«Eeshi süpüla pürekutsoolüin pia»
1. ¿Jamüsü sünüiki wanee wawala süchiki pürekutsoolüin shia?
1 «Nnojotsüje tantüin anain wanee aʼyatawaa eeka talatüin maʼin atuma taya otta saapüin tamüin wainma kasa anasü sünainpünaaka tanoula.» Tia, shia sünüiki Kathe B. Palm, wanee pürekutsoot aküjaka maʼin pütchi sainküin Chile. Sutuma anain maʼin nakuwaʼipa na aʼyataakana waneepia nümüin Maleiwa eeshi pümünüle amüin: «Eeshi süpüla pürekutsoolüin pia».
2. Püküja jamüin talataka waaʼin sutuma aʼyatawaa nümüin Maleiwa.
2 Talatüsü waaʼin sutuma. Nümüin Jesuu –chi washatakai akuwaʼipa– aainjaa tü keeʼireekat naaʼin chi Nüshikai müsü aka saaʼin tü eküülü katchinkat atuma nia (Juan 4:34). Makalaka nütüjaain saaʼu tü naashajaakat achiki wanaa sümaa nikirajüin na nikirajüinkana sünain talatüin wayuu sutuma aainjaa tü kasa sünainpünaakat aʼwaajaa Jeowa. Müsüjeseʼe talatüin waaʼin wanaa sümaa waainjüin tü kasa nüchekakat Maleiwa. Talatüshi maʼin pia pükatarüle kaʼi otta süpüshuaʼa tü kasa pümaʼanakat süpüla pükaaliinjüin na wayuukana (Aluw. 20:31, 35).
3. ¿Kaseerü talataka atuma waaʼin waküjüle maʼin pütchi?
3 Otta taasia, waküjüle maʼin pütchi eeshii süpüla woʼttüin sünain ekirajaa wayuu sünain tü Wiwüliakat otta talatüsü waaʼin sutuma tia. Mayaapejeʼe nnojoluin naapajeein pünüiki na wayuukana wanaa sümaa puʼttüin. Akatsaʼa mapa, wainmeerü wayuu pikirajaka sutuma pütüjüin maʼin aküjaa pütchi. Pikeraajapa wanee juya sünain pürekutsoolüin pia wainmeerü kasa ekirajünaka anain pia sünain tü Ekirajawaa Napülajatkat na Pürekutsootkana, sükaaliinjeechi pia sünain aʼyatawaa nümüin Maleiwa (2 Tim. 2:15, NM). Ayatüle püküjüin pütchi, piʼreena nanoujüin mapeena na wayuu püküjakana amüin pütchi (Ecl. 11:6).
4. ¿Kasa jülüjüinjatka naaʼin na jimaʼalii otta majayünnüü alüʼütkana süpüla ajaʼttiraa koleejiaa?
4 Jimaʼalii otta majayünnüü. Sülüʼülüle süpüla pajaʼttirüin tü koleejiaakat, ¿pütüjaa aaʼu tü paainjüinjatkat mapeena? Maaʼulu paainjüin wanee kasa soʼu tü kaʼi apütaakat süchikijee paainjüin tü kasa sünainpünaakat tü koleejiaakat. ¿Kaseerü paainjaka soʼu tü kaʼi koleejiapuʼukat oʼu pia? Suulialeʼeya piʼyataain maʼin waneepia, püsakireʼera paaʼin sümaa puʼuraajüin eere süpüla pürekutsoolüin rekulaat pia. Aneerü pukuwaʼipa waneepia sutuma tü kasa pütüjakat, maʼaka saaʼin aküjaa pütchi sümüin wayuu süpüshuaʼa, eejirawaa sümaa tü kasa mojusü alatakat pümüin, alaüleʼeraa paaʼin otta atüjaa ekirajaa.
5. ¿Kasa naainjüinjatka na kachonshiikana otta na wawalayuukana süpüla pürekutsoolüin na waneeinnua?
5 Jia kachonshiikana, ¿jükaaliinjüin na jüchonniikana süpüla naʼyataain waneepia nümüin Maleiwa? Anale jukuwaʼipa otta jünüiki namüin jüchonnii, eesü süpüla palajanain natuma tü Nuluwataayakat Maleiwa (Mat. 6:33, NM). Oʼttüshi Ray sünain pürekutsoolüin nia najaʼttirapa koleejiaa, müsü nünüiki: «Süküjapuʼuin tü teikat talatüin naaʼin wayuu pürekutsoorüle nia». Akanasaʼa na wawalayuukana, eeshii süpüla nakaaliinjüin na waneeinnua süpüla pürekutsoolüin naya sükajee tü namakat otta tü naainjakat. Müsü nünüiki José, españajeʼewai nia: «Naashin na tawalayuukana, tü pürekutsoolüükat shia wanee aʼyatawaa anasü eeka süpüla naainjüin na jimaʼaliikana otta na majayünnüükana. Sükajee tü namakat süchiki tü pürekutsoolüükat otta kojutüin namüin shia sümaa nakaaliinjüin taya, mapüleesat tamüin oʼttaa sünain aʼyatawaakat tia».
6. ¿Kasa paaʼinrajatka nnojoire pürekutsooleein pia?
6 Tü paaʼinrajatkat kapüleere shia. Eeshi eekai nümüin: «Nnojoishireʼe pürekutsooleein taya.» Müle pünüiki, püma nümüin Jeowa: «Nnojotsüleʼe tatüjaain aaʼu tainkeerüle pürekutsoolüin taya, akatsaʼa taainjeein tü keeʼireekat paaʼin» (Sal. 62:8; Pro. 23:26). Süchikijee, paainja tü nümakat Maleiwa sükajee tü Wiwüliakat otta nakajee na nuʼunirakana sükajee tü nütchinkat. Wainma na pürekutsoot rekulaat pürekutsootkana aaʼusiliaat palajana. Sutuma talatüin maʼin naya, nachajaain sukuwaʼipa süpüla naʼyataain waneepia nümüin Maleiwa (Sal. 34:8).
7. ¿Kasa paaʼinrajatka nnojorüle pütüjaain saaʼu püinkeerüle alatiraa 70 oora kashiwai?
7 Eeshi mmorüle pia sutuma iseerüin püchiki paashin alatiraa 70 oora kashiwai. Paashajaa namaa na pürekutsoot alatakana amüin tia (Pro. 15:22). Süchikijee, püshaja suluʼu karaloukta tü kaʼi piʼyataainjatkat oʼu nümüin Maleiwa. Piʼreerü nnojoluin kapüleein shia pükatarüle kaʼi süpüla aküjaa pütchi sünainjee tü kasa nnojotkat choʼujaain maʼin (Éfe. 5:15, 16, NM).
8. ¿Jamüsü anaka wasakireʼerawaire waaʼin?
8 Püsakireʼera paaʼin. Süka suʼwanajaʼawalin wakuwaʼipa, choʼujaasü wasakireʼerawalin waaʼin. ¿Ooʼulaweechi pia suulia aʼyatawaa soʼu palitchon kaʼi? Ooʼulaashi Randy suulia aʼyatawaa süpülapünaa tü juya nujuʼitüinjatkat oʼu otta nümaka: «Sutuma taainjüin tia, pürekutsootshi taya sümaa tü taʼwayuusekat, wakolojooka eere choʼujaain aküjülii pütchi. Wainma tü kasa anasü teʼrakat sünainjee... akatsaʼa tü anakat maʼin shia wulein taaʼin».
9. ¿Kasa nasakireʼerüinjatka anain naaʼin na kasaatshiikana?
9 Eeshii na kasaatshii asakireʼerakana naaʼin otta natüjaaka saaʼu nnojoluin choʼujaain naʼyataain piamaleʼe waneepia. Süpüla nainküin tia, nnojoluinjatü kachiiruain naaʼin wainma kasa. Akatsaʼa, eesü kasa anasü sünainjee. Ooʼulaasü jekenainka nuʼwayuuse John suulia aʼyatawaa waneepia süpüla kooʼomüin shiʼyataain nümüin Maleiwa. Nümaka John: «Nnojotsü eein wanee kasa analeeka suulia sülatirüin kaʼi tü taʼwayuusekat sünain aʼyatawaa nümüin Maleiwa».
10. ¿Kasa pürekutsootka atuma waya?
10 Piiʼiyatüin aipüralin otta kanoulain pia. Nnojotsü eein wanee aʼyatawaa anaka maʼin suulia aküjaa pütchi, süka nuluwataalain shia Jeowa. Ajaʼttinneerü soʼu palitchon kaʼi tü kasakalüirua süpüshuaʼa otta nayeena neʼe oʼttaaka na achuntakana nünülia Jeowa (Roma 10:13, NM). Miyoʼule naaliin Maleiwa wapüla otta kojutüle wamüin tü naainjakat wapüleerua, keeʼireejeerü waaʼin woonooin sümaa tü nuluwataakat anain Jesuu, tü aküjaakat pütchi (Mat. 28:19, 20; 1 Juan 5:3). Otta müsia wanoujüle sünain kepiain waya soʼu tü kaʼi sajaʼttüinjatkat oʼu kasa süpüshuaʼa, jülüjeerü waaʼin aʼyatawaa nümüin Maleiwa suulialeʼeya sünainpünaain waya tü kasa aainjünakat mmapaʼa (1 Cor. 7:29-31, NM).
11. ¿Jamüinjatü wanüiki wamünüle amüin: «Eeshi süpüla pürekutsoolüin pia»?
11 Pürekutsoorüle waya nnojoliishii oonooin neʼe waya namüin na nuʼunirakana Maleiwa süka tü nütchinkat, weeʼiyatüin alin wapüla nia. Sümüle wayuu pümüin: «Eeshi süpüla pürekutsoolüin pia», püinkeerü tia. Puʼuraaja otta püsakireʼera paaʼin eere süpüla naʼakain pia na talatakana maʼin sünain pürekutsoolüü.
[Epiikürape suluʼu süpanaka 4]
Jia kachonshiikana, ¿jükaaliinjüin na jüchonniikana süpüla naʼyataain waneepia nümüin Maleiwa?
[Epiikürape suluʼu süpanaka 5]
Nnojotsü eein wanee aʼyatawaa anaka maʼin suulia aküjaa pütchi, süka nuluwataalain shia Jeowa.