¿Kooʼomüinjatü taʼyataain nümüin Maleiwa?
1. ¿Kasa eeka süpüla mojuin atuma naaʼin wanee anoujüshi?
1 ¿Püsakirüirü anain tia? Sutuma laülaain pia, ayuulin pia jee shiale sutuma kooʼomüin tü choʼujaakat sümüin püpüshi, eesü mojule paaʼin süka isain püchiki kooʼomüin piʼyataain nümüin Maleiwa. Saashin wanee wawala apünüinka achonnii, aaʼinmajaka süpüshi, mojuwaisü saaʼin süka mapüsain shia otta mapütaain kaʼi süpüla süküjüin pütchi. Sülatüle tia wamüin, ¿kasa akaaliinjeenaka waya süpüla wanaawain watuma tü kasa waainjakat?
2. ¿Kasa nüchuntaka Jeowa wamüin?
2 ¿Kasa nüchuntaka Jeowa wamüin? Wayakana wapüshuaʼa, wacheküin kooʼomüin waʼyataain nümüin Jeowa. Akatsaʼa naata tü waainjeekat suulia tü eekat süpüla waainjüin. Süka keeʼireein waaʼin kooʼomüin tü waʼyataainkat shiiʼiyatüin nnojoluin talatüin waaʼin sümaa tü waainjakat. Soto waaʼin nütüjaain aaʼu Jeowa tü isakat wachiki, nnojotsü süpüla nüchuntüin wamüin wanee kasa isaka wachiki (Sal. 103:13, 14). ¿Kasakaʼa nüchuntüin wamüin? Shia waʼyataain nümüin süka süpüshuaʼa waaʼin (Col. 3:23).
3. ¿Jamüsü süpüla wayaawatüin saaʼu tü waainjakat sünain waʼyataain?
3 ¿Jamüsü süpüla watüjaain saaʼu tü eekat süpüla waainjüin? Wachunta kaaliinwaa nümüin Jeowa süpüla wayaawatüin saaʼu tü wainkakat jee tü isakat wachiki (Sal. 26:2). Otta müshia wanee wawala kakaliaichikai sünain anoujaa, eʼraajakai waya otta meimmoluinka seema aküjaa tü shiimainkat wamüin, eesü süpüla nüküjüin wamüin tü wanoukteʼerüinjatkat sünain wakuwaʼipa (Pro. 27:9). Soto paaʼin eein süpüla suʼwanajaain tü pukuwaʼipakat, makalaka anain püsakireʼerawaire paaʼin sünain tia (Éfe. 5:10).
4. ¿Jamüinjatü waaʼin sutuma tü aküjünawaikat wamüin süchiki aʼyatawaa nümüin Maleiwa?
4 ¿Jamüinjatü waaʼin sutuma tü aküjünawaikat? ¿Piʼrüirü natütüleʼennüin aaʼin sutuma wayuu na ayoujiraakana? Tü keeʼireekat naaʼin shia nakaaliinjeein naya süpüla nakanajüin, nnojotsü süpülajatüin japülin naya. Müsia shia wanaa sümaa süküjünüin wamüin sünain tü outkajawaakat otta suluʼu tü karalouktakalüirua ‹waküjüinajanain waneepia tü nünüikikat Maleiwa›. Aküjünüsü tia süpüla sütütüleʼennüin waaʼin nnojotsü süpülajatüin jülüjüin waaʼin nnojoluin kooʼomüin tü waʼyataainkat (2 Tim. 4:2). Sutuma tia watüjaa aaʼu soteerüin naaʼin Jeowa ‹tü kasa waaʼinrakat otta tü naaliikat wapüla› ayatüle waʼyataain nümüin süka süpüshuaʼa waaʼin (Heb. 6:10).