Los testigos de Jehová: organizados para predicar las buenas nuevas
Alatüirü suulia 100 juya sünain waküjüin pütchi nüchiki Jeowa sümaa pansaain sukuwaʼipa watuma. Makalaka nnojoluirüin eein wanee aʼyatawaa eekai müin aka saaʼin, aküjünüsü pütchi suluʼu wainma anüikii jee maʼaka 230 mma (Mat. 24:14). ¿Jamüsü choʼujaaka saainjünüin tia? ¿Jamüsü süküjünaka sainküinpünaa mmaka? Watüjaajeerü aaʼu tia weʼrajapa tü peliikulakat Los testigos de Jehová: organizados para predicar las buenas nuevas, süka weʼreerüin süpüshuaʼa tü kasa sünainpünaakat waʼyataain sainküinpünaa mmaka. Piʼrajapa shia, püsoukta tü asakiraa yaakat wünaapünaa.
¿Jamüsü pükaaliinjia sutuma tü peliikulakat süpüla kojutüin maʼin pümüin 1) tü naaʼinrakat sünain aküjaa pütchi na wayuu nuʼunirakana Jeowa sükajee tü nütchinkat? (2 Tim. 4:2.) 2) na wawalayuu aʼyataakana suluʼu Weteet sainküinpünaa mmaka? 3) tü ekirajünakat anain na wawalayuu ajütünakana wattamüin sünain aküjaa pütchi otta na waraittakana waaʼu? (2 Tim. 2:2, NM.) 4) choʼujaain paashajeʼerüin wanee pütchi suluʼujee tü Wiwüliakat wattaʼa maalü otta yapain pia semaanawai süpüla tü outkajawaakat? (Aluw. 17:11.) 5) tü kasa anasü eekat sutuma tü outkajawaakat? (Heb. 10:24, 25.) 6) tü kasa anasü piʼreetkat paʼaraiisüpa tü Mmakat? (Isa. 11:9.) 7) tü aʼyatawaakat sünain akotchojaa wayuu maaʼulu? (Juan 4:35.)
Anasü maʼin akaaliinjaa süka peliikulakat tüü na wayuu ekirajaweekana süpüla natüjaain saaʼu tü naʼyataainkat na aküjüliikana pütchi sainküinpünaa mmaka. 8) ¿Joujasüche anain saaʼin pümüin süpüla neʼrajüin shia na pikirajakana, na püpüshikana otta na piʼraajakana? 9) ¿Jamüsü nanüiki na eʼrüinnakana shia?
Wanaa sümaa wasakireʼerüin waaʼin sünain tü naainjakat Jeowa maaʼulu, müsü wanüiki maʼaka saaʼin tü nümakat chi eeʼiraikai: «Wainma tü kasa pukumajalakat piakai Tamaleiwasekai Jeowa, shialeʼeya tü pukumajakat otta tü jülüjakat paaʼin wanaapünaa wamaa, nnojoishi jaralin müin aka paaʼin» (Sal. 40:5, NM). Wakaaliinja na waneeinnua sükajee peliikulakat tüü süpüla kojutüin maʼin namüin Jeowa otta na nuʼunirakana sükajee tü nütchinkat.