¿Anasü sukuwaʼipa tü poʼukot?
1. ¿Jamaluʼulu «anain» sukuwaʼipa tü woʼukot?
1 Tü kasa weʼrakat sünainpünaasü tü waainjakat, müsüjeseʼe anain maʼin tü nümakat Jesuu: «Anale [sukuwaʼipa] tü woʼukot, weʼrüin tü kasakat süpüshua» (Mat. 6:22). Wanaa sümaa «anain» sukuwaʼipa tü woʼukot, jülüjüsü waaʼin aainjaa tü keeʼireekat naaʼin Maleiwa. Shia palajanaka watuma Nuluwataaya Maleiwa suulialeʼeya kamaʼanaa korolo nnojotka choʼujaain otta aainjaa waneeirua kasa amojujeʼeraka waʼyataain nümüin Maleiwa.
2. ¿Kaseerü amojujeʼeraka tü woʼupaʼakat? ¿Kasa akaaliinjeenaka waya?
2 Püsakireʼera paaʼin. Tü kasa choʼujaakat wamüin, eesü süpüla sumojujeʼennüin sutuma tü kasa eeʼiyatünakat süpüla shiyaʼlajünüin otta tü kasa namaʼanakat na waneeinnua. Süpülapünaa nükatalüin wanee wayuu kojuya kaʼi jee nneerü süpüla aainjaa jee ayaʼlajaa wanee kasa, nütüjaainjatü aaʼu «jerainjatüin sujuittakat aaʼu» otta nüsakireʼerüinjatü naaʼin aneerüle jee mojeerüle sukuwaʼipa niʼyataain nümüin Maleiwa (Luc. 14:28; Fili. 1:9-11). Choʼujaasü wasakireʼerawalin waaʼin kasain waainjüinjatüin süpüla nnojoluin kachiiruain waaʼin wainma kasa süpüla kooʼomüin waʼyataain nümüin Maleiwa (2 Cor. 13:5; Éfe. 5:10).
3. ¿Kasa shikirajaka anain waya tü saainjakat wanee wawala?
3 Pürekutsootsü rekulaat wanee wawala akatsaʼa ayatüsü aʼyataain waneepia, mayaapejeʼe nnojoleerüin choʼujaain nneerü sümüin shiʼyataale shiatapünaa kaʼi. Sümaka mapa: «Nnojotsü süpüla shiʼyataain wanee wayuu namüin piamashii laama. Tooʼulaain tü keeʼireekat taaʼin shia jülüjaka taaʼin tü choʼujaakat maʼin tamüin. Tayaawata aaʼulu nnojoluinjatüin eein waneepia tü korolokalüirua otta mapüsain maʼin taya sünain aʼyatawaa süchiirua». Süka suʼwanajaain sukuwaʼipa sümaa nnojoluin kachiiruain saaʼin wainma kasa, shiiʼiratüin tü shiʼyataakat anain süpüla ayatüin pürekutsoolüin shia.
4. ¿Jamüsü choʼujaaka maʼin anainjatüin sukuwaʼipa tü woʼukot?
4 Süka sülüʼülüin maʼin süpüla sajaʼttüin tü kasakalüirua choʼujaasü anainjatüin sukuwaʼipa tü woʼukot. Wanaa sümaa sülatüin wanee kaʼi alüʼütsü tü kaʼi sajaʼttüinjatkat oʼu tü kasakalüirua otta süpüla nüntirüinjatüin Maleiwa tü mma jeketkat (1 Cor. 7:29, 31, NM). Jülüjüle waaʼin tü aküjaakat pütchi kateerüin woʼu otta na aapajakana wanüiki (1 Tim. 4:16).