Tü kasa anasü eekat sutuma waʼyataain
1. ¿Kasa wayuu mojeetka atuma waaʼin waʼyataapa nümüin Maleiwa?
1 Nukumajüin Maleiwa na wayuukana süpüla «neʼrüinjatü tü kasa anasükat sükajee naʼyataain maʼin» (Ecl. 2:24, NM). Mojusüjeseʼe waaʼin müleka nnojorüle weʼrüin kasa anasü sünain waʼyataain nümüin Maleiwa. ¿Kasa waaʼinrüinjatka süpüla talatüin waaʼin?
2. ¿Jamüsü anainjatka tü jülüjakat waaʼin süchiki tü waʼyataainkat?
2 Anainjatü tü jülüjakat waaʼin. Anasü sukuwaʼipa tü niʼyataakat anain Jesuu nümüin Maleiwa mayaapejeʼe paliʼirüin na jaa makana sümüin nünüiki (Juan 17:4). Soʼu naashajaain Jesuu nüchiki wanee apünajüi, nüküjatüjülia eejeenain wayuu nnojoliijeenaka ichein suluʼu naaʼin tü pütchi aküjünakat nüchiki Maleiwa (Mat. 13:3-8, 18-22). Wekiraja sünain tü kasa anasü weʼreetkat sünainjee tü waʼyataainkat.
3. ¿Kasa talateetka atuma waaʼin mayaapejeʼe nnojoluin noonooin na wayuukana sümaa tü pütchikat?
3 Tü eekat sutuma waküjüin pütchi. Wanaa sümaa saashajaanüin nüchiki wanee apünajüi, aküjünüsü aneerüin nakuwaʼipa na wayuu oonookana sümaa tü pütchi aküjünakat namüin nüchiki Maleiwa (Mat. 13:23). Süsotopa jee süsüʼüjünapa süchon tü türiikukat, apünajünüsü tü waüyeekat süpüla kachoinjatüin shia süchikuaʼa, nnojotsü süpüla kachoinjatüin süchikuaʼa sünainjee tü suuʼuliakat. Müsia neʼe nukuwaʼipa wanee anoujüshi, nnojotsü shiainjatüin naaʼinmaain maʼin nunoujüinjachin wanee wayuu nutuma, tü naaʼinrüinjatkat maʼin shia nüküjüinjatüin maʼin süchiki Nuluwataaya Maleiwa. Talatsü waaʼin sutuma waküjüin pütchi, jaʼitairü nnojoluin noonooin na wayuukana sümaa. Waküjüle pütchi, wuleerü maʼin tü nünüliakat Jeowa watuma (Is. 43:10-12; Mat. 6:9, NM). Jee anasü maʼin waaʼin sutuma waʼyataain nümüin Maleiwa (1 Cor. 3:8, 9). Talatsü joo naaʼin Jeowa sutuma waküjüin pütchi nüchiki (Heb. 13:15, 16, NM).
4. ¿Kasa anasü eeka sutuma waküjüin pütchi sümüin wayuu?
4 Eesü nnojorüle weʼrüin kasa anasü sünainjee tü waʼyataainkat. Eeshijaʼa na wayuu nnojoliikana anoujamaatüin mayaapejeʼe naapajüin tü nünüikikat Jesuu yaaiwaʼaya nia yaa Mmapaʼa. Müsia neʼe wakuwaʼipa, eeshii waküjüle pütchi süchiki Nuluwataaya Maleiwa sümüin wanee wayuu, nnojotpajaʼa saapaamaatüin shia. Eeshiijaʼa naküjüliire pütchi mapa naya wayuukana. Anasü maʼin sukuwaʼipa wayuu sutuma tü pütchi waküjakat. Ayata ‹waaʼinrüin maʼi wainma kasa anasü›, sünainjee tia weeʼiyateerü nikirajanain waya Jesuu (Juan 15:8).