashajaaichi amaa Jeowa süpüla pürekutsoolüin pia püchikuaʼa? Eesü nnojoluitpale eein tü kasa puuʼulaakat atuma pürekutsoolüin pia otta eesü süpüla paaʼinrüin süchikuaʼa tia aʼyatawaa anakat maʼin (1 Juan 5:14, 15).
4. ¿Kasa eeka süpüla waaʼinrüin wapüshuaʼa?
4 Wainma na wayuu akotchojünajanakana otta alüʼütsü süpüla sajaʼlajaain aʼyatawaakat tia (Juan 4:35, 36). Wapüshuaʼa wasakireʼerüinjatü waaʼin sünain wakuwaʼipa eere süpüla kooʼomüin tü waʼyataainkat sünain aküjaa pütchi. Nnojorüle süpüla waaʼinrüin shia, ana maʼin süküjia watuma tü pütchikat (Mar. 12:41-44). Müleka eere süpüla pürekutsoolüin rekulaat pia paainja shia süpüla piʼyataain nümüin Jeowa. ¡Nnojo piyouktüin tia aʼyatawaa anakat maʼin! (Sal. 110:3.)