Wule watuma tü waaʼinkat

1. ¿Kasaichi sünülia tü outkajawaa miyoʼu waneekat kaʼi oʼtteetka settienpüroʼu 2012? ¿Jamüsü choʼujaaka wekirajaain sünain?

¹ Eejiraashii waya waneepia sümaa tü kasa waaʼinmajüinjatkat oulia waaʼin. Sünülia tü outkajawaa miyoʼu waneekat kaʼi oʼtteetka settienpüroʼu 1 soʼu 2012 shia: «Wule watuma tü waaʼinkat» (1 Tim. 1:19, NM). Sükaaliinjeena waya süpüla watüjaain saaʼu anale watuma sukuwaʼipa tia nüsülajalakat Jeowa wamüin.

2. Püküja tü pütchi asouktüneetkat eʼipajee.

² Asouktüneetka eʼipajee. Asouktüneerü eʼipajee sünain tü outkajawaakat akaratshisü pütchi sünainpünaaka tü waaʼinkat:

• ¿Kasa eeka süpüla yarüttüin atuma waaʼin?

• ¿Kasa waaʼinrüinjatka süpüla wekirajüin tü waaʼinkat?

• ¿Kasa waaʼinrüinjatka süpüla nnojoliinjanain wayain kasirüin amüloulin wayuu?

• ¿Kasa weeʼiyataka jülüjüle waaʼin tü sümakat tü Wiwüliakat otta wooʼulaale suʼunirüin wakuwaʼipa?

• ¿Jamüinjatü wakuwaʼipa suulia wamojujain naaʼin na waneeinnua?

• ¿Kasa naaʼinrajatka na jimaʼaliikana otta na majayünnüükana süpüla eejiraain naya sümaa tü kasa mojusü alatakat namüin?

• Nekirajüle naaʼin na wayuukana sükajee tü Wiwüliakat, ¿jameerü nakuwaʼipa noonoole sümaa?

3. ¿Kasa waaʼinrajatka süpüla anain maʼin wakuwaʼipa sutuma tü outkajawaakat?

³ Nüchajaain maʼin Satanaa sukuwaʼipa süpüla numojujeʼerüin tü waaʼinkat akatsaʼa nükaaliinjüin waya Jeowa. Müshi wamüin chi washi iipünaajachikai sükajee tü Wiwüliakat otta sükajee tü nupueulosekat: «Shiaʼaya wopukot tüü, juʼuna suluʼupünaa» (Is. 30:​21, NM). Wanee kasa nuʼuniraka aka waya Jeowa, shia sükajee tü ekirajaanajatkat anain sünain tü outkajawaa miyoʼu waneekat kaʼi. Makalaka nnojoluinjachin makatüin pia suulia. Jülüja paaʼin tü ekirajaanajatkat anain süpüla piʼitaain shia suluʼu pukuwaʼipa. Pikirajaa püchikuaʼa sümaa püpüshi sünain tü ekirajaanakat anain. Waainjüle tü nümakat Maleiwa wamüin, ayateerü wulein tü waaʼinkat otta nnojoleerü wooʼulaain mojuin wakuwaʼipa sutuma tü kasa mojusü naainjakat na manoujüinsaliikana (1 Ped. 3:​16, NM).