Atüjainjana waya aküjaa pütchi: pikiraja chi pikirajüinkai süpüla tütüinjachin nia sünain ekirajawaa

¿Jamüsü choʼujaaka? Süpüla icheinjatüin nunoula wanee wayuu eekai nikirajünüin sünain tü Wiwüliakat, acheküshi nütüjain süpüleerua tü shikirajakalü anain tü Wiwüliakat, makatüinjatü shia suluʼu naaʼin otta nikii. Nnojotpajaʼa naaʼinrüinjatüin neʼe tia (Heb. 5:12–6:1). Nnojotsü mapüleein ekirajawaa sünain tü Wiwüliakat, jülüjainjatü maʼin naaʼin tü pütchikat süpüla sotuinjatüin shia naaʼin otta niʼitaainjatüin shia suluʼu nukuwaʼipa (Prov. 2:1-6). Atüjeechi maʼin nia süpüleerua niyaawatüin saaʼu wanee pütchi müleka kiʼrale nia sünain ekirajawaa nümüiwaʼa otta tütüle nia sünain. Müle shia nutuma, nnojoleerü eemiajaain nunoula suuʼulakünapa naaʼin (Luc. 6:47, 48).

Anuu tü sukuwaʼipainjatkat:

Püma nümüin choʼujaain maʼin woʼuraajüin nümüin Jeʼwaa süpülapünaa ekirajawaa sünain tü Wiwüliakat (Juan 14:26; 1 Cor. 2:10).
Pikiraja nia süpüla yapainjatüin nutuma tü ekirajaanajatkalü anain. Piiʼiyata nümüin jamüin sukuwaʼipa putuma süpüla pejeerajüinjatüin tü pütchikalüirua.
Püma nümüin nusouktaiwa tü niyaawatakalü aaʼu suluʼu nikii suulia shiain naashajeʼerüin tü sümakat tü karalouktakat.
Püma nümüin naashajeʼeraiwa tü Wiwüliakat weinshi. Suluʼu jw.org eʼitaanüsü wanee programa aküjaka sukuwaʼipa süpüla saashajeʼennüinjatüin tü Wiwüliakat süpüshuaʼa soʼu wanee juya. Nüchajaainjatü maʼin sukuwaʼipa süpüla kiʼrainjachin nia sünain naashajeʼerüin tü Wiwüliakat. Aneerü maʼin nukuwaʼipa müleka naashajeʼerüle tü Wiwüliakat weinshi (Sal. 1:2, 3).
Pikiraja nia süpüla nütüjain süpüleerua achajawaa pütchi suluʼu PÜTCHIPÜLEE SULUʼUKA INTERNET sutuma Watchtower. Otta nütüjainjatü apüleerua süsímbolose tü karalouktakalüirua wekirajakat maʼin anain.

Puuʼulaka süpüla kashikat tüü:

Sujutaapa jutuma wanee ekirajaaya, püma nümüin chi pikirajüinkai nüküjaiwa tü sotokat naaʼin sünainjee tia ekirajaayakat. Müshia piakai, müleka nnojorüle wayuu pikirajüin, eeshi süpüla püküjüin süka pünüiki tü pikirajaakalü anain suluʼujee tü Wiwüliakat jee shiale suluʼujee Aapiria Wayuu. Müle shia putuma, piʼreerü piyaawatüin saaʼu tü pütchi pikirajaakalü anain.