Ee waaʼin sünain aküjaa pütchi
1. ¿Jamüsü eeinjatka waaʼin waküjapa pütchi?
1 Aküjüshii pütchi maaʼulu yaa «saʼaka wayuu mojulaasü» na aʼyataakana nümüin Maleiwa, ‹müshii aka saaʼin anneetchen› saʼaka erü simoluuna (Mat. 10:16; Fili. 2:15, NM). Joutsü wayuu mojulaaka, eʼraka wayumüin otta apattajaka wayuu, süküjüin tia «masütaajüin» wayuu sünain aainjaa kasa mojusü (2 Tim. 3:13). ¿Jarat tü pütchi suluʼukat tü Wiwüliakat akaaliinjeenaka waya süpüla ‹eein waaʼin› waküjapa pütchi? (Mat. 10:16.)
2. ¿Kasa woʼunamaatüinjatka oulia süpüla waküjüin pütchi yalapünaa?
2 Wayaawata waaʼin. Shia anaka aluʼu wounjulaale suulia tü mojeetka atuma wakuwaʼipa saashin Proverbios 22:3. Müsüjeseʼe eejüinjatüin waaʼin waneepia. Waneejatüjaasü sukuwaʼipa tü mmakat jaʼitairü anashiipuʼuin waraittaa. Eesü wainmajaʼalaa sümüle pulusiia kaayeruʼu jee shiale shia tü wayuukalüirua. Jee eeshii waapinnüle nutuma wanee wayuu süpüla woʼunüinjanain yalejee. Jaa mamaatüinjana waya nümüin, nnojotsü chüntüinjatüin woʼu sünain tü alatakat yala, oʼunüinjana waya aküjüin pütchi yalapünaa (Pro. 17:14; Juan 8:59; 1 Tes. 4:11, NM).
3. ¿Jamüsü süpüla waainjüin tü sümakat Eclesiastés 4:9 sünain aküjaa pütchi?
3 Koʼuyaajana waya. Müsü Eclesiastés 4:9, NM: «Anashii piamashii wayuu nuulia waneeshia». Eesü anale saaʼin wamüin aküjaa pütchi eepünaale waya, akatsaʼa eesü süpüla nnojoluitpain müin shia. Eesüjaʼa süpüla anain süküjüle pütchi wanee wawala sümüiwaʼa jee niale wanee jintüi, akatsaʼa eesü tü mma mojukat aluʼu shia, yaaʼaleekajaʼa aipoʼuupa. Shia analeeka aluʼu woʼuyaajanale wanee wayuu eejakai aaʼin (Ecl. 4:10, 12). Jülüjajiraainjana waya waaʼin sünain aküjaa pütchi jee aapirüinjana waya süpülapünaa woʼunüin.
4. ¿Kasa waaʼinrüinjatka süpüla anainjatüin wakuwaʼipa wapüshuaʼa sünain aküjaa pütchi?
4 Naküjüinjatü na laülaashiikana suluʼu tü outkajaaleekat kasainjatüin waaʼinrüin eere waküjüin pütchi süka nayain ‹aaʼinmajüin waya› (Heb. 13:17). Aneerü wakuwaʼipa nutuma Jeowa müleka nnojorüle yaletüin waaʼin otta jüüjüüle waya (Miq. 6:8; 1 Cor. 10:12). Keeʼireesü waaʼin naküjüinjanain pütchi napüshuaʼa na wawalayuukana, akatsaʼa eeinjatüin naaʼin.