Washata nakuwaʼipa na nünüikimaajanakana Maleiwa: Habacuc
1. ¿Jamüsü nnojotka wattaluʼuin woulia tü kasa alatakat nümüin Habacuc?
1 Süka kooʼomüin maʼin tü kasa mojusükat sainküin mmakat otta jouluin tü müliaakat, eesüjaʼa süpüla müin waaʼin maʼaka naaʼin Habacuc. Jamüshijaʼa nia, nüsakirüin Jeʼwaa sünain jamüin nuuʼulaaka eein müliaa otta tü mojulaasükalüirua (Hab. 1:3; 2 Tim. 3:1, 13). Müleka jülüjale maʼin waaʼin tü kasa alatakat nümüin Habacuc otta tü kasa naainjakat, wachechereerü waaʼin otta eejeerü waaʼin sünain aʼatapajaa tü kaʼi kasalajanainjatkalü oʼu saainjala wayuu (2 Ped. 3:7).
2. ¿Kasa waaʼinrüinjatka süpüla woonooinjanain waneepia nümaa Jeʼwaa maʼaka naaʼin Habacuc?
2 Woonoo waneepia. Nnojotsü shapaain maʼin naaʼin Habacuc sutuma tü kasa niʼrakat, shia naaʼinmaaka tü niʼyataainkat nümüin Maleiwa (Hab. 2:1). Nüküjüin Jeʼwaa nümüin Habacuc sünain shikeraajüinjatüin tü Nünüikikat Jeʼwaa otta katüinjatüin noʼu na wayuu oonookana waneepia nümaa (Hab. 2:2-4). ¿Kasa shikirajaka anain waya tü alatakat nümüin Habacuc? Maaʼutpünaa anainjatü waaʼin süka watüjaain saaʼu süntüinjatüin nükalia Maleiwa, nnojotsü shiainjatüin jülüjain waaʼin joujainjatüin süntaka. Katsüinre wanoula nünain Jeʼwaa, eejeerü waaʼin waneepia otta aʼyataajeena maʼin waya sünain aküjaa pütchi (Heb. 10:38, 39).
3. ¿Jamüinjatü waaʼin sünain aʼyatawaa nümüin Maleiwa mayaapejeʼe weʼreenain müliaa?
3 Talata waaʼin sünain aʼyatawaa. Nushutapa waaʼu Gog chi chejeʼewaikai Magog, icheinjatü maʼin wanoula nünain Jeʼwaa (Ezeq. 38:2, 10-12). Müliashaatasü wayuu müleka eere wanee kasachiki suluʼu wanee mma, ajaʼttüsü suwashirüin wayuu, antüsü tü jamükat jee kooʼomüinsü tü müliaakat sutuma masetirain tü nneetkat. ¿Kasa waaʼinrüinjatka weʼrüle kasa makat aka saaʼin tia? Mayaapejeʼe weʼreenain müliaa, anasü talatüle waaʼin sünain aʼyatawaa nümüin Jeʼwaa maʼaka naainjain shia Habacuc (Hab. 3:16-19). Katsüinjeerü tü wanoulakat sünain aʼatapajaa müleka jülüjale waaʼin niain Jeʼwaa chi aapakai talataa wamüin (Neh. 8:10; Heb. 12:2, TNM).
4. ¿Kasa anasü eeka süpüla weʼrüin maaʼutpünaa? ¿Kasa anasü weʼreetka mapeena?
4 Ayateena nikirajüin Jeʼwaa na wayuu oʼttaainjanakana süchikijee Armagedón (Hab. 2:14). Meeria nakuwaʼipa na wayuu asoʼiraainjanakana aaʼin. Sümaʼinruʼu waʼatapajüin tia, waaʼinmaainjatü tü aküjaakat pütchi nüchiki Maleiwa (Sal. 34:1; 71:17).