Atüjeena waya nanainjee na wawalayuu atüjakana maʼin aküjaa pütchi
Wainma kasa anasü naainjaka na wawalayuu atüjakana ekirajaa otta aküjaa pütchi, eeshii na kakaliainnakana sünain aʼyatawaa nümüin Jeʼwaa otta eeshii na atüjakana jekenainka. Naya wawalayuukana, nayaawata aaʼu niain Jesuu oʼuniraka nakuwaʼipa na anoujüshiikana sünain aküjaa pütchi sainküin mmaka (Mat. 28:19, 20). Kojuyatuairü neʼrüin nakaaliinjünüin nutuma Jeʼwaa nüka chi naaʼinkai makalaka nachecherüin naaʼin suʼunnaa kasa mojusü (2 Cor. 4:7). Anasü namüin nakaaliinjüin na nawalayuukana süpüla natüjainjanain maʼin aküjaa pütchi maʼaka naaʼin nayakana. Anashii warütkaale nanainmüin na wawalayuu atüjakana maʼin ekirajaa. Müle shia watuma, atüjeena waya nanainjee (Sal. 71:18). ¿Kasa waaʼinrajatka süpüla watüjainjanain nanainjee?
Püküja pütchi namaa. Atüjeena ekirajaa na jekennuukana müleka nakaaliinjünüle natuma na wawalayuu atüjakana aküjaa pütchi otta ekirajaa wayuu. Atüjeechi pia nanainjee müleka jülüjüle paaʼin jamüin sukuwaʼipa naküjia pütchi. (Paashajeʼera tü pütchikat «Cómo mantener el entusiasmo en la predicación» suluʼujee Aapiria Wayuu ojuʼitaka peʼureeroʼu 15 soʼu 2015, pütchi 3.) ¿Jamüsü pukuwaʼipa sünainjee pujuʼitüin sünain aküjaa pütchi namaa na wawalayuu atüjakana maʼin ekirajaa?
Püma nümüin wanee wawala atüjakai ekirajaa nujuʼitai püma sünain aküjaa pütchi. Kapüleere nümüin chi wawalakai nujuʼitüin pümaa sutuma ayuulin nia, püma nümüin eere süpüla pümaain chi pikirajüinkai nipialuʼumüin süpüla jikirajüinjachin nia chayaa. Süchikijee pikirajüin, eeshi süpüla püsakirüin chi wawala atüjakai ekirajaa müleka anale sukuwaʼipa nikirajia chi wayuukai putuma otta eere wanee kasa pünoukteʼerüinjatka sünain sukuwaʼipa pikirajia.
Pükatala kaʼi napüla. Püchajaa sukuwaʼipa süpüla piʼraajüinjanain na wawalayuu atüjakana maʼin ekirajaa. Puunejaa eekai atüjain ekirajaa sünain tü ai puʼwaajakalü aaʼu Maleiwa sümaa püpüshi. Anashi püsakirüle nia süchiki wanee kasa maʼaka saaʼin jamakuwaʼipalin nia süpüla nunoujüinjachin otta kasain niʼrüin aʼwanajaain suluʼu tü outkajawaakat jee eere süpüla nüküjüin süchiki wanee kasa alataka nümüin sünain aʼyatawaa nümüin Jeʼwaa. Isale nüchiki chi wawalakai nuʼunüin pipialuʼumüin eeshi süpüla piain oʼunüin nipialuʼumüin sünain tü ai puʼwaajakalü oʼu Maleiwa sümaa püpüshi.
Nnojo püpüleeruain naaʼin, soto paaʼin eejeerüin kasa isaka nachiki (Roma 12:6-8). Süka kakaliainnain naya sünain aʼyatawaa nümüin Jeʼwaa eeshii laülaale naya otta kapüleere namüin nakaaliinjüin waya weinshi. Wainmapejeʼe tü kasa eekat süpüla watüjain nanainjee süka kakaliainnain naya sünain aʼyatawaa nümüin Jeʼwaa.