Atüjüinjana waya ekirajaa wayuu süka tü karalouktakalüirua
1. ¿Jamüsü makaʼa nakuwaʼipa na anoujashiikana maʼaka saaʼin nukuwaʼipa wanee wayuu kuʼyamai kasa?
1 Chi wayuu kuʼyamaikai wanee kasa, wainma nümaʼana tü niʼyataayakat. Nnaʼaya tü niʼyataakalü aka weinshi otta eesü tü niʼyataʼawaikalü aka. Saashin tü Wiwüliakat lotuinjatü wakuwaʼipa sünain ekirajaa tü shiimüinkat nüchiki Maleiwa (2 Tim. 2:15). Akaataajaʼa chi anoujashikai, atüjüinjachi nia süpüleerua tü Wiwüliakat süka shiain tü niʼyataayakat maʼin sünain ekirajaa wayuu nüchiki Maleiwa (Mat. 28:19, 20). Wachajaainjatü sukuwaʼipa süpüla watüjüinjanain ekirajaa süka tü Wiwüliakat. Eepajaʼa waneeirua karaloukta watüjüinjatka aka ekirajaa wayuu nüchiki Maleiwa (Prov. 22:29).
2. ¿Jarat tü waneeirua kasa eekat wamaʼana süpüla wekirajüin wayuu?
2 Süpüshi tü kasa eekat wamaʼana süpüla wekirajüin wayuu. ¿Kasa maa eeka wamaʼana süpüla wekirajüin wayuu? Tü wekirajakat maʼin aka wayuu shia tü karalouktakat ¿Kasa shikirajaka maʼin tü Wiwüliakat? Kettaapa tia karalouktakat natuma na wekirajüinkana, wekirajüin naya süka tü karalouktakat «Ayata alin jüpüla Maleiwa». Tia süpülajatü noonooin sümaa tü pütchi nümakat Jeʼwaa. Atüjüinjana maʼin waya ekirajaa süka tia piamasükat karaloukta. Eesü wamaʼana wanee karaloukta süpülajatka oʼttaa sünain ekirajaa wayuu. Tia shia tü poyeetokot Pütchi anasü nutuma Maleiwa. Kapüleere namüin na wayuukana aleejaa jee palitchonle karaloukta suluʼu nanüiki, wekiraja naya süka tü poyeetokalüirua Poonoo nümaa Maleiwa jee Poonoo nümaa Maleiwa süpüla katüin poʼu waneepia. Süpüla natüjaain saaʼu süchiki tü nupueulosekat Maleiwa, wekiraja naya süka tü poyeetokot ¿Jaralii na aaʼinrakana maaʼulu tü nüchekakat Jeʼwaa? Eesü waneeirua video anaka süpüla wekirajüin anain naya. Tia shia tü videokot ¿Jamüshii wekirajaainjanaka sünain tü Wiwüliakat?, ¿Kasache aainjünaka suluʼu tü Piichi Outkajaaleekat? otta ¿Kasa sünainpünaaka ekirajawaa sünain tü Wiwüliakat?
3. ¿Kasa aküjüneetka wamüin mapa suluʼu Waʼyataain Nümüin Maleiwa?
3 Aküjüneerü wamüin mapa suluʼu Waʼyataain Nümüin Maleiwa jamüinjatüin watuma shikirajia wayuu süka tü karalouktairua eekat wamaʼana. Watüjüle ekirajaa süka tia karalouktakalüirua, woonoojeerü amaa tü sümakat wamüin tü Wiwüliakat: «Ee paaʼin sünain tü pukuaippakat suulia paaʼinrajüin kasa mojusü je suulia pikirajüin sünain kasa naatajatü. Müleka püchecherüle paaʼin sünain tüü, oʼtteʼenneena na aapajakana pünüiki. Je müshia piakaʼiya, oʼttaweechi» (1 Tim. 4:16).