Atüjainjana waya aküjaa pütchi: sainküin oikkaalee

¿Jamüsü choʼujaaka? Süka shiʼyataain maʼin wayuu, anasü shiʼikajaanüle namüin tü nünüikikat Maleiwa eere naʼyataain, süka jamüin, wanteenain nanain naʼyataaleruʼu. Anasü maʼin aküjaa pütchi eere shiʼyataain wayuu, maʼaka saaʼin sainküin oikkaalee. Kamaneeshii na wayuu aʼyataakana sünain oikkaa wanee kasa shiiʼiree shiyaʼlajünüin noikkaain. Aneerü maʼin aküjaa pütchi namüin na aʼyataakana müleka anale wayolojo otta waʼanaaya (2 Cor. 6:3). Chi wawala jülüjakai aaʼin tü aküjaakat pütchi, jülüjainjatü naaʼin müleka süküjünajatüle pütchi sainküin oikkaalee jee müsia jaraliinjanain ojuʼitüin sünain.

Anuu tü sukuwaʼipainjatkat:

Motsoʼo pümaʼa. Kamaʼale maʼin pia sünain aashajawaa nümaa wanee wayuu eekai niʼyataain, mojeerü nümüin püntüin piantua sünain aküjaa pütchi eere niʼyataain.
Pünta soʼu tü oora anashiikat: wanaa sümaa nnojoluin naʼyataain maʼin. Anashii wantüle wattaʼa maalü noʼttaiwaʼaya sünain aʼyatawaa.
Anashi paashajaale palajana nümaa chi laamakai otta kamanee pia nümüin. Eesü süpüla müin pünüiki: «Yooteeshii waya motsoʼo namaa na wayuu yaakana aʼyataain, kapüleesü wamüin wantüin nanain nepialuʼu». Piiʼiyata motsoʼo namüin wanee karalouktachon, wanee rewiisüta jee shiale wanee karaloukta. Anasü nnojorüle waashajaain namaa süchiki tü nneerü asülajünakat saaʼu tü karalouktakalüirua, waküja namüin süchiki tia müleka nasakirüle waya jalejeekualüin tü nneerü aainjünakat aka karaloukta. Müinjatü watuma suulia namajüin: «Oikkaalii neʼe karaloukta».
Kamaneere pümüin chi laamakai, püma nümüin müleka eere süpüla paashajaain motsoʼo namaa na wayuu aʼyataakana nümüin. Anale namüin na wayuukana, eeshi süpüla püpütüin karaloukta eere neemeraain.
Eeja waaʼin suulia wekeʼejüin saaʼin wayuu. Jamüshijaʼa naashajaale wanee wayuu nümaa wanee aʼyalajüinjachikai jee shiale kupaain maʼin nia, anashii waʼatapajüle nia süpüla yootoo nümaa.

Puuʼulaka süpüla kashikat tüü:

Soʼu tü Ai puʼwaajakalü aaʼu Maleiwa. Pikirajaa sünain jamüinjatüin sukuwaʼipa putuma müleka püküjüinjachire pütchi sainküin oikkaalee.