Washata nakuwaʼipa na nünüikimaajanakana Maleiwa: Jonaa
1. ¿Jarat tü akuwaʼipa anakat maʼin nünain Jonaa?
1 ¿Kasa antaka suluʼu waaʼin waapapa nüchiki Jonaa, chi nünüikimaajachikai Maleiwa? Eeshii eeka namüin nüchiki niain wanee wayuu mmoleʼe, nnojotsü amülialaain naaʼin saalin wayuu. Wayuupejeʼe meimmoluinsai Jonaa, nnojotsü yaletayaain naaʼin otta nnojotsü naaʼinrüin neʼe tü keeʼireekat naaʼin. ¿Kasa waaʼinrajatka süpüla washatüin nukuwaʼipa Jonaa? (Sant. 5:10.)
2. ¿Kasa waaʼinrajatka süpüla washatüin nukuwaʼipa Jonaa?
2 Nnojotsü yaletüin naaʼin. Kanüliashii maʼin sünain mojulaain na wayuu chajanakana kepiain Siiria. Nnojoishijeseʼe oʼuneein Jonaa wanaa sümaa nuluwataanüin nutuma Maleiwa, wattakuwaishi neʼe nia suluʼu wanee mma naata. Oʼutülii maʼin saaʼin wayuu na chajanakana kepiain Nínive (Nah. 3:1-3). Achiaanüshi Jonaa nutuma Jeʼwaa, aluwataanüshi nia nüchikuaʼa süpüla nikeraajüin tü aluwataanakat anain nia paala. Naainjüin Jonaa tia aʼyatawaakat sümaa nnojoluin yaletüin naaʼin (Prov. 24:32; Jon. 3:1-3). Nikeraajüin Jonaa tia, mayaapejeʼe nnojoluin naainjeein shia paala (Mat. 21:28-31). Jama wayakana, ¿ayateenache waya aküjüin pütchi jaʼitainna wachiaanüin jee kapüleere maʼin aküjaa pütchi eere waküjüin pütchi?
3. Ayateere waküjüin pütchi sümüin wayuu, ¿jamüshii meimmoluinjanaka waya otta nnojoluinjanaka waaʼinrüin tü keeʼireekat waaʼin?
3 Meimmoluinsai otta nnojotsü naaʼinrüin tü keeʼireekat naaʼin. Wanaa sümaa nuʼluwataain Jonaa chaa suluʼu tü mmakat Tarsis, ouktataainna nünainjee na wayuu anuapüʼükana, naapajiraaka nikii naaʼu suulia ouktajüin naya (Jon. 1:3, 4, 12). Nikeraajapa Jonaa tü aluwataanakat anain nia, oʼunüshi pasanainpünaa sünain tü pueulokot, eesüjaʼa süpüla shiain nüchajaain eeinjatüle nüküjüin tü naaʼinrüinjatkat Jeʼwaa naka na wayuu yalejeʼewaliikana. Tia, nnojotsü süpüla naaʼinrüinjatüin wanee wayuu eekai mmoleʼein. (Jon. 3:3, 4). ¿Kasa shikirajaka anain waya tia? Wachuntüinjatü nümüin Maleiwa meimmoluinjanain waya süpüla ayatüin waküjüin pütchi sümüin wayuu mayaapejeʼe kapüleein shia (Aluw. 4:29, 31). Nnojoluinjatü waaʼinrüin neʼe tü keeʼireekat waaʼin süpüla wakaaliinjüin na waneeinnua, wakatalüin kaʼi, otta nneerü süpüla ayatüin waküjüin pütchi (Aluw. 20:24).
4. ¿Jamüsü anaka waashajaale suluʼu waaʼin nachiki na nünüikimaajanakana Maleiwa?
4 Waashajeʼerapa tü nachikimaajatkat na nünüikimaajanakana Maleiwa, maa wayakai alatüin amüin tü alatakat namüin. Waashajaa suluʼu waaʼin: «¿Kasajeʼe taainjaka tayale alatüin amüin tia? ¿Kasa taaʼinrüinjatka süpüla tashatüin tü akuwaʼipa anakat nanain?» (Heb. 6:11, 12). Wekirajaweerü anain sooʼomüin nachiki waneeinnua nünüikimaajana Maleiwa, suluʼu tü karaloukta Waʼyataain Nümüin Maleiwa ojuʼiteetkat mapeena.