Washata nakuwaʼipa na nünüikimaajanakana Maleiwa: Joel
1. ¿Kasa waaʼinmaaka maʼaka naaʼin Joel?
1 ¿Jarai chi wayuu kanüliakai Joel? Waashajeʼerüin sünain tü karaloukta nünüliamaakat nüchoin nia Petuel (Joel 1:1). Joel, nnojotsü yaletüin naaʼin. Shia naaʼinmaaka tü nümakat Jeʼwaa otta tü aluwataanakalü anain nia. Müsia neʼe tü wakuwaʼipakat waküjapa pütchi; nnojotsü suchuntaain waaʼin kojutüinjanain maʼin waya jee waʼwaajünüin. Shia waaʼinmaaka weʼraajirüin sümüin wayuu tü nümakat Jeʼwaa otta tü sümakat tü Nünüikikat (1 Cor. 9:16; 2 Cor. 3:5). ¡Atütülaasü saaʼin tü wayuukalüirua sutuma tü pütchi waküjakat! Wekirajaa sünain soʼutku tü nüshajakat paala Joel. Waainjüle tia, keeʼireejeerü waaʼin sükooʼomüinraain waʼyataain nümüin Maleiwa otta waʼatapajeerü woʼtteʼennüin.
2. ¿Kasa waaʼinrajatka süka sülüʼülüin nükalia Jeʼwaa?
2 Alüʼülaasü nükalia Jeʼwaa (Joel 1:15). Mayaainjeʼe sülatüirüin maʼaka 3.000 juya süchikijee süshajünüin pütchikat tia, ekeraajüsü shia maaʼutpünaa. Joutsü maʼin kasachiki maaʼutpünaa, meeʼerapalashii waya sünain aküjaa pütchi otta eeshii na jashichikana wamüin. Shiiʼiyatüin wamüin tia sülüʼülüin süpüla sajaʼttüin tü kasakalüirua (2 Tim. 3:1-5; 2 Ped. 3:3, 4). Süka sülüʼülüin nükalia Jeʼwaa, waaʼinmaainjatü maʼin tü aküjaakat pütchi suulialeʼe wanee kasa (2 Ped. 3:11, 12, NM).
3. ¿Jamüsü waaʼinmaainjatka tü aküjaakat pütchi sümaʼinruʼu waʼatapüin tü müliaa miyoʼushaatakat?
3 Naaʼinmajeerü Jeʼwaa tü nupueulosekat (Joel 3:16). Saashin süpüshi tia wersiikulokot, akutkujaainjatü tü sirumatuʼukat otta tü mmakat. Tia sünainpünaasü tü naainjüinjatkat Jeʼwaa suʼunnaa tü müliaa miyoʼushaatakat. ¡Atalatalaasü waaʼin sutuma watüjaain saaʼu noʼttaajeenain nutuma Jeʼwaa na wayuu oonookana nümaa! (Alat. Map. 7:9, 14.) Kanouleena maʼin waya otta nnojoleena eimmolojooin waya müleka waaʼinmaale tü aküjaakat pütchi otta jülüjüle waaʼin katchin waaʼin nutuma Jeʼwaa sümaa nükaaliinjüin waya. Choʼujaasü maʼin wamüin tia süpüla woʼttaain süchikijee tü müliaa miyoʼushaatakat.
4. ¿Jamüsü talatüinjatka waaʼin jee nnojoliinjanaka mmoluin waya seema tü kasa alateetkat mapeena?
4 Eeshii na jülüjakana aaʼin naashajaain neʼe Joel süchiki kasa mojusü, nnojotpejeʼe müin shia. Aashajaashi nia süchiki suʼttaainjatüin nupueulose Maleiwa (Joel 2:32). Nnojo mmoluin waya seema tü kasa alateetkat mapeena, waküja maʼin pütchi süchiki Nuluwataaya Maleiwa jee wooʼulaa shikeraajai wanain tü sümakat Joel 2:23, NM: «Ana jaaʼin nümaa chi Jümaleiwasekai Jeʼwaa otta talata jaaʼin».