Ekirajawaa süpüla Aküjaa Pütchi soʼu 2015: sükaaliinjeena waya süpüla wanoukteʼerüin wekirajia

¹ Müshi David: «Jeʼwaakalee, piakai akaaliinjakai taya, kasataalejeseʼe anain maʼin pümüin tü pütchi teweetirakat otta tü kasa jülüjakat taaʼin» (Sal. 19:​14, TNM). Müshiʼiya wayakana, keeʼireesü waaʼin talatüin naaʼin Jeʼwaa sümaa tü wanüikikat. Kojutüsü maʼin wamüin waashajaain süchiki tü shiimainkat namüin na wawalayuukana otta namüin na wayuukana. Nikirajüin waya Jeʼwaa sükajee tü outkajawaakat Ekirajawaa süpüla Aküjaa Pütchi. Alatüsü suulia 111.000 outkajaalee saainjünaka aluʼu tia sainküinpünaa mmakat. Wainmainna na wawalayuu atüjakana maʼin sutuma tia ekirajawaakat. Atüjüshii naya süpüleerua ekirajaa wayuu sümaa anain nanüiki, yalayalain naaʼin otta meimmoluin naya (Aluw. 19:8; Col. 4:6).

² Anuu tü karaloukta ekirajaanajatkalü aluʼujee soʼu juyaka 2015: Tü Nüchikimaajatkat Jesucristo, Traducción del Nuevo Mundo de las Santas Escrituras, Juʼuna jümaala, jikirajeena naya, juwoutisaajeena naya, Aküjalaa suluʼujeejatü tü Wiwüliakat, ¿Kasa shikirajaka anain waya tü Nünüikikat Maleiwa?, ¿Kasa shikirajaka maʼin tü Wiwüliakat? otta Aapiria Wayuu. Nnojoluitpa wanaawain tü minuuto eʼitaanakat süpüla tü pütchi anakat maʼin otta tü pütchikat 1. Wekirajaainjatü anain jooluʼu tü kasa eeʼiratakat sünain tü ekirajawaakat otta tü sukuwaʼipainjatkat.

³ Pütchi anaka maʼin. Soʼu piama minuuto, nüküjüinjatü wanee wawala tü pütchi anakat maʼin suluʼujee tü Wiwüliakat. Yapale nutuma tü pütchikat, kamalainjeerü shia namüin na wawalayuukana otta kettaajeerü nutuma soʼu tü minuuto eʼitaanakat nüpüla. Apütaainjatü aipirua minuuto süpüla naküjüinjanain na wawalayuukana tü pütchi anakat namüin, naküjüinjatü soʼu 30 sekunto. Yapainjatü maʼin natuma na wawalayuukana tü nanüikikat suulia nalatüin suulia 30 sekunto. Müle shia natuma, apütaajeerü minuuto süpüla nayalerüin najapü na waneeinnua otta naküjüin tü pütchi anakat namüin.

⁴ Pütchi 1. Palitchoinjatü tü pütchi aashajeʼennajatkat. Aainjünajatü soʼu apünüin minuuto jee paliʼirüle shia. Na wawalayuu aashajeʼerüinjanakana tü pütchikat, nekirajaainjatü maʼin anain palajana sümaa emetuluin nanüiki. Kajaalapüinjana naya, ayaawatünajatü aaʼu nanüiki. Napüshuaʼa na wayuu anoujakana nünain Jeʼwaa, aʼyataainjana süchiirua natüjüinjanain aleejaa. Talatüsü waaʼin sutuma wainmain na tepichi atüjakana aleejaa. Jiakana kachonshiikana, ayata jükaaliinjüin na tepichikana süpüla natüjüinjanain aleejaa.

⁵ Pütchi 2. Shiainjatü ekirajaka wanee wawala soʼu jaʼrai minuuto. Shiainjatü shikirajaka anain tü pütchi eʼitaanakat süpüleerua. Shiyuʼnnüle tü pütchikat suluʼujee Juʼuna jümaala, jikirajeena naya, juwoutisaajeena naya jee shiale ¿Kasa shikirajaka anain waya tü Nünüikikat Maleiwa?, nnojotsü müin alawaayaainjatkai saaʼin sutuma, anainjatü maʼin sukuwaʼipa süpüla nashatüin shia na wawalayuukana sünain aküjaa pütchi. Shiyuʼnnüle tü pütchikat suluʼujee tü karalouktakat Aküjalaa, süneekeerü tü wersiikulo anakat saaʼin sümüin otta süküjeerü kasain shikirajüin anain waya nakuwaʼipa na wayuu saashajaakana achiki. Shikirajüinjatüle nüchiki wanee wayuu eekai waneepiain nümaa Maleiwa, meimmoluin, nnojoluin yaletüin naaʼin otta eekai niʼyataain maʼin nümüin Maleiwa, süküjüinjatü anain maʼin süpüla washatüin tü nukuwaʼipakat. Niale saashajaain achiki wanee wayuu mojulaakai, süküjüinjatü nnojoluin anain süpüla ashatünaa nukuwaʼipa. Chi shikiipüʼükai tü ekirajawaakat, jülüjüinjatü naaʼin anale shikirajia tü wawalakat jee sükaaliinjüle tü wayuukot sükajee tü Wiwüliakat. Eesü süpüla süküjüin waneeirua wersiikulo sünainpünaaka tü pütchi shikirajakalü anain. Niʼitaajeerü chi shikiipüʼükai tü ekirajawaakat wanee wawala akaaliinjeetka shia.

⁶ Pütchi 3. Jaʼralinjatü minuuto, niainjachi ekirajaka wanee wawala jee shiale wanee wawala. Shiainjatüle ekirajüin wanee wawala müinjatü shikirajia maʼaka saaʼin pütchi 2. Niainjachire ekirajüin wanee wawala sükajee tü karalouktakat Aküjalaa suluʼujeejatü tü Wiwüliakat, nekirajüinjana na jutkatüshiikana eejee tü aashajaaleekat. Nüküjüinjatü tü pütchikat, naashajeʼerüinjatü tü wersiikulo anakat saaʼin nümüin otta nüküjüinjatü tü shikirajakalü anain waya nakuwaʼipa na wayuu saashajaakana achiki tü Wiwüliakat.

⁷ Jeketüinjatü sukuwaʼipa tü pütchikat 3 napüla na tooloyuukana. Saapaanüle tü pütchikat suluʼujee Juʼuna jümaala, jikirajeena naya, juwoutisaajeena naya, ¿Kasa shikirajaka anain waya tü Nünüikikat Maleiwa?, niainjachi ekirajaka wanee wawala. Müinjatü sukuwaʼipa nutuma maʼaka saaʼin sünain aküjaa pütchi jee sünain aʼwaajaa Maleiwa sümaa nüpüshi. Nükaaliinjeechi nia wanee nüpüshi jee niale wanee wawala. Chi shikiipüʼükai tü ekirajawaakat, nieechi eʼitaaka chi akaaliinjüinjachikai nia otta niʼitaajeerü tü sukuwaʼipainjatkat. Niainjachire ekirajüin wanee laülaashi süpüla niiʼiyatüin jamüinjatüin shikirajia tü pütchikat, eeshi süpüla nüneeküin chi wawala akaaliinjüinjachikai nia otta tü sukuwaʼipainjatkat nikirajia. Eesü süpüla naashajeʼerüin waneeirua wersiikulo sünainpünaaka tü pütchi nikirajakalü anain. Kamalainjeerü maʼin namüin na wawalayuukana eʼrajaa nakua na laülaashiikana sünain ekirajaa wanee napüshi otta niale wanee nuwala.

⁸ Achiawaa. Chi shikiipüʼükai tü ekirajawaakat, nütütüleʼereerü naaʼin na wawalayuukana otta nüchiaajeena naya sükajee waneeirua pütchi suluʼuka tü karalouktakat Benefíciese. Naainjüinjatü soʼu piama minuuto. Chi shikiipüʼükai tü ekirajawaakat nnojotsü nüküjüinjatüin palajana tü nekirajaakalü anain na ekirajaashiikana. Kettaapa nikirajüin wanee wawala, nüküjeerü tü kasa anakat nutuma, nüküjeerü tü pütchi eʼitaanakat nüpüleerua suluʼu tü karalouktakat Benefíciese. Isale shia nüchiki, nüküjeerü nümüin sümaa kemeʼeriain nünüiki, jamüin ayatüinjachika nia sünain tü pütchi eʼitaanakat nüpüleerua.

⁹ Tü pütchi eʼitaanajatkat napüleerua na wawalayuukana ashajünüsü suluʼu Benefíciese, süpanaka 79 sünainmüin 81. Kettaale nutuma chi wawalakai tü eʼitaanakat nüpüleerua, nüshajeerü chi shikiipüʼükai tü ekirajawaakat suluʼu nükaraloukse chi wawalakai tü kaʼi kettaakalü oʼu nutuma tü ekirajaayakat. Nüsakireechi nia nümüiwaʼa müleka naainjüle tü ejercicio eʼitaanakat yala. Kettaapa tü outkajawaakat jee shiale soʼu wanee kaʼi naata, eeshi süpüla yootuin chi shikiipüʼükai tü ekirajawaakat nümaa chi wawala eekai nikirajüin. Kojutüinjatü nümüin chi wawala ekirajaakai yootuukain nümaa nümüiwaʼa süpüla kooʼomüinjatüin nunoula (1 Tim. 4:15). 

¹⁰ Nalatüle suulia tü minuuto eʼitaanakat napüleerua na wawalayuu ekirajaakana, aapinnajana naya süka wanee kasa nutuma chi shikiipüʼükai tü ekirajawaakat jee niale aapirüin wanee wawala süka wanee timbre jee shiale nütaletüin wanee kasa süka wanee laapi. Naapinnapa chi wawalakai, kettaainjatü nutuma tü pütchikat otta ashakatüinjachi nia (paashajeʼera Benefíciese, süpana 282, pütchi 4).

¹¹ Nnojorüle kasain aʼalijirüin pia suulia ekirajaa, paashajaa nümaa chi shikiipüʼükai tü ekirajawaakat (paashajeʼera Benefíciese, süpana 282, pütchi 6). Sutuma tü outkajawaakat Ekirajawaa süpüla Aküjaa Pütchi, atüjüshii maʼin na wawalayuukana süpüleerua ekirajaa otta aküjaa pütchi sümüin wayuu sümaa kamaneein naya, anain sukuwaʼipa natuma otta yalayalain maʼin naaʼin. Talatüsü naaʼin Jeʼwaa sutuma waʼwaajüin nia sükajee waaʼinrüin tü nikirajakalü anain waya (Sal. 148:​12, 13; Is. 50:4).