¿Püchajaain sukuwaʼipa süpüla piʼyataain suluʼu tü outkajaaleekat?
1. ¿Paʼatapüinjatche miyoʼuin pia süpüla puʼunüin süchiirua tü sümakat 1 Timoteo 3:1?
1 Müsü 1 Timoteo 3:1: «Chi wayuu eekai keeʼireein naaʼin laülawaa napüleerua na anoujashiikana suluʼu tü outkajaaleekat, anashaatasü maʼi tü nüchekakat nüpüleerua». Pütchikat tia, sütütüleʼerüin naaʼin na jimaʼaliikana süpüla naʼyataainjanain suluʼu tü outkajaaleekat. ¿Paʼatapajüinjatche miyoʼuin pia süpüla puʼunüin süchiirua tia pütchikat? Nnojo. Anasü maʼin piʼyataale süchiirua tia jintüliiwaʼaya pia. Eeshi süpüla pikirajünüin otta anain pukuwaʼipa süpüla piʼyataainjachin neʼipajee na laülaashiikana (1 Tim. 3:10). ¿Woutiisaichi pia? Mülejeʼeya shia, anuu tü paainjüinjatkat süpüla piʼyataainjachin suluʼu tü outkajaaleekat.
2. ¿Kasa paaʼinrajatka süpüla keeʼireein paaʼin akaaliinjaa? ¿Kasa eeka süpüla pükaaliinjüin anain?
2 Keeʼireeinjatü paaʼin akaaliinjaa. Soto paaʼin keeʼireein paaʼin wanee kasa anashaatasü maʼin: aʼyatawaa napüleerua na waneeinnua. Nnojotsü shiain shiiʼiree kojutüin maʼin pia atumawaa. Makalaka keeʼireeinjatüin paaʼin pükaaliinjüin na puwalayuukana. Süpüla püinküin tia, anasü jülüjüle paaʼin nukuwaʼipa Jesuu namaa na waneeinnua (Mat. 20:28; Juan 4:6, 7; 13:4, 5). Isale saaʼin püchiki pükaaliinjüin na waneeinnua, puchunta kaaliinwaa nümüin Jeʼwaa (1 Cor. 10:24). Anashii pükaaliinjüle na wawalayuu ayuuikana jee nayale na laülaayuukana. Anashi pükaaliinjüle sünain wuleinjatüin putuma tü Piichi Outkajaaleekat. Mantüinre wanee wawala ekirajüinjachikai sünain tü Ekirajaraakat süpüla Aküjaa Pütchi, yapa pia süpüla pikirajüin nooʼopünaa. Talateerü maʼin paaʼin müleka pükaaliinjüle na waneeinnua (Aluw. 20:35).
3. ¿Kasa achuntünaka nümüin wanee wayuu aʼyataweekai suluʼu tü outkajaaleekat? ¿Kasa naaʼinrajatka süpüla nüinküin tia?
3 Iche putuma punoula. Tü achuntünakat nümüin wanee wayuu aʼyataweekai suluʼu tü outkajaaleekat, shia anainjatüin maʼin nunoula; nnojotsü shiain kekiin maʼin nia. Chi wayuu anakai anoula, niyaawata aaʼu tü jülüjakat naaʼin Jeʼwaa otta jülüjakat naaʼin Jesuu (1 Cor. 2:15, 16). Jaʼyeerü naaʼu tü akuwaʼipaa eekat sutuma jüüjüwaa nümüin chi naaʼinkai Maleiewa (Gal. 5:22, 23). Shia palajanaka nutuma Nuluwataaya Maleiwa otta naaʼinmaasü tü aküjaakat pütchi (Mat. 6:33). Süpüla anain punoula, acheküsü paashajeʼerüin tü Wiwüliakat, paashajeʼerüin süpüshuaʼa tü rewiisütakat Aapiria Wayuu otta ¡Despertad!, pikirajaainjatü anain tü outkajawaakat otta nnojolinjachi makatüin pia suulia (Sal. 1:1, 2; Heb. 10:24, 25). Müshi Pablo nümüin Timoteo wanaa sümaa nütütüleʼerüin naaʼin süpüla kooʼomüin niʼyataain: «Ee paaʼin sünain tü pukuaippakat suulia [...] pikirajüin sünain kasa naatajatü» (1 Tim. 4:15, 16). Makalaka pikirajaainjatüin anain palajana tü pikirajüinjatkalü anain na wawalayuukana sünain tü Ekirajawaakat süpüla Aküjaa Pütchi otta pütüjaainjatü aaʼu tü paashajaakalü achiki sünain aküjaa pütchi. Püchajaa sukuwaʼipa süpüla pürekutsoolüin pia, piʼyataain suluʼu Weteet jee shiale pikirajaain sünain tü Ekirajawaakat sünain tü Wiwüliakat napüla na Tooloyuu Maʼwayuusekana. Ichere putuma tü punoulakat, piyoukteerü «tü kasa [...] keejiakat namüin na jimaʼalii[kana]» (2 Tim. 2:22).
4. ¿Jamüshi noonooinjachika waneepia wanee wayuu?
4 Poonoo waneepia. Nakalioʼu na aluwataaushiikana, müliashii sutuma jamü na anoujüshiikana. Makalaka naneeküin na aluwataaushiikana «akaratshishii tooloyuu [...] eekai pansaain nakuaippa» süpüla neitajüin tü eküütkat. Oonooshii waneepia naya tooloyuukana makalaka shiain naaʼinmaain na aluwataaushiikana tü eʼitaanakalü apüla naya (Aluw. 6:1-4). ¿Kasa shikirajaka anain pia tia? Paainjüinjatü tü kasa aluwataanakalü anain pia. Püshata nukuwaʼipa Noé. Wanaa sümaa nuluwataanüin sünain akumajaa tü anua miyoʼushaatakat, «naaʼinrüin süpüshuaʼaya tü nuluwataakat anain» Maleiwa (Gén. 6:22). Kojutshi maʼin nümüin Jeʼwaa chi wayuu aainjakai süpüshuaʼa tü aluwataanakalü anain nia otta niiʼiyatüin laülaain naaʼin sünain anoujaa (1 Cor. 4:2; paashajeʼera tü pütchikat «Anashii nekirajünüle»).
5. ¿Jamüshii nachajaainjanaka sukuwaʼipa süpüla naʼyataain suluʼu tü outkajaaleekat na jimaʼaliikana?
5 Aʼyataashi maʼin Jeʼwaa süchiirua nakotchojünüin na wayuukana (Is. 60:22). Woutiisashii juyawai maʼaka 250.000 wayuu. Süka wainmain na wayuu ekerotokana sünain anoujaa, choʼujaashii tooloyuu anakana anoula otta tütükana sünain aʼyatawaa suluʼu tü outkajaaleekat. Wainma maʼin kasa aʼyataanajatka anain nümüin Jeʼwaa (1 Cor. 15:58). Makalaka anain maʼin tü keeʼireekat naaʼin na jimaʼalii aʼyataweekana suluʼu tü outkajaaleekat.
[Pütchi suluʼuka süpana 2]
Süka wainmain na wayuu ekerotokana sünain anoujaa, choʼujaashii tooloyuu anakana anoula otta tütükana sünain aʼyatawaa suluʼu tü outkajaaleekat
[Pütchi süttaka suluʼu süpana 3]
Anashii nekirajünüle
Anashii naluwataanüle sünain wanee kasa na tepichikana natuma na laülaashiikana otta nekirajüinjana sünain jamüinjatüin sukuwaʼipa natuma. Naashin wanee wawala alapalaakai waaʼu, aikkalaashi nia eekai tü ekirajüleekat süpüla nütütüleʼerüin naaʼin wanee wawala. Niʼraka wanee jintüi shaʼwatüin nüʼütpaʼa otta nüsakira nia naʼatapajüle nia süpüla yootoo nümaa. Naashin chi jintüikai niawai wuleka atuma tü ekirajüleekat süchikijee tü outkajawaakat. Oʼunajanainna na kachonniikana nia, nnojoishi oʼuneein süka nnojotyülüinya kettaain nutuma tü aluwataanakalü anain nia. Nütamaaka yaleejechiki chi wawala alapalaakai waaʼu nüpüleerua chi jintüikai. Nümaka mapa: «Na laülaashiikana suluʼu tia outkajaaleekat, eejüsü naaʼin sünain ekirajaa na tepichikana. Makalaka naküjawalin nünülia wanee jimaʼai keraakai süpüla aʼyatawaa neʼipajee na laülaashiikana».