«Warattüinjatü tü juwaralakat»
1. ¿Kasa wamaʼanaka?
1 Aʼwaajünüshi Jeowa wattachonjee sünainmüinreʼeya aliika sutuma saʼanasia nuwarala chi Kaʼikai. Akastsaʼa naashin Jesuu, shia namaʼanainjatka na nikirajüinkana «tü luusa eekat atuma kataa oʼuu» (Juan 8:12, NM). Anasü maʼin kamaʼanaa tia luusakat, akatsaʼa eesü tü sünainpünaakat. ¿Kasa wayuu tia? Müshi Jesuu: «Warattüinjatü tü juwaralakat suʼupala wayuu», tia maluʼulu; anainjatüin watuma sukuwaʼipa wayuu sükajee (Mat. 5:16, NM). Choʼujaasü maʼin waainjüin tia süka piyuushoʼuin wayuu maaʼulu sünain sunoula. ¿Kasa waaʼinrajatka süpüla washatüin nukuwaʼipa Jesuu sünain tia?
2. ¿Jamüsü shiiʼiyatia nutuma Jesuu kojutüin nümüin tü shiimainkat?
2 Waküja pütchi. Akatatshi kaʼi Jesuu sümaa naapüin nütchin otta tü kasa nümaʼanakat süpüla niʼikajüin süchiki tü shiimainkat sainküin piichi, pülaasa, uuchi jee eepünaale eein wayuu. Nütüjaa aaʼu anain sukuwaʼipa wayuu waneepia sutuma tia (Juan 12:46). Jee yapashii nutuma na nikirajüinkana süpüla ‹müinjanain aka saaʼin anakia› sümüin wayuu shiiʼiree wainmain tü atüjaakat saaʼu tü shiimainkat (Mat. 5:14). Jee warattüsü tü nawaralakat süka naainjüin kasa anasü sümüin wayuu otta nekirajüin shia sünain tü shiimainkat nüchiki Maleiwa.
3. ¿Jamüinjatü shiiʼiyatia watuma kojutüin wamüin tü shiimainkat?
3 Maaʼulu yaa, kojutüsü maʼin namüin na aʼyataakana nümüin Maleiwa ‹müinjanain naya aka saaʼin süchonnii luusa› makalaka naküjüin pütchi eepünaale eein wayuu (Éfe. 5:8, NM). Shiawai neʼe choʼujaaka paashajeʼerüin suʼupala wayuu tü Wiwüliakat otta tü karaloukta weitajakat peemeraapa piʼyataareluʼu jee eere koleejiain pia. Saainjüin tia wanee wawala süpüla shikirajüin waneesia wayuu sünain tü Wiwüliakat otta saapaka karaloukta namüin poloo piamashii wayuu koleejiakana sümaa.
4. ¿Jamüsü choʼujaaka anain wakuwaʼipa süpüla warattüin tü wawaralakat?
4 Waainja kasa anasü. Anainjatü wakuwaʼipa suʼupala wayuu süpüla warattüin tü wawaralakat (Éfe. 5:9). Jaʼyasü naatain nukuwaʼipa wanee anoujüshi eepünaale nia, koleejiale nia otta niʼyataale jee eeshi süpüla naashajaain süchiki tü Wiwüliakat sutuma (1 Ped. 2:12). Süka anain nukuwaʼipa wanee jintüi jaʼraliichi ouyase ounejinnüshii na kachonniikana nia sutuma tü eʼikütkat. Müsü shia namüin: «¡Eiwaʼaiya teʼrüin wanee jintüi ichein maʼin süchiirua tü anaakat akuwaʼipaa!». Kamalainsü sümüin wayuu «tü luusa eekat atuma kataa oʼuu» otta aʼwaajünüshi Maleiwa süka waküjüin pütchi otta anain wakuwaʼipa.