Wachajaa na achekakana tü pütchikat
1. ¿Kasa waainjeetka kojutüle wamüin aküjaa pütchi?
1 Wattasü nukua Jesús sünain aküjaa pütchi anasü süpüla nümülialüin naaʼin na anamiakana (Luc. 4:18, 19). Wayakana na nuluwataalakana Cristo, aapünüsü wamüin wanee kasa kojutüsü maʼin, shia washatüinjatüin nukuwaʼipa sünain wachajaain maʼin na achekakana tü pütchikat (Mat. 10:11, NM; 2 Cor. 5:20).
2. ¿Kasa naainjaka Pablo süka niiʼiratüin nüpülee sünain aküjaa pütchi? ¿Kasa alataka sutuma tia?
2 Weeʼirata wapülee. Oʼunawaishi Pablo weinshi eemüin tü ekirajüleekat sünain aküjaa pütchi namüin na judíokana otta na nnojoliikana judíoin (Aluw. 14:1). Akatsaʼa chaa Filipos oʼunüshi nia nümaa Silas sünain achajawaa wayuu eere ‹nalirajüin eein wanee aashajaalee nümaa Maleiwa›. Naküjaka pütchi namüin waneeinnua jieyuu otta eeka wanee kanüliasü Lidia, sünoujamaataka sünain tü shiimainkat (Aluw. 16:12-15).
3. Mayaapejeʼe waküjüin pütchi sainküin miichi, ¿kasa amaa eeka süpüla waainjüin?
3 Mayaapejeʼe waküjüin pütchi sainküin miichi, eeshii süpüla waküjüin pütchi eere süshawajüle kemion, seemeraale wayuu, opisiina, sülanüle wayuu, oikkaalee otta metkaaruluʼu. Namüin na kepiakana suluʼu piichiirua eere eein wijilante soʼuluʼu, eeshii süpüla waküjüin pütchi namüin sükajee washajüin karaloukta otta weenajüin naya suluʼupünaa teleepono. Jülüjüle waaʼin jalain choʼujaain maʼin süküjünüin pütchi otta weeʼiratüle wapülee sünain, wainmeerü maʼin ‹waʼyataain nümüin chi Senyotkai› (1 Cor. 15:58).
4. Palitchonle na wayuu waküjakana amüin pütchi, ¿kasa eeka süpüla waainjüin?
4 Eeshii aküjülii pütchi kooʼomüinka atuma naʼyataain sükajee nalataain suluʼumüin wanee outkajaalee, eesü shiale suluʼu noumain jee suluʼu wanee mma naata. Eeshii eeka nekirajaain sünain wanee anüikii naata süpüla naküjüin pütchi namüin na antakana suluʼujee wanee mma naata.
5. ¿Kasa jülüjüinjatka waaʼin süchiki tü kaʼi kepiakat oʼu waya? Sutuma tia, ¿kasa waainjüinjatka maʼin?
5 Soto waaʼin «tü yüüjakat, shia tü wayuukolüirua süpüshua» (Mat. 9:37; 13:38). Süka sülüʼülüin maʼin süpüla sajaʼttüin kasa mojusü, wapüshuaʼa wayakana wasakirüinjatü waaʼin eere süpüla kooʼomüin watuma waʼyataain. Süpüla tia, jülüjüinjatü waaʼin tü wakuwaʼipakat otta tü watüjakat apüleerua. Nüküjüin wamüin Jeowa naapeerüin wamüin kasa anasü sutuma palajanain watuma tü Nuluwataayakat (Mat. 6:33, NM).