¿Anasü putuma sukuwaʼipa tü nikirajakat anain pia Jeowa?

1. ¿Jamüsü naaʼin Jeowa sooʼopünaa nekirajünüin na aʼyataakana nümüin?

¹ Choʼujaasü maʼin nümüin Jeowa chi «Eʼiküi Miyoʼushikai», nekirajünüin na aʼyataakana nümüin (Isa. 30:​20, NM). Nukumajapa chi Nüchon niʼirumakai, Eʼiküishi nia yalejeechiki (Juan 8:​28, NM). Jaʼitakajeʼe süchikijee kaainjalain Adán, ayatüshiʼiya nikirajüin süka naaʼin Jeowa na wayuu kaainjaraliikana (Isa. 48:​17, 18; 2 Tim. 3:​14, 15).

2. ¿Kasa nuʼuniraka akuwaʼipa Jeowa maaʼutpünaa?

² Maaʼutpünaa nuʼunira akuwaʼipat Jeowa shikirajünüin maʼin wayuu. Wainma wayuu antaka sainküinjee Mma sünainmüin «tü uuchi kaaʼukat tü aʼwaajüleekat Jeowa», maʼaka nüküjüin shia Isaías (Isa. 2:​2, NM). ¿Jamüshii nantaka? Shiiʼiree nekirajünüin nutuma Jeowa (Isa. 2:3). Soʼu juyaka 2010, nalatirüin na aküjüliikana pütchi 1.600 miyon oora sünain aküjaa pütchi otta ekirajaa tü shiimain suluʼukat tü Wiwüliakat. Otta müsia semaanawai, ekirajünüshii wayuu suluʼu 105.000 outkajaalee sainküin mmaka süpüshuaʼa otta eesü karalouktairua suluʼu maʼaka 500 anüikii naata nutuma chi achepchiee oonookai otta kekiikai maʼin.

3. ¿Kasa sükaaliinjaka anain pia tü nikirajakat anain Jeowa?

³ Yapashii maʼin. ¡Anasü maʼin wakuwaʼipa sutuma tü nikirajakat anain Maleiwa! Watüjaaitpa aaʼu kanüliain nia otta naaʼinmajüin waya (Sal. 83:18; 1 Ped. 5:​6, 7). Nüsouktüirü eʼipajee Jeowa wamüin kasa maʼaka saaʼin: ¿Jamüshii müliaka jee ouktaka waya? ¿Kasa waainjüinjatka süpüla talatüin waya? ¿Kasapülajana yaain waya? Nnojotpajaʼa shiain neʼe nikirajüin anain waya tia, nikirajüin waya süpüla anain wakuwaʼipa eepünaale waya (Jos. 1:8).

4. ¿Kasa eeka süpüla wekirajaain anain? ¿Jamüsü anainjatka watuma sukuwaʼipa tü nikirajakat anain waya Jeowa?

⁴ Akatsaʼa eetaalain joo tü nikirajakat anain Jeowa na aʼyataakana nümüin süpüla kooʼomüin tü naʼyataainkat. Suluʼu süpana 4-6, eesü sünülia tü eekat süpüla pikirajaain anain. Isalejeʼeya püchiki pikirajaain sünain soʼutku, ana maʼin putuma sukuwaʼipa tü eekat süpüla pikirajaain anain. ¿Jama na jimaʼaliikana otta na majayünnüükana? Apüleeruaanawaishii naya natuma na eʼiküliikana shiiʼiree noʼunüin suluʼumüin eʼikülee miyoʼu. ¿Wakaaliinjüin naya sünain asaʼwataa tü naʼyataweekat anain nümüin Maleiwa süpüla anain nakuwaʼipa sutuma tü nikirajakat anain? Anale watuma sukuwaʼipa tü nikirajakat anain waya Jeowa, talateena maʼin waya maaʼulu otta suluʼu tü mma jeketkat (Sal. 119:105; Juan 17:​3, NM).

Waneeirua kasa nekirajaka anain na nuʼunirakana Jeowa nükajee chi naaʼinkai

Ekirajawaa süpüla atüjaa karaloukta

• ¿Kasapülajatü?: Ekirajünüshi na wayuukana sünain aashajeʼeraa otta ashajaa karaloukta süpüla nekirajaain sünain tü Wiwüliakat otta nekirajüin wayuu.

• Sümaʼainjatka: Wanaapünaa sümaa nakuwaʼipa na ekirajaashiikana.

• Suluʼuinjatü: Piichi Outkajaalee.

• Ekirajaainjanaka: Eekai nüküjülin pütchi jee eekai nikirajaweein.

• Süpüla nekerotüin: Na laülaashiikana nakumaja akuwaʼipat tü ekirajawaakat müleka choʼujaale shia otta naküjüin shia namüin na ekirajaweekana.

Ekirajawaa süpüla Aküjaa Pütchi

• ¿Kasapülajatü?: Ekirajünüshii na aküjüliikana pütchi süpüla natüjüin maʼin ekirajaa otta aküjaa pütchi.

• Sümaʼainjatka: Matüjüinsat ajaʼttaa.

• Suluʼuinjatü: Piichi Outkajaalee.

• Ekirajaainjanaka: Napüshuaʼa na aküjüliikana pütchi. Eeshii süpüla nekirajaain na outkajaakana weinshi, na anakana amüin tü shikirajakat tü Wiwüliakat sümaa noonooin sümaa.

• Süpüla pikerotüin: Paashajaa nümaa chi shikiipüʼükai tia ekirajawaakat.

Ekirajawaa sünain naata anüikii

• ¿Kasapülajatü?: Ekirajünüshii na wawalayuukana süpüla naküjüin pütchi suluʼu naata anüikii.

• Sümaʼainjatka: Pienchi jee jaʼrai kashi. Eesü waneere jee piamale oora sümaʼa tü ekirajawaakat jee saawanoʼuluwaisü shia wattaʼa maalü.

• Suluʼuinjatü: Wanee Piichi Outkajaalee eekai pejein.

• Ekirajaainjanaka: Wawalayuu anakana achiki pütchi otta aküjeekana pütchi suluʼu naata anüikii.

• Süpüla nekerotüin: Sukumajeerü akuwaʼipa Weteet eepünaale choʼujaain shia.

Akumajaa Piichi Outkajaalee

• ¿Kasapülajatü?: Akumajaa otta anoukteʼeraa Piichi Outkajaalee. Mayaainjeʼe nnojoluin shiain maʼin wanee ekirajawaa, yapashii atumawaa na wawalayuukana sünain wainma kasa süpüla nakaaliinjüin sünain akumajaa piichi.

• Sümaʼainjatka: Sünainpünaasü nukuwaʼipa chi ekirajünakai.

• Eeinjatüle: Eepünaale eein na Akumajüliikana Piichi Outkajaalee. Otta müsia ounejaanüshii na aʼyataainjanakana süpüla nakaaliinjüin eepünaale sukutkujaain maa jee sülatüin wawai.

• Achuntünaka: Woutiisainjana sümaa anain nanüiki na laülaashiikana nachiki. Eeshii süpüla jieyuuin otta tooloyuuin, jaʼitainna matüjüin naya.

• Süpüla pikerotüin: Püchunta namüin na laülaashiikana tü karalouktakat Cuestionario para trabajadores voluntarios en Salones del Reino (S-82) otta pipiraja shia.

Ekirajawaa napüla na Pürekutsootkana

• ¿Kasapülajatü?: Ekirajünüshii na pürekutsootkana süpüla ‹keraain natuma süpüshuaʼa tü naʼyataainkat› (2 Tim. 4: 5, NM).

• Sümaʼainjatka: Piama semaana.

• Eeinjatüle: Süneeküin Weteet, suluʼuwaisü wanee Piichi Outkajaalee eekai pejein.

• Achuntünaka: Waneeinjachi juya pia sünain pürekutsoolüin rekulaat.

• Süpüla pikerotüin: Paʼatapaja nünüiki chi wawala waraittakai waaʼu, nüshajirüin uatuwoʼushi nanülia na ekirajaainjanakana.

Ekirajawaa napüla na Weteliita Jekennuukana

• ¿Kasapülajatü?: Akaaliinjünüshii na weteliita jekennuukana süpüla anain nakuwaʼipa suluʼu Weteet.

• Sümaʼainjatka: 16 semaana, wanee oora semaanawai.

• Suluʼuinjatü: Weteet.

• Achuntünaka: Weteliitainjachi nia jee niʼyataainjachire soʼu wanee jee kojuya juya.

• Süpüla nikerotüin: Süshajirüin uatuwoʼushi Weteet na ekirajaainjanakana.

Ekirajawaa napüla na Laülaashiikana otta na Aʼyataakana neʼipajee

• ¿Kasapülajatü?: Süpülajatü nekirajünüin na laülaashiikana otta na aʼyataakana neʼipajee süpüla pansaain otta anain sukuwaʼipa naʼyataain (Aluw. 20:28). Nnojotsü juyawalin shia, naneeküin joujainjatüin shia na Laülaayuu Nekiipüʼükana na Aküjüliikana pütchi.

• Sümaʼainjatka: Jooluʼu waneeitpa kaʼi shiatapünaamüin namüin na laülaashiikana otta namüin na aʼyataakana neʼipajee wanee kaʼi neʼe.

• Suluʼuinjatü: Wanee Piichi Outkajaalee jee shiale tü süpüleekat Outkajawaa miyoʼu.

• Achuntünaka: Laülaashinjachi jee aʼyataainjachi neʼipajee na laülaashiikana.

• Süpüla nekerotüin: Nuunejaain chi wawala waraittakai waaʼu na ekirajaainjanakana.

Ekirajawaa napüla na Laülaashiikana suluʼu Outkajaaleea

• ¿Kasapülajatü?: Sükaaliinjüinjana na laülaashiikana süpüla nekeraajüin tü naʼyataainkat nümüin Maleiwa.

• Sümaʼainjatka: Jaʼrai kaʼi.

• Eeinjatüle: Süneeküin Weteet, suluʼuwaisü wanee Piichi Outkajaalee jee shiale tü süpüleekat Outkajawaa miyoʼu

• Achuntünaka: Laülaashinjachi.

• Süpüla nekerotüin: Suunejaain Weteet na ekirajaainjanakana.

Ekirajawaa napüla na Waraittakana waaʼu sümaa Naʼwayuuseb

• ¿Kasapülajatü?: Akaaliinjünüshii na waraittakana waaʼu otta na nekiipüʼükana süpüla anain natuma nakuwaʼipa na anoujüshiikana, ‹naʼyataain maʼin sünain aküjaa pütchi otta ekirajaa› jee süpüla naaʼinmajüin na anoujüshii najapuluʼukana (1 Tim. 5:​17, NM; 1 Ped. 5:​2, 3).

• Sümaʼainjatka: Piama kashi.

• Eeinjatüle: Süneeküin Weteet.

• Achuntünaka: Niainjachi wanee wawala waraittakai waaʼu jee niale chi nikiipüʼükai.

• Süpüla nekerotüin: Suunejaain Weteet na ekirajaainjanakana sümaa naʼwayuuse.

Ekirajawaa sünain tü Wiwüliakat napüla na Tooloyuu Maʼwayuusekanac

• ¿Kasapülajatü?: Ekirajünüinjana na laülaashiikana otta na aʼyataakana neʼipajee süpüla kooʼomüin naʼyataain, maʼwayuuseinjana naya. Kojuya na makatakana noumainpaʼa eere choʼujaain aküjülii pütchi jee eeshii na ajütünakana suluʼumüin wanee mma naata müleka nacheküle shia.

• Sümaʼainjatka: Piama kashi.

• Eeinjatüle: Süneeküin Weteet, suluʼuwaisü wanee Piichi Outkajaalee jee shiale tü süpüleekat Outkajawaa miyoʼu.

• Achuntünaka: Maʼwayuuseinjachi nia otta eeinjatü maʼaka 23 jee 62 nuuyase, nnojolinjachi ayuuleʼein, keeʼireeinjatü naaʼin niʼyataain napüleerua na nuwalayuukana otta niʼyataain eere choʼujaain aküjülii pütchi (Mar. 10:​29, 30). Nülatirüinjatü piama juya sümaa nnojolin nuuʼulaapünaain suulia laülaain nia suluʼu outkajaalee jee shiale niʼyataain neʼipajee na laülaashiikana.

• Süpüla nekerotüin: Sünain tü outkajawaa miyoʼu piamakat kaʼi, outkajaashii na oʼuneekana sünain süpüla süküjünüin sooʼomüin namüin.

Ekirajawaa sünain tü Wiwüliakat napüla na Anoujüshii Kaʼwayuusekanad

• ¿Kasapülajatü?: Ekirajünüshii na kaʼwayuusekana süpüla yapain maʼin naya shiiʼiree naʼyateʼennüin nutuma Jeowa otta na nuʼunirakana nüka chi naaʼinkai. Kojuya na makatakana noumainpaʼa eere choʼujaain aküjülii pütchi jee eeshi na ajütünakana suluʼumüin wanee mma naata müleka nacheküle shia.

• Sümaʼainjatka: Piama kashi.

• Eeinjatüle: Oʼttüsü shia palajana suluʼu tü Eʼikülee chakat Patterson sutuma Watchtower. Mapa eejeerü wanee eere süneeküin shia Weteet, eesü süpüla suluʼuin shia wanee Piichi Outkajaalee jee shiale tü süpüleekat Outkajawaa miyoʼu.

• Achuntünaka: Eeinjatü maʼaka 25 otta 50 nouyase, nnojoliinjana ayuuleʼein naya, nalatirüinjatü piama juya sümaa nnojoluin nooʼulaapünaain suulia aʼyatawaa waneepia nümüin Maleiwa otta shiainjatü naaʼinruʼuka tü nümakat Isaías: «¡Anii taya! Taya puluwataa» (Isa. 6:​8, NM). Nalatirüinjatü piama juya sünain kasaalüin otta anainjatü nakuwaʼipa süpüla naluwataanüin eere choʼujaain aküjülii pütchi.

• Süpüla nekerotüin: Suʼunnaa tü outkajawaa miyoʼu waneekat kaʼi, outkajaashii na oʼuneekana sünain süpüla süküjünüin sooʼomüin namüin.

Tü Ekirajaaleekat Galaad sutuma Watchtower

• ¿Kasapülajatü?: Ekirajünüshii na pürekutsootkana otta waneeinnua aʼyataakana waneepia nümüin Maleiwa süpüla najütünüin wattamüin sünain aküjaa pütchi.

• Sümaʼainjatka: Jaʼrai kashi.

• Suluʼuinjatü: Tü Eʼikülee chakat Patterson sutuma Watchtower.

• Achuntünaka: Napülajatü neʼe na kaʼwayuusekana. Wanaa sümaa nepirajüin tü palajatkat karaloukta nanüliamaaka, nalatirüinjatü piama juya sümaa nnojoliin nooʼulaapünaain suulia aʼyatawaa waneepia nümüin Maleiwa, 3 nouyase sünain woutiisaa, 2 sünain kasaalüin otta 21 nouyase jee shiale 38. Atüjüinjana inkülee otta nnojoliinjana ayuuleʼein. Keraale tia natuma na pürekutsootkana suluʼu wanee mma naata (jaʼitainna ajütüüshin maʼaka naaʼin na aküjakana pütchi wattamüin), na waraittakana waaʼu, na weteliitakana, na ojuʼitüinnapakana suluʼujee Ekirajawaa sünain tü Wiwüliakat napüla na Tooloyuu Maʼwayuusekana jee shiale Ekirajawaa sünain tü Wiwüliakat napüla na Wawalayuu Kaʼwayuusekana, eesü süpüla nashajirüin nanülia.

• Süpüla nekerotüin: Sünain tü outkajawaa miyoʼu apünüinkat kaʼi suluʼu waneeirua mma, outkajaashii na oʼuneekana sünain süpüla süküjünüin sooʼomüin namüin. Nnojorüle saainjünüin tia puumainpaʼa, püchunta sümüin Weteet süküjai pümüin sooʼomüin tia ekirajawaakat müleka puʼuneere sünain.

Ekirajawaa napüla na Shikiipüʼükana Weteet sümaa Naʼwayuuse

• ¿Kasapülajatü?: Akaaliinjünüshii na Shikiipüʼükana Weteet süpüla pansaain natuma tü aainjünakat suluʼu Weteet otta süpüla naʼyataain namaa na wawalayuukana otta na waraittakana waaʼu otta müsia süpüla naaʼinmajüin tü alatiraakat pütchi, saainjünüin sümaa suluwataanüin karaloukta jee waneeirua aʼyatawaa suluʼu Weteet (Luc. 12:​482, NM).

• Sümaʼainjatka: Piama kashi.

• Suluʼuinjatü: Tü Eʼikülee chakat Patterson sutuma Watchtower.

• Achuntünaka: Shikiipüʼüinjachi Weteet jee püneekünüle süpüla tia.

• Süpüla nekerotüin: Ounejaanüshii naya sümaa naʼwayuuse natuma na Nekiipüʼükana na Aküjüliikana pütchi.

[Pütchi]