Waʼwaaja Jeowa weinshi
1. ¿Kasa keeʼireeka waaʼin wayakana aʼyataaliika nümüin Maleiwa? ¿Jamüsü keeʼireeka waaʼin shia?
1 Naashin chi aluwataashikai David nuʼwaajeein maʼin Jeowa «soʼukai [...] süpüla kaʼika süpüshuaʼa» (Sal. 145:2, 7, 21). Müshiʼiya wayakana wainma kasa waʼwaajüinjachika anainjee Jeowa weinshi (Sal. 37:10; 145:14, 18; 2 Ped. 3:13).
2. ¿Kasa waaʼinrajatka süpüla waʼwaajüin Jeowa weinshi wepialuʼu?
2 Wepialuʼu. Wainma karaloukta wamaʼana anaka süpüla waashajaain süchiki tü kasa nünainpünaakat Maleiwa wanaa sümaa wekirajaain sünain tü karaloukta aashajeʼennakat weinshi, Ekirajawaa sümaa Wapüshi otta wekeraajapa süpülapünaa tü outkajawaakat. Wainma na apüshii kottiraawaikana watua süpüla kaʼika sünain ekawaa, sutuma tia anasü nakuwaʼipa sünain yootirawaa sümaa nnojoluin nashapajaain otta naʼwaajüin Jeowa sükajee. Anashii noʼttüle na ashiikana palajana sünain aashajawaa süchiki tia, sükaaliinjeena naya süpüla nepijain nachonnii ‹sünain tü nuluwataakat anain chi Maleiwakai. Sünain nachiajaain naya› (Éfe. 6:4; Deu. 6:5-7).
3. ¿Kasa eeka süpüla waainjüin namaapa waya na wawalayuukana?
3 Namaa na wawalayuukana. Eeshi süpüla waʼwaajüin Jeowa namaa na wawalayuukana wanaa sümaa waküjüin pütchi otta woutkajaapa namaa (Pro. 15:30; Fili. 4:8; Heb. 13:15, NM). Paaʼinwajiraashii waya namaa süka alin wapüla Jeowa. Sutuma tia, anasü maʼin wanüiki waashajaapa namaa süchiki tü kasa anasü naainjakat Jeowa wapüleerua (Sal. 106:1).
4. Nnojorüle süpüla waküjüin pütchi weinshi sainküin piichi, ¿kasa waaʼinrajatkat?
4 Namaa na manoujüinsaliikana. Nnojorüle süpüla wojuʼitüin sünain aküjaa pütchi weinshi sainküin piichi eesü süpüla waküjüin motsoʼo nüchiki Jeowa otta tü keeʼireekat naaʼin namüin na aʼyataajiraakana wamaa, na koleejiakana wamaa otta na waneeinnua (Sal. 27:14; 1 Ped. 3:15). Aküjüsü pütchi wanee wawala sümüin wanee wayuu suluʼu wanee katünasü, süka talatüin maʼin shia sutuma sünüiki tü wawalakat süküjaka jalain eere shipia süpüla ayatüin naashajaain. Mayaapejeʼe wainmain kasachiki alataka namüin na wayuukana, na nupueulosekana Jeowa ayatüshii aküjüin «süchiki kasa anasü» namüin na aapajeekana. Sutuma pütchikat tüü, aʼatapajeena wanee kasa anasü otta keeʼireejeerü naaʼin naʼwaajüin Jeowa (Isa. 52:7; Rom. 15:11).
5. ¿Jamüshi waʼwaajeeka Jeowa? ¿Kaseerü wountaka waainjüle shia?
5 ¡Talatüshi maʼin Jeowa süka nuʼwaajünüin weinshi natuma na aʼyataakana nümüin! Maʼaka nuʼwaajünüin weinshi sutuma tü kasa nükumajalakat eeshi süpüla waʼwaajüin nia wepialuʼu, namaa na wawalayuukana otta waashajaapa namaa na nnojoliikana aʼyataain nümüin (Sal. 19:1-4).