Wachajaainjana na wayuukana süpüla waküjüin pütchi namüin
1. Eere jouluin na wayuu ashajakana naata anüikii, ¿jamüshii katatawalinjanaka na wawalayuukana sünain aküjaa pütchi?
1 Sünain tü miʼiraa kanüliakat Pentecostés soʼu tü juyakat 33, antüshi chi naaʼinkai Maleiwa suluʼumüin naaʼin na nikirajüinkana Jesuu, makalaka ‹naashajaain pütchiirua naatajatü› namüin na wayuu antakana wattajee sünainmüin tia miʼiraakat (Aluw. 2:4). Soʼu tia, woutiisashii maʼaka 3000 wayuu. Na wayuu chajanakana sünain tia, eeshii süpüla naashajaain anüikii naata maʼaka saaʼin hebreo otta griego. Akatsaʼa nücheküin Jeowa süküjünüin namüin tü pütchi anasükat suluʼu nanüiki. Müsü sukuwaʼipa tia süka analeein namüin na wayuukana aapajaa wanee pütchi süküjünüle namüin suluʼu nanüiki. Müsüjeseʼe katatawalin na wawalayuukana sünain aküjaa pütchi suluʼu wanee mma eere jouluin na wayuu aashajaakana naata anüikii (paashajeʼera Organizados, süp. 107, püt. 1, 2). Na wawalayuu aküjakana pütchi suluʼu naata anüikii, aküjüshii pütchi eepünaale naküjüin pütchi na wawalayuu noutkajaakana amaa otta eeshii naküjüle pütchi eepünaale naküjüin pütchi waneeinnua wawalayuu.
2. (1) ¿Kasa waaʼinrajatka wantüle sünain wayuu aashajaaka naata anüikii? ¿Jamüsü saainjünajatka? (2) Naküjüle pütchi na wawalayuukana eere wainmain wayuu aashajaaka naata anüikii, ¿kasa naaʼinrajatka süpüla nakaaliinjiraain? (3) ¿Kasa waaʼinrajatka nikirajaweere wanee wayuu aashajaakai naata anüikii?
2 Na wawalayuu kepiakana suluʼu wanee mma eere waneesiain neʼe anüikii aashajaanaka, aküjüinjana naya pütchi sainküin tü miichikalüirua. Kojuyale na wayuu naatakana anüiki suluʼu wanee mma, eesü süpüla süküjünüin pütchi suluʼu natuma na wawalayuukana sümaa naatain noutkajaalee. Nantüle sünain wanee wayuu naataka anüiki, nashajeerü jalain kepiain shia süpüla nawaraijaain saaʼu na wawalayuu atüjakana süpüleerua sünüiki. Akatsaʼa nayainjanain achajaaka shia na wawalayuu eʼitaanakana süpüla tia (paashajeʼera tü pütchikat «Wakaaliinjiraa»). Makalaka nachajaainjanain jee nashajüinjatüin jalain kepiain na wayuu naatakana anüiki süpüla naküjüin pütchi namüin. Müinjatü sukuwaʼipa natuma.
3. ¿Jamüshii eeka süpüla kamaʼain jee motsoʼoin namaa na wawalayuukana sünain achajawaa na wayuu naatakana anüiki? ¿Jalainjana achajaanüin naya?
3 ¿Jamüinjatü sukuwaʼipa nachajaaya na wayuukana? Eeshii süpüla kamaʼain jee motsoʼoin namaa na wawalayuukana sünain achajawaa na wayuu aashajaakana naata anüikii, müsüjeseʼe jülüjüinjatüin naaʼin tüü: «¿Jeʼrashii na wayuu wachajaakana? ¿Jeʼrashii waya sünain achajawaa? ¿Jeʼrainna na wayuu wantakana anain?» Eeshii süpüla nachajaain maʼin na wawalayuukana eere jouluin na wayuu naküjakana amüin pütchi. Pansaainjatü sukuwaʼipa tia natuma, mayaa wainmeena na wayuu nakaaliinjakana süpüla neʼraajüinjachin Jeowa (Roma 10:13, 14, NM).
4. (1) ¿Jamüinjatü süchajaaya wayuu naataka oumain? (2) Püküja süpüshi tü aainjünajatkat süpüla nachajaanüin na wayuu aashajaakana naata anüikii.
4 Süpüla nnojoluin amülain waʼyataain, jülüjüinjatü naaʼin chi wawala jülüjakai aaʼin tü aküjaakat pütchi otta müshia na laülaashiikana pansaale sukuwaʼipa süchajaaya wayuu (1 Cor. 9:26). Nayale aküjünüin amüin pütchi na wayuu naatakana oumain, aneeküneechi wanee wawala natuma na laülaashiikana süpüla aʼyatawaakat tia, tütüinjachi chia wawalakai, anashi niale wanee laülaashi jee niale wanee aʼyataakai neʼipajee. Eeshii wawalayuu keraatüjüliika atuma sukuwaʼipa nachajaaya na wayuu naatakana oumain. Eesü anüliee eʼraajünaka maʼin, püchajaa shia suluʼu wanee directorio jee shiale suluʼu Internet. Süchikijee tia ayamaajünüshii naya jee nawaraijaanüle aaʼu süpüla sütüjaanüin aaʼu süshajünüinjatüle nanülia süpüla naküjünüin amüin pütchi. Eeshii süpüla nachuntüin na laülaashiikana nakaaliinjünüin na wawalayuu aʼyataakana sünain achajawaa na wayuu naatakana oumain (paashajeʼera tü pütchikat «Püchajaale na wayuu naatakana anüiki»).
5. (1) ¿Kasa jülüjüinjatka naaʼin na achajaakana na aashajaakana naata anüikii? (2) ¿Jamüinjatü wanüiki namüin na wayuukana?
5 Watüjaainjatü aaʼu jamüin wachajaaka na wayuukana. Müinjatü waʼanaaya maʼaka saaʼin sünain aküjaa pütchi süka sünainpünaain shia waʼyataain nümüin Maleiwa. Talatsü naaʼin na wawalayuukana otta natüja apüleeruat tü anüikii naküjakat aluʼu pütchi süka nooʼulaküin tü nanüikinjatkat otta naashajaain tü anüikii naküjakat aluʼu pütchi. Eesü süpüla shiyaawajünüin tü oora alatinnakat sünain achajawaa wayuu, akatsaʼa nnojotsü süpüla süshajünüin tü oora alatinnakat sünain ashajaa nanülia na wayuukana otta aainjaa tü maapakat. Aküjünüinjana amüin pütchi na wayuu aashajaakana anüikii naata. Süntünüle anain wanee wayuu, aküjünajatü shia nümüin chi wawala jülüjakai aaʼin tü aküjaakat pütchi jee shiale nümüin chi aʼyataakai nümaa süpüla süshajünüinjatüin eere kepiain shia, jaʼitairü nnojoluin shikirajaweein. Mayaapejeʼe choʼujaain maʼin achajawaa na wayuu aashajaakana naata anüikii, nnojotsü shiainjatüin neʼe waʼyataain anain tia (paashajeʼera pütchikat «¿Jamüinjatü wanüiki wachajaapa na wayuu naatakana anüiki?).
6. ¿Jamüsü choʼujaaka wachajaain na wayuu naatakana anüiki?
6 Choʼujaasü maʼin. Eesü kapüleere maʼin achajawaa na wayuu aashajaakana naata anüikii. Kapüleesü pansaain watuma tü karaloukta sümaajatkat nanülia na waküjakana amüin pütchi süka nakolojoʼowaliin. Mayaapejeʼe müin shia, eesü choʼujaale maʼin saainjünüin tia suluʼu waneeirua mma. Nuluwataain waya Jeowa sünain aküjaa pütchi otta nnojoishi nia kachekalaʼatalüin wayuu (Aluw. 10:34). «Keeʼiree[sü] maʼi naaʼin suʼtteʼennüinjatüin wayuu süpüshua sümaa sütüjaainjatüin saaʼu tü shiimüinkat.» (1 Tim. 2:3, 4.) Wakaaliinja Jeowa namaa na wawalayuukana sünain achajawaa na wayuu aashajaakana naata anüikii otta aapajeekana tü pütchikat ‹süka süpüshua naaʼin› (Luc. 8:15).
[Epiikürape suluʼu süpanaka 5]
Wakaaliinjiraa
Choʼujaale namüin na wawalayuukana nakaaliinjünüin sünain achajawaa na wayuu aashajaakana naata anüikii, nüküjeerü chi wawala jülüjakai aaʼin tü aküjaakat pütchi namüin na laülaashiikana suluʼu wanee outkajaalee pejeka anain na wayuu nachajaakana. Anasü nayale naküjüin amüin na wawalayuu pejekana anain na wayuu achajaanakana. Aküjüneerü namüin na wawalayuukana nashajüinjatüin nanülia na wayuu aashajaakana nata anüikii, naküjüle pütchi namüin otta naapüinjatü tü karalouktakat nümüin chi wawalakai jülüjakai aaʼin tü aküjaakat pütchi süpüla naapüin shia namüin na wawalayuu achuntakana kaaliinwaa. Na wawalayuu jülüjakana aaʼin tü aküjaakat pütchi eere eein wayuu aashajaakana naata anüikii, pansaainjatü natuma sukuwaʼipa nachajaaya na wayuu aashajaakana naata anüikii.
Naashajaale wanee wawala nümaa wanee wayuu ekirajaweekai sümaa naatain nünüiki jee niale wanee manüisai, nüshajüinjatü nünülia suluʼu tü karalouktakat Sírvase visitar (S-43), naapajatü shia nümüin chi seküretaariokai eere nuutkajaain. Müle shia atumawaa, akaaliinjünamaateena na wayuu aapajeekana nünüiki Maleiwa (paashajeʼera km 5/11 süp. 3).
[Epiikürape suluʼu süpanaka 6]
Püchajaale na wayuu naatakana anüiki
• Püsakira na aʼyataakana pümaa, na ekirajaakana sünain tü Wiwüliakat, na püpüshikana otta waneeirua wayuu.
• Eesü anüliee eʼraajünaka maʼin, püchajaa shia suluʼu wanee directorio. Otta eesü karaloukta kaluʼuka nanülia sümaa sunuumerose nepia na wayuukana, eesü süpüla puusütüin shia suluʼu Internet otta suluʼu compañías telefónicas.
• Püsakira eere sükaaliinjünüin wayuu natuma na sülaülashiikana mma maʼaka saaʼin suluʼu biblioteca otta koleejia.
• Püchajaa suluʼu periódico wanee kasa nanainpünaaka na wayuu püküjakana amüin pütchi.
• Puʼuna suluʼumüin tü tienta nayaʼlajaalekat na wayuu püküjakana amüin pütchi.
• Müleka anashiire shia, piʼitaa karaloukta suluʼu tienta, eʼikülee miyoʼu, süshaʼwajüle kemion süpüla neʼrüinjatüin shia na wayuu püküjakana amüin pütchi.
• Anale namüin na sülaülashiikana mma, eesü süpüla piyaʼlajüin wanee directorio jee shiale wanee kasa achajaaka na wayuukana suluʼupünaa Internet.
[Epiikürape suluʼu süpanaka 7]
¿Jamüinjatü pünüiki püchajaapa na wayuu naatakana anüiki?
Kamaneere pia namüin na wayuukana otta lotule pünüiki, nnojoleena mmoluin naya. Anasü piiʼiyatüle namüin wanee karaloukta ashajünaka suluʼu nanüiki na wayuu püküjakana amüin pütchi.
Pümaa namüin süchikijee püsaküin naya: «Achajaashii waya wayuu aashajaakana ______ süpüla waküjüin namüin tü sümakat tü Wiwüliakat. ¿Piʼraajüin wanee wayuu eekai naashajaain ______?».