Choʼujaasü maʼin shia nümüin wanee ekirajüi atüjakai
1. ¿Jamüinjatü nukuwaʼipa wanee wayuu atüjakai ekirajaa sünain tü Wiwüliakat?
1 ¿Jamüinjatü nukuwaʼipa wanee wayuu atüjakai ekirajaa sünain tü Wiwüliakat? ¿Atüjüinjachi maʼin karaloukta? ¿Kakaliainjachi sünain ekirajaa? ¿Tütüinjachi sünain ekirajaa? Nnojo, aipüralinjachi: tü akuwaʼipaa alanaʼaleekat sünainjee tü pütchi aapünakat nümüin Moisés, tü ayaawatünakat atuma jaraliin na shiimainkana anoujüin otta tü akuwaʼipaa jaʼyakat maʼin nünain Jeowa otta kamalainka sümüin wayuu (Juan 13:35; Gal. 5:14; 1 Juan 4:8). Süpüla watüjüin maʼin ekirajaa: aipüraliinjana waya.
2. ¿Jamüsü choʼujaaka aipüraliin waya?
2 Aipüraliinjana waya. Jesuu chi Atüjakai maʼin Ekirajaa, aisü nüpüla wayuu müsüjeseʼe saapajüin nünüiki (Luc. 5:12, 13; Juan 13:1; 15:13). Aire wapüla na wayuukana, waküjeena maʼin amüin pütchi. Nnojoleerü kasain ooʼuleʼerüin waya: jaʼitairü ayouktünüin tü pütchikat, müliain waya otta sülatüin waneeirua kasa wamüin. Waapajeena maʼin anüiki na waküjakana amüin pütchi jee pansaweerü sümaa nakuwaʼipa tü pütchi waküjakat. Otta keeʼireejeerü waaʼin wekirajüin na wayuukana otta yapawaijeena waya süpüla tia.
3. ¿Jameerü wakuwaʼipa sünain waʼyataain nümüin Maleiwa kojutüle wamüin tü shiimainkat?
3 Kojuta wamüin tü shiimainkat. Kojutüsü nümüin Jesuu tü shiimain suluʼukat tü Wiwüliakat. Müsü aka saaʼin wanee korolo kojutüsü nümüin (Mat. 13:52). Kojutüle wamüin tü shiimainkat, talateena waya sünain aküjaa pütchi otta nashateerü tia na waküjakana amüin pütchi. Nnojoleena mmoleʼein waya süka shieerüin waaʼinmaain sujutü tü pütchi waküjakat suulialeʼeya tü isakat wachiki.
4. ¿Kasa waaʼinrajatka süpüla aipüraliin waya?
4 Süpüla aipüraliin waya. Süpüla aipüraliin waya, wasakirüinjatü waaʼin sünain mojuin maʼin sukuwaʼipa nanoula na wayuukana otta sünain aipüralin Jeowa nümaa chi Nüchonkai (Mar. 6:34; 1 Juan 4:10, 11). Kooʼomüinjeerü sujutü wamüin tü shiimain suluʼukat tü Wiwüliakat müleka wekirajaale wamüiwaʼa weinshi sümaa wasakirüin waaʼin. Soto waaʼin: tü aipüralüükat shia soʼutku tü akuwaʼipaa nünainpünaakat chi naaʼinkai Maleiwa (Gal. 5:22). Müsüjeseʼe eein süpüla wachuntüin maʼin nümüin Jeowa nükaaliinjüin waya otta naapüin wamüin chi naaʼinkai (Luc. 11:13; 1 Juan 5:14). Jaʼitainna matüjüin maʼin waya karaloukta, weiwaʼaliinya ekirajaa otta nnojoluin tütüin maʼin waya sünain ekirajaa, atüjeena waya ekirajaa sünain tü Wiwüliakat aipüraliire waya otta kojutüle wamüin tü shiimain suluʼukat tü Wiwüliakat.