Washata nakuwaʼipa na nünüikimaajanakana Maleiwa: Miqueas
1. ¿Kasache antaka suluʼumüin nikii Miqueas wanaa sümaa naapirüin na wayuu chajanakana Israel otta Judá? ¿Jamüsü watüjaaka saaʼu nnojoluin amülain tü niʼyataainkat?
1 Eesü süntüirüle suluʼumüin wekii joujeerüin sajaʼttinnüin tü kasakalüirua. Eesüjaʼa süpüla süntüin tia suluʼumüin nikii Miqueas sünain aapiraa na wayuu chajanakana Israel otta Judá sünain najaʼttirajanain naya Jeʼwaa. Nnojotpejeʼe amülain tü niʼyataainkat. Soʼu juyaka 740 süpülapünaa wakalia, nikeraajüin Jeʼwaa tü nümakat wanaa sümaa najaʼttirüin Samaria (Miq. 1:6, 7). Shiasaʼa kojuya juya süchikijee tia, ajaʼttinnüsü Jerusalén soʼu juyaka 607 (Miq. 3:12). ¿Kasa waaʼinrajatka süpüla washatüin nukuwaʼipa Miqueas sümaʼinruʼu waʼatapajüin tü nükaliakat Jeʼwaa?
2. ¿Jamüshii nnojoliinjanaka washapajaain aaʼin sümaʼinruʼu waʼatapajüin nükalia Jeʼwaa? ¿Kasa sünainpünaaka tia?
2 Nnojo washapajaain aaʼin. Müshi Miqueas: «Aluʼusaʼa tayakai, eejeerü taaʼin sünain aʼatapajaa Jeʼwaa. Nnojoleechi taya ashapajaain aaʼin, ayateechia taʼatapajüin chi Maleiwa oʼtteʼerüinjachikai taya» (Miq. 7:7, NM). Tia, nnojotsü maluʼuluin nnojoluin kasain naaʼinrüin sümaʼinruʼu naʼatapajüin nükalia Maleiwa. Suulialeʼeya tia, jüüjüüshi nia sünain aapiraa na wayuukana. Akaʼaya wayakana shiainjatü waaʼinraka tia. Sümaʼinruʼu waʼatapajüin tü nükaliakat Jeʼwaa, wuleinjatü watuma tü wakuwaʼipakat otta waaʼinrüinjatü tü kasa talatakalü atuma naaʼin Maleiwa (2 Ped. 3:11, 12, NM). Soto waaʼin nnojolin nüshapajaain Maleiwa süpüla najaʼttirüin tü wayuukalüirua süka keeʼireein naaʼin shiyaawajaainjatüin suulia saainjala (2 Ped. 3:9). Makalaka anain washatüle nakuwaʼipa na nünüikimaajanakana Maleiwa sünain aʼatapajaa nükalia Jeʼwaa (Sant. 5:10).
3. ¿Jamüshii nnojoliinjanaka wakulajaain aaʼin sünain achuntaa nümüin Jeʼwaa chi naaʼinkai?
3 Nükatchinrüin waaʼin Jeʼwaa. Kapüleesü tü aluwataanakalü anain Miqueas makalaka nuchuntüin kaaliinwaa nümüin Jeʼwaa (Miq. 3:8). Nütüjaa aaʼu Jeʼwaa nükaaliinjüinjanain waya. Müshiijeseʼe woʼuraajüinjanain nümüin saashin tü Wiwüliakat. Nnojorüle waaʼin sünain aaʼinraa wanee aʼyatawaa nümüin Maleiwa, nükatchinreerü waaʼin süpüla waaʼinrüin tia (Sal. 84:5, 7; Is. 40:28-31). Watüjaa aaʼu sünain nükatchinrüin waaʼin Jeʼwaa suʼunnaa wanee kasa. Nnojo wakulajaain aaʼin sünain achuntaa nümüin chi naaʼinkai (Luc. 11:13).
4. ¿Kasa shikirajaka anain waya nukuwaʼipa Miqueas?
4 Naainjüin Miqueas waneepia tü nüchekakat Maleiwa. Nüchajaain sukuwaʼipa süpüla noonooin nümaa suulialeʼeya naainjüin kasa mojusü. Maaʼulu, wainma tü kasa ooʼulakünakalü aka waaʼin. Makalaka choʼujaain «pansaa[in] wakuwaʼipa waneepia sümaa nünülia chi Wamaleiwasekai Jeʼwaa» (Miq. 4:5, NM).