Puchuntüle waneepia nümüin Maleiwa talateechi nia pümaa

Anashaatasü maʼin wakumajia nutuma Maleiwa. Jamüshiijaʼa waya, eeshii süpüla woʼuraajüin otta waküjain nümüin tü suluʼukat waaʼin. Anuujeseʼe nünüiki David, wanee nünüikimaajachi Maleiwa: «Piakai chi aapajakai sünüiki wayuu suʼuraajapa, anteerü pünainmüin wayuu eekai eein» (Salmo 65:2). ¿Kasa waaʼinrajatka süpüla naapajüinjatüin Maleiwa wanüiki otta talatüin nia wamaa?

PÜKÜJA TÜ SULUʼUKAT PAAʼIN OTTA NNOJO YALETAYAAIN PAAʼIN PUʼURAAJAPA

Puʼuraajapa eesü süpüla püküjain nümüin Maleiwa süpüshuaʼa tü suluʼukat paaʼin (Salmo 62:8). Anasü maʼin nümüin Maleiwa woʼuraajüle nümüin süka süpüshuaʼa waaʼin.

PUCHUNTA NÜNÜLIA MALEIWA PUʼURAAJAPA

Mayaainjeʼe wainmain nünüliayaasü Maleiwa, waneesia neʼe tü nünüliakat. «Taya chi kanüliakai Jeʼwaa» (Isaías 42:8). Alatüsü suulia sietemiittua ashajünüin tü anülieekat Jeʼwaa suluʼu tü Wiwüliakat. Wainma nünüikimaajana Maleiwa achuntapuʼukana tü nünüliakat. Anuu tü nümakat Abraham: «Jehovákalee, [...] Ayatajachi taya achuntüin pümüin sooʼopünaa tia» (Génesis 18:30). Müshiʼiya wayakana, wachuntajatü tü nünüliakat woʼuraajapa.

PUCHUNTA NÜMÜIN MALEIWA SULUʼU PÜNÜIKI

Nütüjaa aaʼu Maleiwa tü jülüjakat waaʼin otta jamüin waaʼin, jaʼitairü naatain tü anüikii waashajaakalü aluʼu. Anuu tü sümakat tü Wiwüliakat: «Shiimain nnojolüin koʼuin nükuaippa Maleiwakai sümüin wayuu. Wayuu eekai eein suluʼu mmakat süpüshua, kojutkat atüma Maleiwakai otta aaʼinrakat tü anasükat, nnojoleerü nüjütaain amaa shia» (Aluwataaushikana [Hechos] 10:34, 35).

Süpüla anain wakuwaʼipa nutuma Maleiwa, nnojoliinjana neʼe waya oʼuraajüin, eesü waneirua kasa waaʼinrajatka. Sünain tü wane pütchikat, wekirajaajeerü anain tia.