Waaʼinrajatka süka tü pütchi akürawaajünakat
1. Mayaapejeʼe shiʼitaanüin karaloukta suluʼu jw.org, ¿kasa maa eʼitaanaka suluʼu?
1 Wainma wayuu atüjaaka saaʼu tü shiimainkat sükajee naashajeʼerüin tü pütchi eʼitaanakat suluʼu jw.org (Ecl. 12:10). Wainmapajaʼa tü karaloukta akürawaajünakat jee eʼitaanakat suluʼu tia paajinakat. ¿Paapajüirü tia pütchikat? ¿Eesüche tü kasa jalouikalü apüla tia?
2. ¿Kasa eeka süpüla waaʼinrüin wekirajaapa wamüiwaʼa jee waʼwaajapa Maleiwa sümaa wapüshi?
2 Jalouisü süpüla ekirajawaa wamüiwaʼa otta sümaa wapüshi. Waapajüle tü pütchi akürawaajünakat suluʼujee tü Wiwüliakat, tü rewiisütakalüirua otta waneeirua karaloukta wanaa sümaa waraittüin waya jee waaʼinrüin wanee kasa, wajayatüin tü kaʼikat (Éf. 5:15, 16, TNM). Wanee kasa eeka süpüla waaʼinrüin waʼwaajapa Maleiwa sümaa wapüshi shia waapajüin tü pütchi akürawaajünakat. Wekirajaale wamüiwaʼa jee wekirajaale sünain wanee anüikii naatajatü, eesü süpüla waapajüin tü pütchi akürawaajünakat süpüla watüjainjanain aashajeʼeraa karaloukta.
3. Waküjapa pütchi, ¿jaralii na wayuu eekana süpüla waküjüin amüin pütchi süka tü pütchi akürawaajünakat?
3 Jalouisü süpüla aküjaa pütchi. Wanaa sümaa waküjüin pütchi, wainma na wayuu makana wamüin kupaain naya süpüla naashajeʼerüin wanee karaloukta. Akatsaʼa anain namüin naapajüin tü pütchi akürawaajünakat. Na wayuu naatakana anüikii, eesü süpüla nacheküin tü pütchikat müleka naapajüle shia suluʼu nanüiki (Aluw. 2:6-8). Suluʼu waneeirua mma eeshii na wayuu kamalainkana amüin naapajüin wanee pütchi. Jamüshiijaʼa na wayuu hmong münakana, nakuentajüin süchiki wanee kasa namüin na nachonniikana. Süka jamüin, süpütüʼüleein suluʼu nekii wanee kasa eeka sukuentajünüin namüin. Suluʼu waneeirua mma chaa África, kamalainsü namüin na wayuukana sukuentajünüin namüin süchiki wanee kasa.
4. Waküjapa pütchi süka tü pütchi akürawaajünakat, ¿kasa eeka süpüla wasakirüin anain waaʼin?
4 Waküjapa pütchi, eesü süpüla wasakirüin waaʼin sünain tüü: ¿Anasüche weʼitaale tü pütchi akürawaajünakat süpüla naapajüinjatüin shia wanee wayuu? ¿Eesüche süpüla waluwataain shia suluʼupünaa Internet nümüin wanee wayuu weʼraajakai? ¿Anasüche washakatirüle shia suluʼumüin wanee CD süpüla weʼikajaain shia nümüin wanee wayuu sümaʼaleʼeya tü karalouktakat? Müleka waapüle nümüin wanee wayuu tü pütchi akürawaajünakat suluʼujee wanee poyeeto, rewiisüta jee tü karalouktacheinkat, eesü süpüla washajüin shia sünain tü karalouktachon sümaajatkat waʼyataain nümüin Maleiwa. Tü pütchi akürawaajünakat, akumajuushi süpüla wekirajaainjanain süka süpüla wapünajüinjatüin tü shiimainkat süka (1 Cor. 3:6).