Tü paaʼinrajatkat pikirajüle wanee wayuu matüjüinkai aleejaa
1. ¿Jamüsü kapüleeka ekirajaa wanee wayuu isakai achiki aleejaa?
1 Eeshii na wayuu kamalainkana amüin tü nüchikikat Maleiwa, shiasaʼa müin nnojoluin jamajatüin namüin tü Wiwüliakat otta waneeirua karaloukta süka isain nachiki aleejaa. Makalaka nnojoluin anain müleka wekirajüle naya süka tü karalouktakat Kasa shikirajaka. ¿Kasa waaʼinrajatka süpüla wakaaliinjüin na wayuu makana akuwaʼipa? Asakiijünüshii sainküinpünaa piama shikii mma kojuyashii wawalayuu atüjakana maʼin ekirajaa. Anuuka joo tü naküjakalü achiki.
2. ¿Kasa eeka süpüla wekirajüin aka na wayuu matüjüinkana karaloukta?
2 Kajale wanee pikirajüin sünain aleejaa jee matüjüinre nia, pikiraja nia süka tü karalouktakat Poonoo nümaa Maleiwa jee shiale Poonoo nümaa Maleiwa süpüla katüin poʼu waneepia. Wanee pürekutsoot chakai Estados Unidos, niiʼiyatawalin tia piamasükat poyeeto sünain nümüin: «¿Jara kamalainka pümüin?». Naashin na wawalayuukana chaa Kenia, anashantasü ekirajaa süka tia karalouktakalüirua. Atüjamaatüshii na wayuukana nekirajünüle süka wanee kuenta. Isasü saaʼin nachiki müleka nasakiijünüle. Mapüleesat aleejaa otta asoukta shiʼipajee wanee pütchi namüin na karalouktamaajanakana, isapejeʼe saaʼin nachiki na matüjüinkana karaloukta. Nekirajüle na wawalayuukana wanee wayuu matüjüinkai karaloukta, nekirajüin nia süka tü karalouktakat Pütchi anasü nutuma Maleiwa, Eeshi süpüla paʼaleewain Maleiwa jee shiale tü karalouktakat Aküjalaa.
3. ¿Kasa paaʼinrajatka pikirajüle wanee wayuu matüjüinkai aleejaa?
3 Pütütüleʼera naaʼin. Na wayuu matüjüinkana aleejaa, eeshii japüire naya otta namüle: «Wayuuwaʼata neʼe taya». Süpüla pikirajüin naya nüchiki Maleiwa, anainjatü naaʼin putuma sünain tü ekirajawaakat. Na wayuu matüjüinkana aleejaa kekiishii maʼin naya otta jüüjüüsü tü nekiikat. Kojutüinjana naya putuma otta nnojoishii paapülijüinjanain naya (1 Ped. 3:15). Ayateena ekirajaain naya müleka neʼrüle anain maʼin tü naainjakat otta neʼrüle sükooʼomüinraain nanoula. Makalaka anain maʼin pütütüleʼerawaire naaʼin.
Müinjatü putuma nekirajia na wayuu matüjüinkana aleejaa
4. ¿Jamüinjatü wanüiki namüin na wekirajüinkana süpüla yapain natuma tü nekirajaainjatkalü anain?
4 Püküja nümüin chi pikirajüinkai yapainjatüin nutuma tü nikirajaainjatkalü anain, jaʼitairü isain maʼin nüchiki aleejaa. Na aküjülii pütchi chakana Sudáfrica, nootuin na nekirajüinkana sünain achuntaa kaaliinwaa namüin na napüshikana jee nayale na naʼaleewainyuu atüjakana aleejaa. Wanee wawala chaa Gran Bretaña naʼanapirüin na nikirajüinkana tü nükaralouksekat süpüla neʼrüin mapüleejeerüin namüin asouktaa nejeettüle tü nakaralouksekat. Tü naainjakat wanee wawala chaa India shia niiʼiyatüin namüin na nikirajüinkana tü ayaakuaa sünainkat tü nekirajaainjatkalü anain soʼu semaanakat tüseena otta namüshii naya: «Jülüjüinjatü paaʼin tü ayaakuaakalüirua wanee kaʼi süpülapünaa wekirajaain sünain».
5. ¿Kasa naaʼinraka wanee wayuu nnojoikai ashapalaain aaʼin sünain ekirajaa?
5 Nnojo püshapalaain aaʼin. Shia jülüjüinjatka maʼin paaʼin kasain saashajaain maʼin achiki tü karaloukta pikirajakalü aka otta pükaaliinjüinjana na pikirajüinkana süpüla nayaawatüin saaʼu. Shia anaka aluʼu motsoʼole pümaʼa sünain ekirajaa maʼaka poloo jee shiale poloo jaʼralimüin minuuto. Anasü paliʼirüle tü pütchi pikirajakalü anain nia. Nnojo püshapalaain aaʼin müleka kajale sünain aleejaa chi pikirajüinkai. Eeshi süpüla kajaalapüin nia, sükooʼomüinraapa naaliin Jeʼwaa nüpüla. Süpüla alinjachin Jeʼwaa nüpüla, puunejaainjachi nia sünain tü outkajawaakat nuʼttaiwaʼaya sünain ekirajawaa.
6. ¿Jamüinjatü nikirajia wanee wayuu matüjüinkai aleejaa?
6 Süpüla kooʼomüinjatüin nunoula wanee wayuu, atüjüinjachi nia aleejaa (Sal. 1:1-3). Eeshii na wawalayuu ekirajakana wayuu süka tü karalouktakat Pikirajaa sünain ashajaa otta aashajeʼeraa karaloukta. Naainjawalin tia motsoʼo kettaapa natuma tü ekirajawaakat. Nnojorüle naaʼin chi wayuukai sünain ekirajawaa, paashajaa nümaa süchiki tü kasa nütüjüitkalü apüleerua. Püma nümüin nükaaliinjüneechin nutuma Jeʼwaa otta nuʼuraajüinjachin nümüin (Prov. 16:3; 1 Juan 5:14, 15). Na wawalayuukana chaa Gran Bretaña, naküjüin namüin na nekirajüinkana natüjüinjanain süpüleerua kasa eekai mapüleein maʼaka saaʼin natüjaain saaʼu tü leetürakalüirua, natüjüin süpüleerua achajawaa wanee wersiikulo sümaa naashajeʼerüin shia. Otta mapa, naküjüin naashajeʼerüinjatüin wanee karaloukta eekai mapüleein aleejaa. Süpüla pikirajüin wanee wayuu sünain aleejaa, pütütüleʼerüinjatü saaʼin süpüla keeʼireeinjatüin saaʼin atüjaa.
7. ¿Jamüshii nnojoliinjanaka waʼalijiraain suulia ekirajaa wanee wayuu eekai matüjüin aleejaa?
7 Matüjüinsai alerajaa wayuu Jeʼwaa, jaʼitaichi nnojolin karalouktamaajachin nia (Job 34:19). Shia jülüjaka naaʼin tü suluʼukat saaʼin wayuu (1 Crón. 28:9). Makalaka nnojoliinjanain waʼalijiraain suulia ekirajaa wanee wayuu eekai matüjüin aleejaa. Wainma tü karaloukta eekat süpüla woʼttüin aka sünain ekirajaa. Mapa, eeshii süpüla wekirajüin naya süka tü karalouktakat Kasa shikirajaka süpüla natüjaain saaʼu waneeirua pütchi eekai kapüleein aaʼin.