Sükaaliinjüin waya tü outkajawaa miyoʼu piamakat kaʼi süpüla waaʼinmajüin wanoula
1. ¿Jarat tü wanee kasa nükaaliinjakat aka waya Jeowa süpüla waküjüin süchiki tü pütchi anasü nuluwataakat anain waya?
1 Naapüin wamüin Jeowa süka naaʼin tü pütchi yapainjanakat atuma waya otta tü atütüleʼerüinjatkat waaʼin süpüla waküjüin süchiki tü pütchi anasü nuluwataakat anain waya (Mat. 24:14; 2 Tim. 4:17). Wanee kasa naapaka wamüin Jeowa shia tü outkajawaa miyoʼu piamakat kaʼi aainjünaka juyawai. Soʼu tü juyakat 2010 wekirajaajeerü anain tü waaʼinrajatkat süpüla waaʼinmajüin tü wanoulakat. Suluʼujeejatü Roma 8:5 otta Judas 17-19, oʼtteerü soʼujee tü semaana oʼttakat akosütoʼu 31 soʼu 2009.
2. (1) ¿Jamüsü aneetka wakuwaʼipa sutuma tü outkajawaa miyoʼu piamakat kaʼi? (2) ¿Jamüsü pükaaliinjia sünain aküjaa pütchi sutuma waneeirua outkajawaa miyoʼu piamaka kaʼi?
2 ¿Jameerü wakuwaʼipa sutuma? Tü pütchi ekirajaanajatkat anain saapireena waya süchiki tü kasa mojusü eekat süpüla suuʼuleʼerüin waya suulia jülüjüin waaʼin tü kasa kojutükat maʼin. Watüjaajeerü aaʼu tü waaʼinrajatkat süpüla nnojoluin waaʼinrüin tü keeʼireekat neʼe waaʼin otta wekirajaajeerü anain tü naatakat atuma sukuwaʼipa wanee wayuu anaka anoula. Rimiinkoʼu eejeerü waneeirua pütchi eeʼiyatüinjatka wamüin tü waaʼinrajatkat waneʼewai wakua jee sümaa wapüshi süpüla ichein wanoula otta eejiraain waya sümaa tü ooʼulakünakat aka waaʼin weinshi. Süka palitchon pütchi, tü wekirajaainjatkat anain sükaaliinjeena waya süpüla waaʼinmajüin tü waaʼinkat, anainjatüin wanoula otta jülüjüin waaʼin tü kasa anasü eeinjatkat namüin na aaʼinmajakana nanoula.
3. ¿Joujeerü saainjünaka tü outkajawaa miyoʼu piamakat kaʼi? ¿Kasa waaʼinrajatka?
3 Pütüjaapa saaʼu jalainjatüin otta joujainjatüin saainjünüin tü outkajawaa miyoʼu piamakat kaʼi puʼunajatka anain. Yapa pia süpüla puʼunüin soʼu tü piamakat kaʼi otta jülüjüin paaʼin tü pütchi ekirajaanajatkat anain. Soto paaʼin anain sukuwaʼipa nutuma Jeowa tü naainjakat wanee wayuu eeka tütüin (Pro. 21:5).
4. ¿Kasa aapüneetka wamüin sünain tü outkajawaa miyoʼu piamakat kaʼi?
4 Chi Aapakai tia kasa anasükat nia neʼe Jeowa. Tü ekirajawaa yapakat nutuma chi achepchiee oonookai waneepia sükaaliinjeena waya süpüla ayatüin waküjüin pütchi. Waapüin tü analuʼutkat nümüin Jeowa saaʼu süpüshuaʼa tü kasa anasü naapakat wamüin süpüla «waküjaain sümüin wayuu sünain waʼatapajüin tü naaʼinrüinjatkat chi Maleiwakai wapüla, anakaja wachecherüle waaʼin sümaʼinruʼu nikeraajüin shia» (Heb. 10:23-25; Sant. 1:17).