‹Paapajiraa pikii naaʼu› chi pikirajüinkai

1. ¿Kasa choʼujaaka süpüla akaaliinjaa na ekirajaakana sünain tü Wiwüliakat?

¹ Süpüla wakaaliinjüin wanee ekirajaashi sünain tü Wiwüliakat süpüla woutiisain nia, nnojoishi wekirajüinjachin neʼe nia weinshi sünain tü Wiwüliakat. Nuʼwanaajireʼerüin chi aluwataaushikai Pablo tü nukuwaʼipakat namaa na nikirajüinkana maʼaka saaʼin wanee eyüü asepajaka süchonniichein. Müshiʼiya wayakana, wakaaliinjeere na ekirajaakana sünain tü Wiwüliakat süpüla kooʼomüin nanoula, ‹waapajiraainjatü wekii naaʼu› (1 Tes. 2:7-9, NM).

2. ¿Jamüshi jülüjüinjachika maʼin waaʼin chi wekirajüinkai? ¿Jamüinjatü sukuwaʼipa watuma?

² Jülüja maʼin waaʼin chi wekirajüinkai. Wanaa sümaa niʼitaain sünain nukuwaʼipa chi ekirajaashikai tü nikirajaakat anain, akatalaweechi nia noulia na nnojoliikana aainjüin tü sümakat tü Wiwüliakat (1 Ped. 4:​4, NM). Eeshi niyouktünüle sutuma tü nüpüshikat (Mat. 10:34-36). Akanasaʼa wayakana eeshii süpüla wakaaliinjüin nia jülüjüle maʼin waaʼin nia. Müshi süchiki tia wanee ajütüüshi sünain aküjaa pütchi suluʼu wanee mma naata: «Nnojo puʼunamaatüin süchikijee pikirajüin. Anale shia, makata pia otta paashajaa namaa na pikirajüinkana». Jülüja paaʼin choʼujaale nükaaliinjünüin chi pikirajüinkai. Weʼitaa wanee shiyaawase, ¿eeshi süpüla puunejüin süka teleepono jee pünaʼlaain nümüin ayuuire nia? Choʼujaale shia, ¿eeshi süpüla püikkalaain namaa na pikirajüinkana tü otta pükaaliinjüin naya namaa na nachonniikana?

3. ¿Kasa waaʼinrajatka süpüla nütütüleʼennüin aaʼin chi ekirajaashikai natuma na wawalayuukana?

³ Akaaliinjüshii na wawalayuukana. Püküjüle pütchi süʼütpünaa nipia chi pikirajüinkai eeshi süpüla püntapünaain nipialuʼu otta piʼraajirüin na aküjakana pütchi pümaa. Anale shia eeshii süpüla puunejüin naatawai aküjülii pütchi otta na laülaashiikana süpüla pümaain naya sünain ekirajaa. Otta müsia palitchon kaʼi süchikijee nuʼttüin sünain ekirajawaa, puunejaa nia sünain tü outkajawaa aainjünakat suluʼu tü Piichi Outkajaaleekat. Sutuma tia, aleewajiraajeechi nia namaa na wawalayuukana, na eekana süpüla nüpüshin sünain anoujaa (Mar. 10:​29, 30; Heb. 10:​24, 25).

4. ¿Kasa eejeetka sutuma tütüin waya?

⁴ Talatüshi maʼin wanee ashii akaaliinjakai maʼin nüchonnii sünain nanoula süka naneeküin aʼwaajaa Jeowa otta ayatüin naya sünain oonowaa sümaa tü shiimainkat (3 Juan 4). Müshiʼiya wayakana eeshii süpüla talatüin waya waapajiraale wekii naaʼu na ekirajaakana sünain tü Wiwüliakat.